Read Ыдыктыг Библия, 2011 Притчи 19 Bible Online

Притчи 19 - Ыдыктыг Библия, 2011 bible

Притчи 19

¹Кем-буруу кылбайн амыдырап чоруур ядыы кижи мелегей мегечиден дээре.

²Билиг чокта, күзел-чүткүл эки болбас, далашкан буттар бачытче базар.

³Кижини оруундан бодунуң мелегей чоруу астырар, а ооң чүрээ Дээрги-Чаяакчыга хорадаар.

⁴Бай-шыдалдыг кижиге эш-өөр муңчок, а ядыы кижини эш-өөрү каапкаш баар.

⁵Мегелеп херечилээр кижи кеземчеден чайлап шыдавас; аксындан меге дүжүрбес кижи камгалал албас.

⁶Ызыгуурлуг кижилерге чашпаалаар улус-ла хөй, белек сунар кижи-биле шупту улус найыралдажыр.

⁷Ядыы кижини ха-дуңмазы безин көөр хөңнү чок, оон туржук эш-өөрү дескелээр: ол чугаалажыр дээш далажып баарга, олар арлы берген боор.

⁸Бодунга ынак кижи угаан дилээр: сарыылдыг чурттап чорааш, ачылыг чүүлдү тып алыр.

⁹Мегелеп херечилээр кижи кеземчеден чайлап шыдавас, аксындан меге дүжүрбес кижи өлүп каар

¹⁰Мелегей кижиниң каас-коя чурттаары, кул кижиниң нояннарны чагырары ужурга таарышпас.

¹¹Мерген угаанныг кижи белен-селен ажынмас; ат-алдар — буруулуг херектерни өршээринде.

¹²Хаанның килеңи — арзылаң ырланганы дег, а ээ көрүүшкүнү — оът-сигенде чаъс-шалың дег.

¹³Мелегей оол — ачазынга буураашкын; хыйланчак кадай — дамдылаар ойбак-дыдык дээвиир дег.

¹⁴Бажың-балгат биле байлакшыл — адалардан келген өнчү, а угаангыр кадай — Дээрги-Чаяакчыдан келген белек.

¹⁵Чалгаа чорук кижини уйгу хавы кылып каар, а салгаа чорук — аштадыр.

¹⁶Чагыгны кадагалаар кижи амы-тынын кадагалап аар, а оруктарын ылгап шыдавас кижи өлүп каар.

¹⁷Ядамыкка хайырлал бээр кижи Дээрги-Чаяакчыга чээли кылганы ол; Дээрги-Чаяакчы аңаа ачы-дузазы дээш шаңналын бээр.

¹⁸Идегел бар турда, оглуңну кижизит; ону чок кылып алдың халак [24].

¹⁹Хорадаачал кижи торгаал төлезин, ону бир удаа амдажыдар болзуңза, ам-даа кезедир апаар сен.

²⁰Арга-сүмени дыңна, сургаалды хүлээп ал, ынчан алызы барып мерген угаанныг апаар сен.

²¹Кижиниң чүрээнде бодал-ла хөй, ынчалза-даа кайызының чогуп бүдери Дээрги-Чаяакчының шиитпиринден хамааржыр.

²²Улус аразында шынчы чорук үнеледир [25]; ядыы кижи мегечи кижиден дээре.

²³Дээрги-Чаяакчыдан коргары амыдыралче орук изээр; ынчаар кылып турар кижи айыыл-халапка алыспайн, дыштыг удуур.

²⁴Чалгаа кижи холу-биле тавакта чемни ап алза-даа, аксынга чедирбес.

²⁵Кочуургак кижини кезедир болзуңза, кенен улус боданы бээр, а угаанныг кижини чемелээр болзуңза, ооң угааны улгадыр.

²⁶Оглу ачазын хоозурадыр болза, авазын үндүр сывырар болза, ыянчыг, бужар кижи болур.

²⁷Оглум! Сургаалды дыңнавас болзуңза, угаангыр сөстер чогундан сотка орар сен.

²⁸Дүржок херечи шынныг шииткелди дорамчылап кочулаар; кем-буруу — бузуттуг улустуң сыырар аъш-чеми дег.

²⁹Кочуургак кижи — шииткелден, мелегей кижиниң ооргазы — шыкпыыштан чайлавас.