Read Ыдыктыг Библия, 2011 Притчи 17 Bible Online

Притчи 17 - Ыдыктыг Библия, 2011 bible

Притчи 17

¹Мага хандыр дойлап-даа тургаш, алгыжып-кыржыр аалга көөрде, када берген хлеб карты-даа чип оргаш, амыр-тайбың чорааны дээре.

²Угаанныг чалча дээргизиниң ыят чок оглун чагырар база өнчүнү ол оолдуң акы-дуңмазы-биле үлежир.

³Мөңгүн биле алдын хайылдырар суугуга эстир, а улустуң чүректерин Дээрги-Чаяакчы шенээр.

⁴Бак кижи бузуттуг чугаалар дыңнаар, авыяас кижи хоралыг чугааларже кичээнгей салыр.

⁵Түремикти дорамчылап турар кижи ооң Чаяакчызын бак сөглээни ол, өске кижиниң түрегделин көргеш, амыраар кижи — кеземчеден чайлавас.

⁶Кырганнарның шаңналы — үре-салгалы, а ажы-төлдүң ат-алдары — ада-иези.

⁷Мелегей кижиниң аксынга төлептиг чугаа эптешпес, бүдүштүг кижиниң аксынга меге чугаа оон артык эптешпес.

⁸Хээли берип турар кижиге хээлизи — илбилиг даш дег: кайнаар-даа сунуп чедерге, чедиишкинниг болур.

⁹Хомудалын уттуп аар кижи найыралче чүткээни ол, а бак чаңнатканын утпас кижи эжинден чарылганы ол.

¹⁰Мелегей кижини чүс катап шанчарынга көөрде, угаанныг кижини чаңгыс катап чемелеп каары оранчок дээштиг.

¹¹Бузуттуг-бак кижи чүгле үймээн үндүреринче чүткүүр, ынчангаш Дээрги-Чаяакчы каржы-дошкун төлээзин олче чорудуптар.

¹²Сээдең чоруу кедерээн мелегей кижиге ужуражырынга көөрде, ажы-төлүн чидирген кыс адыгга таварышканы дээре.

¹³Буянны бузут-биле харыылаар кижиниң аалындан бузут ыравас.

¹⁴Алгыш-кырыштың эгези сугнуң чалды деже шавары дег, ынчангаш өжээн өөскүвээнде, соксадып каг.

¹⁵Бузуттуг хейни агартыры, кем-буруу чок кижини шиидери — кайызы-даа Дээрги-Чаяакчыга бужар чүүлдер-дир.

¹⁶Мелегей кижиниң угаан садып алыр дээш, акша туткан херээ чүл? Ооң угаап билиптер харыы бар эвес.

¹⁷Эжиң сеңээ кандыг-даа үелерде ынак болур; ха-дуңмаң айыыл-халап үезинде дузалаар дээш төрүттүнер.

¹⁸Сарыыл чок кижи хол тутчуп, өске кижи дээш дагдынар.

¹⁹Алгыш-кырышка ынак кижи бачытка ынак; бодун өрү көрдүнер кижи буураашкынче чүткээни ол.

²⁰Мегечи чүрек буян көрбес, авыяас дыл айыыл халдадыр.

²¹Мелегей ажы-төлдүг кижи муңгарал чедип алганы ол: оглу мелегей боорга, ачазы өөрүвес-ле болгай.

²²Өөрүп чоруур чүрек — эки дээн эм, а ундаргай сеткил мага-ботту харыксырадыр.

²³Бузуттуг кижи чөптүг шииткелди хажыдар дээш улустан бүдүү хээли алыр.

²⁴Угаангыр көрүш — мерген угаанче, а мелегей кижиниң көрүжү — черниң бүгү кыдыгларынче шиглей көөр.

²⁵Мелегей оолдуг боору — ачазынга харааданчыг, авазынга хомуданчыг.

²⁶Актыг кижини кезедири-даа, бүдүштүг кижини чөптүг-шынныг чоруу дээш эриидээри-даа — бак херек-тир.

²⁷Билиг чедип алган кижи кевин-херекчок чүве чугаалавас; угаанныг кижи хорадаачал эвес болур.

²⁸Ыыттавас-ла болза, мелегей кижи безин мерген угаанныг кылдыр көстүр; аксын хаап алыр болза — сарыылдыг кылдыр сагындырар.