Read Ыдыктыг Библия, 2011 Псалтирь 89 Bible Online

Псалтирь 89 - Ыдыктыг Библия, 2011 bible

Псалтирь 89

¹Мөргүл. Бурганның кижизи — Моисейнии. [1]

²Дээрги, Сен биске салгалдан салгал дамчып хоргадал бооп чор сен.

³Даглар төрүттүнериниң-даа мурнунда, чер биле өртемчейни чаяап кааныңның-даа мурнунда, үе-дүптен бээр, кезээ мөңгеде Бурган-дыр сен!

⁴Сен кижини довуракче хуулдуруп: «Кижи амытан, келген чериңче дедир эг!» — деп турар-дыр сен.

⁵Сээң мурнунга муң чыл, дүүнгү хүн дег, дүнеки каш шак дег, эскет чок эрте бээр.

⁶Сен кижилерни мөңге уйгуже, үер дег, арыда шаап аппаар сен [79]; ол улус — эртен үнүп келгеш, бүрүленип, чечектелгеш, кежээ кадып, оңуп каар оът-сиген дег.

⁷Бис Сээң килеңиңге узуткаттыргаш, чиде бээр бис, Сээң хорадаарыңдан коргуп-сүртээр бис.

⁸Сен бистиң кем-буруувусту мурнуңга бөле салып аар сен, чажыт чүүлдеривис Сээң арын-шырайыңның чырыынга өттүр көстүп кээр.

⁹Сен килеңнээриңге, бистиң бүгү назынывыс хей баар, чуртталгавыс чылдарын, үндүр тынган дег, дүрген төтчеглеп кааптар бис.

¹⁰Чурттап эртер хүннеривис чеден чылга деңнежир, а күштүг улус болза, сезен-даа хар чедир чурттаар, ол хуусааның дургузунда бисти муңгарал биле хилинчек тудуп чиир, чуртталгавыс караш дээр, өлүмче ужуга бээр — ол-ла-дыр бис.

¹¹Сээң килеңиң күжүн эки билир кижи бар бе? Сенден коргарывыс Сээң килеңиңниң күжүнге дүгжүр.

¹²Назынывыс хүннерин шын үнелээринге өөредип көр — мерген угаанны чүрээвис-биле чедип аалы.

¹³Дээрги-Чаяакчы, килеңиң соксадып көр! Кажанга дээр килеңнээр сен?! Бодуңнуң чалчаларыңны өршээп көр.

¹⁴Эртен бисти энерелиң-биле тоттур, ынчан бүгү назынывыста өөрүп-хөглээр бис.

¹⁵Бисти хинчектеп келген хүннериң саны-биле, айыыл-халап көрүп келгенивис чылдарның хемчээли-биле биске өөрүшкү-хөгнү шаңна.

¹⁶Сээң ажыл-херээң Бодуңнуң чалчаларыңга, Сээң өндүр чырыың оларның үре-салгалынга көзүлзүн.

¹⁷Дээрги Бурганывыстың чаагай сеткили биске илерезин. Холдарывыстың кылган ажыл-херектеринге чедиишкинден хайырла, Дээрги-Чаяакчы, холдарывыстың ажыл-херектеринге чедиишкинден хайырла.