Read Ыдыктыг Библия, 2011 Притчи 22 Bible Online

Притчи 22 - Ыдыктыг Библия, 2011 bible

Притчи 22

¹Эки ат-сураг байлакшылдан күзенчиг; улуска эки көрдүрери алдын биле мөңгүнден дээре.

²Бай болгаш ядыы кижини дөмей болдуруп турар чүүл бо-дур: оларның иелдирзин Дээрги-Чаяакчы чаяаган болгай.

³Угаанныг кижи айыыл көргеш, чашты бээр, а кенен улус олче уткуштур баргаш, кеземче алыр.

⁴Биче сеткилдиг болза база Дээрги-Чаяакчыдан коргуп чоруур болза, байлакшыл, алдар-хүндү база узун назын чедип кээр.

⁵Бак кижиниң оруунда — теннер биле дузактар бар, амы-тынын кадагалаар кижи ынаар барбас.

⁶Аныяк оолду шын орукче эң эгезинде үндүрүп каг — кырый-даа бергеш, оон өскээр барбас.

⁷Бай кижи ядыыларны чагырар, а өрелиг кижи чээли кылган кижиниң кулу апаар.

⁸Чөптүг эвес чорук тарыыр кижи айыылды ажаап алыр, ооң дарлалының килеңи узуткаттырар.

⁹Экииргек кижи алгыш-йөрээл дыңнаар, чүге дээрге ядыы кижи-биле аъш-чемин үлежип турар-дыр.

¹⁰Кочуургак кижини сывырып чорудуптарга, алгыш-кырыш арлып чидер, чаргы-чаалы болгаш аас-дыл соксай бээр.

¹¹Чүректиң арыынга ынак база аас-сөзү чаагай кижи хаанга чоок апаар [27].

¹²Дээрги-Чаяакчы билигни чүүлзүнүп, кадагалаар, кара сагыштыг кижиниң сөстерин буруу шавар.

¹³Чалгаа кижи мынча дээр: «Даштын арзылаң тур, бажыңдан үнер-ле болзумза, өлгеним ол!»

¹⁴Өске кижи кадайының аас-сөзү — ханы хооргал-ла, Дээрги-Чаяакчыга каргаттырган кижи ынаар кээп дүжер.

¹⁵Аныяк оолдуң медерелин тенек чорук ээлээн болур, шыкпыыш-биле кижизидилге ону үндүр сывырыптар.

¹⁶Ажык-кончаа сүргеш, ядамыкты дарлаары-даа, бай кижиге белек бээри-даа кижини каражага таварыштырар.

¹⁷Кулааң ээктиргеш, мерген угаанныгларның сөстерин дыңна, мээң билир чүвемни тооп дыңна:

¹⁸бо сөстерни чүрээңге шыгжап чоруур болзуңза, сеңээ тааланчыг болур, олар кезээде сээң аксыңдан дүшпезин;

¹⁹Дээрги-Чаяакчыга идегеп чорзун дээш, мен бөгүн сени оларга өөредип турарым бо.

²⁰Мен сеңээ үжен мерген бодалды [28] бижип бердим, арга-сүме биле билигни тып алыр сен.

²¹Олар сени алыс шынның сөстеринге өөредип каар, ынчан сени башкарып турар улуска харыы тудуп шыдаар сен.

²²Ядыы-ла кижи-дир дээш, ядамыкты үптеп-тонава, түреңги диленчини шииткел черинге хомудатпа,

²³чүге дээрге Дээрги-Чаяакчы оларның чаргызын үзер, оларны түреткен кижиниң амы-тынын алгаш баар.

²⁴Килеңнээчел кижи-биле өңнүктешпе, кылыктыг кижи-биле эдеришпе,

²⁵оон башка оларның изин истээш, бодуңга-ла ая-дузак салып аар сен.

²⁶Өске кижиниң өре-ширези дээш дагдынып, улус-биле хол тудушпайн көр;

²⁷сээң төлеп бээр чүвең чок апаар болза, чыдар дөжээңни безин хунаап алыр болгай.

²⁸Ада-өгбелерниң шаг шаанда тургузуп кааны хувааглыг чер демдеглээр чагыны шимчетпе.

²⁹Бодунуң ажыл-херээнге мергежээн кижини көрген сен бе? Ол карачал улуска эвес, а хааннарга бараан болур.