Read Ыдыктыг Библия, 2011 Псалтирь 82 Bible Online

Псалтирь 82 - Ыдыктыг Библия, 2011 bible

Псалтирь 82

¹Мизмор-ыр. Асафтыы. [1]

²Бурганым! Харыы-сөс чок олурба, ыыт-шимээн, киржилге чок артпа, Бурганым.

³Дыңна даан — дайзыннарың шимээргеп тур, Сени көрбес улус баштарын көдүрүп келди;

⁴олар Сээң чонуңга удур кара сагыштыг сүлчээ кылып, кадагалаан улузуңну канчаптарын сүмележип тур.

⁵Дайзыннар: «Израиль деп ат моон соңгаар дыңналбас кылдыр, ол чонну барып узуткап кааптаалы» — дижир болду.

⁶Чаңгыс эп-биле дугурушкаш, Сеңээ удур эвилелдежип турар дайзыннарың бо-дур:

⁷эдом чон, измаилчилер, моав чон база агар аймак,

⁸гевал, аммон, амалик чоннар, филистимнер база Тирниң чурттакчылары.

⁹Ассирия база оларга каттыжып, Лоттуң салгалынга [69] дуза кадып тур. Сэла

¹⁰Мадиан чонну тиилээниң дег база Киссон хем эриинге Иавин биле Сисараны тиилээниң дег, дайзыннарыңны база шак ынчаар тиилеп көр;

¹¹демги улус Эн-Дор чанынга узуткаттыргаш, черде өдек дег болу берген болгай.

¹²Дайзыннарыңның нояннарын — Орив биле Зивти дег, шупту баштыңнарын — Зевей биле Салманны дег аажылап көр.

¹³«Бурганга хамааржыр одар-белчиирлерни эжелеп аалы» — деп турган улус ол-ла болгай.

¹⁴Оларны каңмыыл сиген ышкаш аажыла [70], Бурганым, хатка эстээн тараа саваңы дег кылып каг.

¹⁵Оттуң арга-арыгны өрттедири дег, чалбыыштың дагларны хуюктаары дег,

¹⁶оларны Бодуңнуң шуурганың-биле сывыртавыт, казыргың-биле сүртедивит.

¹⁷Оларның ат-алдарын баксырадывыт — адың адап, Сенче чүткүзүннер, Дээрги-Чаяакчы!

¹⁸Кочу-шоотка кирип, кезээ мөңгеде коргуушкунга алыссыннар, бак атка кирип, узуткаттырып кагзыннар.

¹⁹Олар Сени дың чаңгыс, Дээрги-Чаяакчы деп аттыг, бүгү чер-делегейни чагырган Дээди Өрүкү Бурган деп билип алзын.