Read Ыдыктыг Библия, 2011 Притчи 26 Bible Online

Притчи 26 - Ыдыктыг Библия, 2011 bible

Притчи 26

¹Чайга — хар, а дүжүт ажаар үеге — чаъс ышкаш, мелегей кижиге алдар-хүндү таарышпас.

²Бора-хөкпештиң ыңай-бээр ужары база хараачыгайның шивеш кынныры ышкаш, хей черге келген каргыш боттанмас.

³Кымчы — аътка, чүген — элчигенге, а шыкпыыш — мелегей кижиниң ооргазынга херек.

⁴Мелегей кижиге мелегей харыы бербе, оон башка ол кижи ышкаш апаар сен.

⁵Мелегей кижиге мелегей харыыдан бер, оон башка бодун мерген угаанныг кылдыр бодай бээр.

⁶Мелегей кижиге сөс чедирткен кижи боду-ла буттарын одура шапкан азы бактың дашказын ишкен кижи дег.

⁷Мелегей кижиниң аксында угаадыглыг чугаа — аскак кижиниң буттарының кылажы дег.

⁸Мелегей кижиге алдар-хүндү көргүзери — дашты ону шывадаар чепсек-херекселге баглаары дег.

⁹Мелегей кижиниң аксында угаадыглыг чугаа — эзирик кижиниң тенниг чадаң ыяштан халбактанганы дег.

¹⁰Мелегей ийикпе, азы душкан-на кижини ажылга хөлезилеп алыр кижи — шупту улусту балыглаар ча адыгжызы дег.

¹¹Мелегей кижи бодунуң мелегей чоруун катаптаанда, кускузунче дедир ээп келгеш, чип аар ыт дег.

¹²Бодун мерген угаанныг кылдыр тогдунар кижини көрген сен бе? Аңаа бодаарга, мелегей кижиге безин идегээри дээре болдур ийин.

¹³Чалгаа кижи: «Орукта арзылаң тур! Кудумчуларда араатан аң димзенип чор!» — дээр.

¹⁴Чалгаа кижиниң дөжээнге аңдарлып-дүңдерлири — эжиктиң шүнчүктерге халаңнаары дег.

¹⁵Чалгаа кижи холу-биле тавакта чемни ап алза-даа, ону аксынга чедирип чадай бээр.

¹⁶Чалгаа кижи бодун сарыылдыг чүүлдер чугаалаан чеди кижиден мерген угаанныг деп бодаар.

¹⁷Чай кадында өске улустуң алгыш-кырыжынга киржири — черлик ыттың кулаан шеле тыртары дег.

¹⁸[18-19] Өске кижини мегелепкеш: «Баштактандым ышкажыл!» — дээр кижи тенек аарыг кижиниң оттуг болгаш өлүмнүг согуннарны октап турары дег.

²⁰Ыяш төнерге, от өжүп каар, а хопчу кижи чокта, алгыш-кырыш соксай бээр.

²¹Хөмүрден — көс, ыяштан — от, а нүгүлчү кижиниң чугаа-сөзүнден — адааннажыышкын үнер.

²²Хопчу кижиниң чугаа-сөзү амданныг чем дег — кижиниң ишти-хөңнүнүң эң ханызынче кире бээр.

²³Кара сагыштыг кижиниң чымчак аас-сөзү — даштын холуксаалыг мөңгүн-биле чайырлап каан дой сава дег.

²⁴Дайзыныңның чугаазы авыяастыг, ооң сеткилинде кара сагыш шыгжаттынып чыдар;

²⁵үнү чымчак-даа болза, аңаа бүзүреве, ооң чүрээн бужар чүүл долган болдур ийин;

²⁶ооң авыяас чоруу сени көрбезин чажырып турар, ынчалза-даа каржы-багы улус мурнунга ажыттынып кээр.

²⁷Оңгар каскан кижи боду ынаар кээп дүжер, кижиниң өрү октаан дажы тейинге кээп дүжер.

²⁸Мегечи кижи хомудадып турар улузун көөр хөңнү чок база авыяас аас-дыл буураашкынны белеткеп турар.