Read Ыдыктыг Библия, 2011 Притчи 15 Bible Online

Притчи 15 - Ыдыктыг Библия, 2011 bible

Притчи 15

¹Эптиг-ээлдек харыы килеңни чайладыр, а доңгун сөс — хайныктырар.

²Мерген угаанныгларның аксы-сөзү билигни экизинер, а мелегейлерниң аас-дылы чүгле мелегей чүүлдер чулчуруур.

³Дээрги-Чаяакчының караа көрбес чүве чок — бузуттуг-даа, буянныг-даа улусту көрүп турар.

⁴Буянныг чугаа — амыдыралдың ыяжы-дыр, а меге чугаа — сеткил-сагышты муңгарадыр.

⁵Мелегей кижи ачазының эдип-чазаан сургаалын херекке албас, а чемелээшкинни тооп дыңнаар кижи угаан кирер.

⁶Чөптүг кижиниң бажыңында эртине-байлак хөй, а бузуттуг кижиниң ажык-кончаазы аңаа хора чедирер.

⁷Мерген угаанныгларның аксы-сөзү билиг нептередир, а мелегей улустуң чүрээ шынчы эвес болур.

⁸Бузуттуг улустуң өргүлдери Дээрги-Чаяакчыга бужар чүүл болур, а эки мөзүлүг улустуң мөргүлдери Аңаа таарымчалыг.

⁹Бузуттуг кижиниң оруу Дээрги-Чаяакчыга бужар чүүл болур, а чөптүг чорукту дилеп чоруур кижиге Ол ынак.

¹⁰Шын оруктан соора барган кижи кадыг-дошкун кеземче алыр, а чемелээшкинни көөр хөңнү чок кижи өлүп каар.

¹¹Тамы биле Өлүм безин Дээрги-Чаяакчыга көскү, а кижилерниң чүректери оон-даа ажык!

¹²Кочуургак кижи ону чемелеп турар кижиге хөңнү чок база мерген угаанныг улус аразынга туруксавас.

¹³Чүрек өөрүп турда, арын-шырай чырый бээр, а муңгаргай чүрек сагыш-хөөннү ундарадыр.

¹⁴Угаанныг кижи билиг сүрер, а мугулай улустуң аъш-чеми — мелегей чүүлдер болур.

¹⁵Ядыы кижи кезээде човалаңга туттурар, а аас-кежиктиг кижи үргүлчү байырлаар.

¹⁶Эңдерик эртине-байлак чыып алгаш, коргуп-дүвүреп чурттаарынга көөрде, хөй эвес олчалыг, Дээрги-Чаяакчыдан коргуп чурттааны дээре.

¹⁷Сени көрбес улустуң белеткээни семис шары эъди чииринге көөрде, сеңээ ынак улустуң белеткээни ногаа чигени дээре.

¹⁸Килеңнээчел кижи алгыш-кырыш өөскүдер, а белен-селен ажынмас кижи адааннажыышкынның когун үзер.

¹⁹Чалгаа кижиниң оруунда тенниг-хараган үнген, а эки мөзүлүг улус дески оруктап бар чыдар.

²⁰Мерген угаанныг оол ачазын өөртүр, а мелегей кижи авазын бак көөр.

²¹Угааны четпес кижини ооң мелегей чоруу өөртүр, а угаанныг кижи дорт оруктап бар чыдар.

²²Арга-сүме чок болза, кылыр дээн чүве чогувас, а сүмелекчилер көвей болза, боттаны бээр.

²³Харыылаптар аас-сөзүң бар болза, өөрүнчүг-ле, чогуур үезинде сөглээн сөс эки-ле!

²⁴Угаанныг кижи алдыы орандан чайлаар дээш, амыдыралче аппаар орукка бедиктер тевер.

²⁵Дээрги-Чаяакчы адыыргак улустуң аалдарын аңдара соп кааптар, а дулгуяк херээженниң хувааглыг черин кадагалаар.

²⁶Дээрги-Чаяакчыга бузуттуг бодалдар бужар чүүл болур, а буянныг сөстер Ооң мурнунга арыг.

²⁷Чазый-чилби кижи бодунуң аалынга айыыл халдадыр, а хээлиге хөңнү чок кижи амылыг артар.

²⁸Чөптүг-шынныг кижиниң чүрээ чүнү харыылаарын бодап алыр, а бузуттуг улустуң аас-дылы бачыт чулчуруур.

²⁹Дээрги-Чаяакчы бузуттуг улустан ыракта, а чөптүг-шынныг улустуң мөргүлүн дыңнап турар.

³⁰Чырык көрүш чүректи өөртүр, эки медээ кижиниң ишти-хөңнүн быжыглаар.

³¹Амыдыралга чедире бээр чемелээшкинни дыңнаар кижи мерген угаанныглар аразындан үнмес.

³²Эдип-чазаан сургаалды хүлээвес кижи бодунга хора халдадыр, а чемелээшкинни дыңнаар кижи угаан кирер.

³³Дээрги-Чаяакчыдан коргары мерген угаанга өөредир; биче сеткил алдарны мурнап чоруур.