Read Ыдыктыг Библия, 2011 Притчи 12 Bible Online

Притчи 12 - Ыдыктыг Библия, 2011 bible

Притчи 12

¹Эртем-билигге ынак кижи чагыг-сургаалга база ынак, а чемелээшкинни көөр хөңнү чок кижи мириттели бээр.

²Буянныг кижи Дээрги-Чаяакчының сеткилинге кирер, а кара сагыштыг кижи Аңаа буруу шаптырар.

³Кижи бузуттуу-биле быжыг туруш чок, а чөптүг-шынныг кижи чайгылыш чок дазыл-дөстүг.

⁴Бүдүштүг кадай — ашаанга ат-алдар дег, а бужар кадай — ооң сөөк-даяан иридер аарыг дег.

⁵Чөптүг-шынныг кижиниң бодалында — чөптүг чорук, а бузуттуг кижиниң угаанында — кара сагыш.

⁶Бузуттуг улустуң чугаа-сөзүнүң артында хан төгүксээн күзел чаштынган, а чөптүг-шынныг улусту аас-сөзү камгалаар.

⁷Бузуттуг улус буураарга, олардан чүү-даа артпас, а чөптүг-шынныг улустуң оран-савазы быжыг туруштуг.

⁸Кижини угаанныг чугаа-сөзү алдаржыдар, а кем-буруулуг бодалдары — бужартадыр.

⁹Адыыргап чорааш, аъш-чем чок артарынга көөрде, ат-сураг чок чорааш, чалчалыг боору [9] дээре.

¹⁰Чөптүг-шынныг кижи мал-маганынга-даа чүү херегин билир, а бузуттуг улустуң хайыралаан сагыжы безин каржы-дошкун.

¹¹Черин болбаазыраткан кижиниң хырны тодуг, а хоозун күзел-бодал сүрген кижиниң угааны четпес.

¹²Бузуттуг кижи улусту кара сагыжының какпазынга тудуп аарын бодаар, а чөптүг-шынныг улустуң дазылындан өзүмнер үнер.

¹³Бузуттуг кижи меге чүве чугаалааш, туттуруп аар, а чөптүг-шынныг кижи айыылдан чайлаар.

¹⁴Кижи бодунуң чугаа-сөзүнүң буянныг дүжүдүн ажаап аар, ооң кылган күш-ажылы шаңнал бооп, орнун эгидер.

¹⁵Тенек кижи бодунуң оруун шын деп бодаар, а мерген угаанныг кижи арга-сүмени дыңнаар.

¹⁶Тенек кижи бодунуң килеңин улус мурнунга доп-дораан көргүзер [10], а кажараан кижи дорамчылалды дыңнаваан бооп, эрттирип каар.

¹⁷Шынны чугаалаан кижи — чөптүг херечи-дир, а мегелеп херечилээр кижи кара сагыжын чугаалаар.

¹⁸Хоозун чугаа хылыш ышкаш балыглап боор, а мерген угаанныг улустуң аас-сөзү — экиртир шынарлыг.

¹⁹Шынныг сөстер — кезээ мөңгеде артар, а мегечи дыл — хензиг өйде артар.

²⁰Өзү кара улустуң чүрээнде — кара сагыш, а тайбың тарыкчыларының чүрээнде — өөрүшкү бар.

²¹Чөптүг-шынныг кижи-биле кандыг-даа бак чүве болбас, а бузуттуг улусту бажын ажыр айыыл бүргээн болур.

²²Мегечи кижиниң аас-сөзү — Дээрги-Чаяакчыга бужар чүүл, а шынын чугаалаар улус Ооң сеткилинге кирер.

²³Кажараан кижи бодунуң билиин чажырар, а мелегей улус бодунуң мелегейин көзүлдүр делгээр.

²⁴Кызымак улустуң холу — улусту чагырар, а чалгаа холду албадап ажылдадыр.

²⁵Сагышсырал кижиниң чүрээн шагзырадыр, а эки сөс — хөгледир.

²⁶Чөптүг-шынныг кижи эжинге шын орук айтыр, а бузуттуг улустуң оруктары оларны астырар.

²⁷Чалгаа кижи олча-тывыш чок артар, а кызымак кижи бай-шыдалдыг чурттаар.

²⁸Кижини чөптүг оруу амыдыралче аппаар, ооң чедире бээр черинде өлүм турбас.