Read Ыдыктыг Библия, 2011 Псалтирь 79 Bible Online

Псалтирь 79 - Ыдыктыг Библия, 2011 bible

Псалтирь 79

¹Хөгжүм башкарыкчызынга. «Шошанним-Эдуф» деп аялга үдээр. Асафтыы. Мизмор-ыр. [1]

²Израильдиң Кадарчызы, дыңнап көрем! Иосифтиң салгалын хой дег сүрген Сүрүкчү, херувимнер [65] кырында саадап олурар Бурган, чырып көстүп келем!

³Эфремниң, Вениаминниң, Манассияның аймактарының мурнунга күчү-күжүң көргүзүп, бисти камгалап чедип келем!

⁴Бурган, бисти база катап тургузуп калам! Арның чайынналдыр чырызын — камгалалды ынчан чедип аар бис.

⁵Аг-шериглиг Дээрги-Бурган-Чаяакчы! Чежеге дээр Бодуңнуң чонуң мөргүлүн хорадап дыңнавас сен?

⁶Чонуңну Сен карак чажы-биле чемгердиң, эңмежок карак чажын аңаа пөктүр ижиртип кагдың.

⁷Сен бистиң черивисти кожа чоннарга маргыжар чылдак кылып каан сен, дайзыннарывыс бисти кочулап тур.

⁸Аг-шериглиг Бурган! Бисти база катап тургузуп калам! Арның чайынналдыр чырызын — камгалалды ынчан чедип аар бис.

⁹Сен Египеттен виноград сывы дег чонуңну көжүрүп эккелгеш, өске чоннарны черден үндүр сывырыпкаш, ону тарып каан сен;

¹⁰ооң өзер черин аштап-арыглап, дазылдарын быжыглаан сен — ол виноград чер кырын долдур үнүп келген.

¹¹Ооң хөлегези дагларны шыва апкан, ооң сыптары аажок бедик пөштер дег.

¹²Ол бодунуң сыптарын далайга чедир, өзүмнерин Евфрат хемге чедир дөстелдирипкен.

¹³Бодуңнуң виноградыңны долгандыр туткан херимнерни ам чүге үреп бустуң? — эрткен-дүшкен шупту улус ам ону үзе тыртып турар-дыр.

¹⁴Арганың черлик хаваны ону тура казып тур, шөлдерниң хээкчилери хемирип чип тур.

¹⁵Аг-шериглиг Бурган! Эглип кээп, өршээ, дээрден топтап көр, бо виноградты карактап көр.

¹⁶Бодуңнуң холуң олурткан дөстерни, Бодуңга шилип алганың өзүмнерни кадагала.

¹⁷Оларны от-даа чигген, кезип-даа каапкан — Сээң килеңнээн алгыңдан олар өлүп каар-дыр.

¹⁸Бодуңнуң оң талаңга турар кижини, Бодуңга шилип алганың кижини [66] Сээң күчү-күжүң карактазын.

¹⁹Бис база Сенден ойталавас бис. Бисти тынгарып каг — Сээң адыңны мактап кыйгырар бис.

²⁰Аг-шериглиг Дээрги-Бурган-Чаяакчы! Бисти база катап тургузуп калам! Арның чайынналдыр чырызын — камгалалды ынчан чедип аар бис.