Read Ыдыктыг Библия, 2011 Псалтирь 78 Bible Online

Псалтирь 78 - Ыдыктыг Библия, 2011 bible

Псалтирь 78

¹Мизмор-ыр. Асафтыы. [1] Бурганывыс, өнчүң болур черже өске чоннар улузу чедип келгеш, Сээң ыдыктыг өргээңни бужартатты, Иерусалим хоорайны үреп бусту.

²Сээң чалчаларың мөчү-сөөгүн дээрниң куштарынга хөндеп чиир кылдыр октап берген, Сеңээ бердинген улустуң мага-бодун черниң аң-араатаннарынга каап берген.

³Иерусалимни долгандыр улустуң ханы суг ышкаш агып чыдыр, оларны орнукшудар кижи чогул.

⁴Кожа чоннарга кочуладып тур бис, дескиндир чурттап турар улуска дорамчыладып, бак сөгледип тур бис.

⁵Дээрги-Чаяакчы, чежеге дээр килеңнээр сен? Кезээ мөңгеде бе? Хүннээн сеткилиң чежеге дээр от дег кыварыл?

⁶Сээң килеңиң Сени билбес чоннарже, Сээң адыңны мактавас күрүнелерже кыптыксын!

⁷Чүге дээрге олар израиль чонну сыырыпкан, ооң чурттаан черин хоозурадып каан болгай.

⁸Бистиң ооң мурнунда кылган кем-буруувус дээш [64], бисти кезетпе; өршээлиң дүрген-не биске уткуй келзин — аажок базындырып чор бис.

⁹Бодуңнуң алдарлыг адыңны бодааш, дузалап көр, Камгалакчы Бурганывыс. Бодуңнуң адың дээш бисти камгалап, бачыттарывысты өршээп көр.

¹⁰Өске чоннар: «Боларның Бурганы кайыл?» — деп айтырбазын. Өске чоннар улузундан чалчаларыңның төгүлген ханы дээш өжээн негээн кеземчең биске билдингир апарзын.

¹¹Хоругдаттырган кижиниң човууру Сеңээ дыңналып четсин; өлүр четкен улусту өндүр улуг күжүң хостап кагзын.

¹²Дээрги, Сени дорамчылап турган кожа чоннарның дорамчылалын оларның боттарынга чеди катап хөй кылдыр ээлдирип бер.

¹³А бис — Сээң чонуң, коданыңда хой-сүрүүң Сеңээ кезээ мөңгеде өөрүп четтирип, Сени салгалдан салгал дамчып алгап-мактаар бис!