Read Ыдыктыг Библия, 2011 Притчи 29 Bible Online

Притчи 29 - Ыдыктыг Библия, 2011 bible

Притчи 29

¹Чемелеткеш, чөрүүлээр кижи хеп-хенертен эглиш чок узуткаттырар.

²Чөптүг улус депшиирге, чон өөрүп-хөглээр, а бузуттуг кижи тергиидээрге, чон хинчектенир.

³Мерген угаанга ынак кижи ачазын өөртүп турар, а самыын-садар херээженнер-биле эдержир кижи эт-хөреңгизин чарыгдап турар.

⁴Хаанның чөптүг шииткели чуртту быжыктырар, а ажык-кончаа сүрер чорук — хоозурадыр.

⁵Өске кижиге чашпаалап турар кижи ооң буттарынга какпа салып турар.

⁶Бузуттуг кижиниң бачыды — бодунга дузак, а чөптүг-шынныг кижи өөрүп-байырлап чурттаар.

⁷Чөптүг кижи ядамыктың эргелерин утпайн чоруур, а бузуттуг кижи ол дугайында бодавас.

⁸Кочуургак улус хоорайга хөлзээзин үндүрер, а мерген угаанныг улус килеңни оожургадыр.

⁹Мерген угаанныг кижи мелегей кижи-биле чаргылдажып турда, каткы-шоот-даа, дорамчылаашкын-даа төнмес.

¹⁰Өлүрүкчүлер кем-буруу чок кижини көөр хөңнү чок, эки мөзүлүг кижини база узуткаарын бодаар.

¹¹Мелегей кижи килеңин белени кончуг сула салыптар, а мерген угаанныг кижи — оожургадып аар.

¹²Бир эвес чагырыкчы кижи меге чугаа-сөс тооп дыңнаар болза, ооң бүгү дүжүметтери бузуттуг болур.

¹³Ядыы кижи биле ооң дарлакчызын дөмей болдуруп турар чүүл бо-дур: оларның иелдирзиниң карактарында чырык Дээрги-Чаяакчыдан келген.

¹⁴Бир эвес хаан кижи ядыы улусту шын шиидип турар болза, ооң дүжүлгези кезээде тендиш дивейн турар.

¹⁵Шыкпыыштап чемелээрге, мерген угаан кээр, а карактавайн каапкан оол авазын бак атка киирер.

¹⁶Бузуттуг улус депшиирге, бачыт база кедерей бээр, ынчалза-даа чөптүг-шынныг улус оларның буураарын көрүп каар.

¹⁷Оглуңну эдип-чаза, ынчан ол дээш сагыжың дыш болур, ол сээң сеткилиңге таалалды шаңнаар.

¹⁸Бургандан кээр ажыдыышкыннар чок болза, чон калчаарап баар, а ыдыктыг хоойлуну сагып турар кижи амыр-чыргалдыг!

¹⁹Кул кижини чүгле сөстер-биле эдип-чазаары болдунмас, оларны билип-даа турар болза, оозун эскертпес.

²⁰Бодамча чок чүве чугаалаар кижи көрген сен бе? Аңаа бодаарга, мелегей кижиге безин идегээри дээре болдур ийин.

²¹Кул кижини чажындан-на туразында салыр болза, оон эки чүве үнмес [36].

²²Килеңнээчел кижи алгыш-кырыш үндүрер, ажынчак кижи хөй бачыт үүлгедир.

²³Улуг туралыг кижи куду көрдүрер, а биче сеткилдиг кижи алдар-хүндү чедип алыр.

²⁴Оор-биле эштежир кижи бодунуң амы-тынын үнелевейн турары ол: оорга каргыш салганын дыңнап турза-даа, сөс оскунмас.

²⁵Улустан коргар кижи дузакче кире бергени ол, а Дээрги-Чаяакчыга идегээр кижиге айыылдыг чүү-даа чок.

²⁶Хөй-ле улус чагырыкчыга чашпаалаар, ынчалза-даа чөптүг шииткел кижиге Дээрги-Чаяакчыдан кээр.

²⁷Чөптүг-шынныг улуска бак кижи — бужар чүүл, а бузуттуг улуска эки мөзүлүг кижи — бужар чүүл.