Read Ыдыктыг Библия, 2011 Псалтирь 90 Bible Online

Псалтирь 90 - Ыдыктыг Библия, 2011 bible

Псалтирь 90

¹Дээди Өрүкү Бурганның чаглааның адаанда чурттап турар болзуңза, Күчүлүг Бурганның хөлегезинде дыштанып турар болзуңза,

²Дээрги-Чаяакчыга: «Бурганым, Сен мээң хоргадалым сен, быжыг шивээм сен, мен Сеңээ идегээр мен» — деп чугаалаар сен.

³Ол сени аңчының дузаандан чайладып, өлүмнүг аарыгдан камгалаар,

⁴Бодунуң чалгыннары-биле шуглап аар, Ооң чүглериниң адаанга чаштына бээр сен; Ооң шынчы чоруу сеңээ камгалалдың куяк хеви дег болур.

⁵Дүне — коргунчуг айыылдардан, хүндүс — ужуп чоруур согундан кортпас сен.

⁶Дүмбей караңгыда кедеңгирлээн халдавырлыг аарыгдан, дал дүъште алгаш баар хамчык аарыгдан кортпас сен.

⁷Муң кижи сээң чаныңга, түмен кижи оң талаңга кырлып каар-даа болза, сенче ол бүгү аарыг-човалаң халдавас.

⁸Чүгле ийи карааң-биле көөр сен — бузуттугларның кеземче алганын көөр сен.

⁹«Дээрги-Чаяакчы — мээң хоргадалым» — деп чугаалаан болгай сен, Дээди Өрүкүнү бодуңга шивээ кылдыр шилип алган болгай сен.

¹⁰Бак чүве сеңээ хора чедирбес, айыыл-халап сээң аал-ораныңче чоокшулавас.

¹¹Ол сени шупту оруктарыңга камгалаар кылдыр Бодунуң төлээлеринге чагып каар,

¹²олар сени, будуң дашка тептикпезин дээш, холдары-биле көдүрүп аарлар.

¹³Араатан биле чыланны базар сен, арзылаң биле хоран дылдыг чыланны таптаар сен.

¹⁴Бурган мынча дээн: «Ол кижи меңээ ынак-тыр, ынчангаш ону кадагалаар мен; ол Мээң адымны хүндүлеп билип алган боорга, ону айыылдан адырар мен.

¹⁵Мени кый дээрге, аңаа харыылаар мен; ол айыыл-халапка алзып аарга, ооң чанынга турар мен, ону камгалап, алдаржыдар мен.

¹⁶Узун назынны аңаа пөктүр хайырлап, камгалалымны көргүзер мен».