Read Ыдыктыг Библия, 2011 Притчи 25 Bible Online

Притчи 25 - Ыдыктыг Библия, 2011 bible

Притчи 25

¹Соломоннуң оон өске угаадыглыг чугаалары бо-дур. Оларны Иудеяның хааны Эзекияның бижээчилери чыып тургускан.

²Бурганның алдары — чажыт чүүлдү ажытпазында, хаанның алдары — чажыт чүүлдү билип аарында.

³Дээрниң бедиин, черниң ханызын база хаанның чүрээн билип аары болдунмас.

⁴Мөңгүнден холуксааны аңгылап каавыт, ынчан ус-шевер кижи саваны кылыптар;

⁵хаандан бузуттуг кижини адырып каавыт, ынчан хаанның дүжүлгези чөптүг чоруу-биле быжыг апаар.

⁶Хаанның мурнунга көөргеттинме, нояннар-биле чаңгыс черге турба;

⁷хаанның сени ызыгуурлуг кижи мурнунга куду көөрүнүң орнунга, сеңээ: «Дөрже олуруп көр» — деп чугаалаары дээре. Карааң-биле көрген [31] чүвеңни

⁸чаргы чарар черже үндүреринче далашпа, оон башка алызында барып, бир-ле кижи адыңны баксырадыр болза, канчаар сен?

⁹Чаргылдажып тура, чүгле бодуңнуң херээңни чугаала, өске кижиниң чажыдын ажытпа.

¹⁰А чажытты чугаалапсыңза, дыңнаан кижи бодуңну чемелээр, ынчан бак атка кирериң чайлаш чок.

¹¹Чогуур үезинде сөглээн сөс — мөңгүн каасталгада алдын угулза дег.

¹²Дыыжы кулакка мерген угаанныг чемелээшкин — алдын сырга болгаш арыг алдындан каасталга ышкаш.

¹³Айбылаан ээзинге шынчы айбычы, дүжүт ажаар үеде сериин салгын дег, ээзиниң күчү-күжүн немеп бээр.

¹⁴Хей черге белектер аазаар кижи — булуттар биле хат турда-ла, чаъстың чагбайн барганы дег.

¹⁵Килеңнээчел эвес чоруктуң ачызында чагырыкчыны безин ээлдирип ап болур, чымчак чугаа-сөс сөөктү безин үреп бузар.

¹⁶Ары чигири тып алзыңза, чеже херегил, ынчаны чиир сен, оон башка пөктүр чипкеш, кузуп аар сен;

¹⁷эжиңниң бажыңынче үргүлчү маңнап, амыратпайн туруп бербе, оон башка ол сенден хөңнү калып, көрбестей бээр.

¹⁸Өске кижиге удур мегелеп херечилээр кижи — моң, хылыш болгаш чидиг согун бажы ышкаш.

¹⁹Сөзүнге шынчы эвес кижиге айыыл хүнүнде идегээри — ирий берген диш азы аскак бут ышкаш.

²⁰Ажыг-шүжүглүг кижиге ыр ырлап бээри — соок хүндүс хевин уштуп октаары, балыг черже ажыг уксус кудары ышкаш [32].

²¹Дайзының аштаан болза — чемгерип каг; суксаан болза — сугдан ижиртип каг:

²²ынчаар кылгаш, оттуг көстерни ооң бажынга чыып бээр сен [33], а Дээрги-Чаяакчы сени шаңнаар.

²³Соңгу чүктен хадаан хат — чаъс-чайыкты, а хопчу кижиниң аас-дылы — ажынган көрүштерни эккээр.

²⁴Хыйланчак кадай-биле чаңгыс черге чурттаарынга көөрде, оон озалааш үгекке чурттааны дээре.

²⁵Ырак черден келген эки медээ — кагып-суксааш, харыксыраан кижиге соок суг ышкаш.

²⁶Бузуттуг кижиге дүжүп берген чөптүг-шынныг кижи — хирленген булак, бужартаан суг бажы ышкаш.

²⁷Ары чигирин идээледир чиири-даа, ат-алдарны хөлүн эрттир сүрери-даа — багай херек-тир.

²⁸Бодун туттунуп шыдавас кижи — үрегдеп бузуп каан, ханазы чок хоорай ышкаш.