Read Ыдыктыг Библия, 2011 Псалтирь 9 Bible Online

Псалтирь 9 - Ыдыктыг Библия, 2011 bible

Псалтирь 9

¹Хөгжүм башкарыкчызынга. «Оглунуң өлүмү» деп аялга үдээр. Мизмор-ыр. Давидтии. [1]

²Дээрги-Чаяакчы, бүгү-ле чүлдү-чүрээмден Сеңээ өөрүп четтирер мен, Сээң хамык кайгамчык чүүлдериңни медээлээр мен;

³Сен дээш өөрүп-хөглеп, байырлаар мен, Сээң ат-алдарыңны алгап ырлаар мен, Дээди Өрүкү Бурган!

⁴Мээң дайзыннарым дезип чорупкаш, тептигип кээп дүжерлер, Сээң мурнуңга өлүп каарлар.

⁵Сен меңээ чөптүг шииткелди көргүстүң, чаргы-чаалымны шын шиитпирлеп бердиң; дүжүлгеде чөптүг Шииткекчи бооп саадап орар-дыр сен.

⁶Өске чоннарга килеңней бердиң, бузуттуг хейлерни узуткап кагдың, оларның дугайында сактыышкынны кезээ мөңгеде балап кааптың.

⁷Дайзыннар кезээ мөңгеде буурап калды, хоорайларын бузуп кааптың, оларны ам сактып кээр кижи чогул.

⁸А Дээрги-Чаяакчы кезээ мөңгеде чагырып артар, Ол Бодунуң дүжүлгезин шииткел үндүрер дээш белеткеп алган;

⁹Ол өртемчейни чөптүү-биле шиидер, бүгү чоннарга шын шииткел онааштырар.

¹⁰Дээрги-Чаяакчы — дарлаткан кижиге хоргадал, айыыл-халап үезинде — шивээ.

¹¹Сээң адыңны хүндүлеп билир улус Сеңээ идегээр; Сенче сеткилинден чүткээн улусту кагбас болгай сен, Дээрги-Чаяакчы.

¹²Сион дагда чагырып турар Дээрги-Чаяакчыны алгап ырлаңар, өске чоннар аразынга Ооң ажыл-херектерин медээлеңер;

¹³хан төгүксээр улусту Ол сактып алган, дарлатканнарның алгы-кышкызын утпайн, оларны бодап чоруур.

¹⁴Дээрги-Чаяакчы, менче ээ көрнүп, мени көрбес улуска базындырып чоруурумну көр. Сен мени өлүмнүң эжик-хаалгазындан көдүрүп аппаар сен —

¹⁵Сион хоорайның эжик-хаалгазынга Сеңээ хамык макталымны ырлаар арганы ынчаар хайырлаар сен; Сенден кээр камгалал дээш өөрүп-байырлаар мен.

¹⁶Өске чоннар боттарының казып алган оңгарынче чуглуп кирген, боттарының салып алган какпазынга буттарын кактырып алган.

¹⁷Дээрги-Чаяакчы Бодунуң чөптүг шииткели-биле билдингир — бузуттуглар боттарының кылган херектеринге туттуруп аар. Үзүктелиишкин. Сэла

¹⁸Бузуттуглар — Бурганны уткан бүгү чоннар — өлүглер оранынче дүже берзин;

¹⁹түреңги кижиниң дилээнге харыы черле турар, дарлаткан улустуң идегели кезээ мөңгеде куруг калбас болгай.

²⁰Дээрги-Чаяакчы, дүрген келем! Кижи амытан бодун «Күштүг мен» деп санавазын, бүгү чоннар Сээң мурнуңга шииттирзин.

²¹Дээрги-Чаяакчы, чоннарны коргудувут [9]: өлүр тынныг кижилер бис дээрзин олар билип алзын! Сэла

²²Дээрги-Чаяакчы, чүге ыракта турарың ол [10], айыыл-халап үезинде чаштып чүңүл?

²³Адыыргак, бузуттуг улус ядамыкты истеп-сүрүп чоруур — олар боттарының бодап алган кажар аргаларынга туттуруп алзын.

²⁴Бузуттуг кижи самыыраан күзээшкиннеринге чоргаарланыр, чөптүг эвес олча-ажыын эки деп йөрээр, Дээрги-Чаяакчыны тооп көрбес.

²⁵Бузуттуг кижи адыыргаандан: «Ол бисти кезетпес!» — дээр, Ооң шупту бодалдары: «Бурган чок!» — деп турар.

²⁶Ол бодунуң оруктарынга кандыг-даа үеде чедиишкинниг болур, Сээң шииткелдериң — оон талыгыр ыракта болуп турар, ол бодунуң шупту дайзыннарын куду көөр.

²⁷Ол бодунуң сагыжында: «Кажан кезээде тендиш дивес мен, салгалдан салгал дамчып меңээ бак чүү-даа болбас» — деп бодаар;

²⁸ооң аксы каргыш-чатка, авыяас сөс, оп-меге-биле долган; ооң дылының бажында — бузут биле кара сагыш бар.

²⁹Бузуттуг кижи быжыглал чок суурларга кедеп олурар, ооң карактары аас-кежик чок күжүрнү дилегзинип көрүп турар; ажытталчак черлерге кем-буруу чок кижини өлүрүп каар;

³⁰ажытталчак черге, шыргай иштинде арзылаң дег, аас-кежик чок күжүрнү сегирип аар дээш кедеп чыдар — ону бодунуң какпазынга кактыргаш, тудуп аар;

³¹бузуттуг кижи ээгип, доңгайган соонда, түреңги улус ооң күштүг аспактарынче кире бээр.

³²Ол бузуттуг кижи бодунуң сагыжында: «Бурган үүлгедиглеривисти уттупкан-дыр, Ол хая көрнү берген-дир — ам кажан-даа көрбес дээн-дир» — деп бодаар.

³³Дээрги-Чаяакчы, дүрген келем, Бурганым, холуң көдүрлүп, базындырган улусту утпа!

³⁴Бузуттуг кижи чүге бодунуң сагыжында: «Бурган бисти кезетпес» — деп бодап, Сени тооп көрбезил?

³⁵Улустуң човалаңы биле айыыл-халавын көрүп тур сен — Бодуңнуң холуңну ынаар сунар дээш, көрүп тур сен. Аас-кежик чок күжүр Сеңээ идегеп тур, өскүс кижиге дузалаар сен.

³⁶Бузуттуг база бак кижиниң күчү-күжүн суларат — ооң бузуду шуут артпас кылдыр, ол кижини кезет.

³⁷Дээрги-Чаяакчы кезээ мөңгеде хааннап турар, өске чоннар улузу Ооң чер-чуртундан арлып чиде бээр.

³⁸Дээрги-Чаяакчы, базындырган улустуң күзелин дыңнап тур сен — оларның чүрээн быжыктыр, кулааңны оларже ээктир.

³⁹Өскүс база базындырган кижиге чөптүг шииткелиң хайырла; кым-даа болза чер кырынга улусту моон соңгаар коргутпазын.