Read Ыдыктыг Библия, 2011 Притчи 30 Bible Online

Притчи 30 - Ыдыктыг Библия, 2011 bible

Притчи 30

¹Иакейниң оглу, Масса чурттуг [37] Агурнуң сөстери бо-дур. Ол кижи Ифиилге, Ифиил биле Укалга [38] мынча дээн:

²Мен дээрге улус аразында эң бүдүүлүк кижи бооп турарым чөп боор, кижилерде бар угаан-даа менде кайда боор.

³Мерген угаанга өөренип албаан мен, ыдыктыг Бурган дугайында [39] билиг менде бар бе?

⁴Кым дээрже көдүрлүп үнгеш, дедир бадып келгенил? Кым адыжынга хатты тудуп алганыл? Кым шывыгга сугну ораап алганыл? Кым черниң кыдыг-кызыгаарын өйлей хемчээп, доктаатканыл? Ындыг кижиниң ады кымыл? Ооң оглунуң ады кымыл? Билир боор сен аа?

⁵Бурганның чугаалаан сөс бүрүзү-ле — арыг-шын; Ол — Аңаа идегээр улустуң мурнунга турар камгалалы.

⁶Ооң сөстеринге чүнү-даа немеве, оон башка Ол сени сойгалаарга, мегең туттурар.

⁷Ийи-ле чүүлдү Сенден дилеп тур мен, дириг чорумда, оларны боттандырып бээринден ойталавайн көр:

⁸хоозун, меге сөстү менден ырадып каавыт; мени ядаратпа-даа, байытпа-даа, чүгле меңээ херек аъш-чемни берип чор.

⁹А оон башка эрттир тода бергеш, Сенден ойталап: «Дээрги-Чаяакчы дээрге кымыл ол?» — деп айтыра бээр мен азы ядарай бергеш, оорланып, Бурганны бак атка киирер мен.

¹⁰Чалча кижини дээргизиниң мурнунга нүгүлдеве, оон башка ооң каргыжы сеңээ дүжүп, буруудаар сен.

¹¹Ачазынга каргыш салыр, авазын алгап-йөрээвес улус турар;

¹²боттарын арыг деп бодаар хирезинде, мыяанга боражып алган улус турар;

¹³турамык көрүштүг, улуургак улус турар;

¹⁴диштери бижектер дег, азыглары хылыштар дег, ядыы улусту чер кырынга арттырбайн, эң түреңги улусту чон аразынга арттырбайн, узуткап-сыырарын бодаар улус турар.

¹⁵Хан сорар курт ийи уруглуг, олар: «Эккел, эккел!» — дижир. Кажан-даа тотпас үш чүүл бар, дөрткү чүүл база «Болзун» дивес:

¹⁶өлүглер ораны, үре-төл чок хырын, суггарарга-даа, суксуну ханмас чер болгаш кажан-даа «Болзун» дивес от.

¹⁷Ачазын шоодар болгаш авазын дыңнаар хөңнү чок кижиниң карактарын кускун-сааскан соктап чиптер база сек чиир куштар дойлап кааптар.

¹⁸Меңээ билип алыры берге үш чүүл бар, дөрткү чүүлдү база билип шыдавас-тыр мен:

¹⁹дээрде ушкан эзирниң оруу, хаяда сойган чыланның оруу, далайда эжиндирген корабльдың оруу, аныяк кысче эр кижиниң оруу.

²⁰Ашаанга өскерилген херээженниң оруу мындыг: чемненип алгаш, аксын чоткаш: «Багай чүү-даа чүве кылбаан мен» — дээр.

²¹Черни хөлзедип-шимчедип турар үш чүүл бар, дөрткү чүүлдүң аарын чер ууп шыдавас:

²²хаан апарган кул кижи, тоттур чемненип турар мелегей кижи,

²³ашакка барып алган бужар херээжен болгаш дээргизиниң кадайының орнун ээлээн чалча кыс.

²⁴Чер кырында бичии ынай, ынчалза-даа мерген угаанныглардан-даа артык угаанныг дөрт амытан бар:

²⁵кымыскаяктар — күш-шыдалы улуг эвес чон-даа болза, аъш-чемин чайын-на курлавырлап алыр;

²⁶сарлык-дегелер [40] — кошкак чон-даа болза, чурттаар черлерин хаялар аразынга тудуп алыр;

²⁷шартылаада хаан чок, ынчалза-даа чаңгыс аай чыскаал-биле көжүп чоруур;

²⁸селескени хол-биле тудуп аар сен [41], ынчалза-даа ол хаанның ордузунга-даа турар.

²⁹Кылаштаар аяны түрлүг үш амытан бар, чоргаар кылаштыг дөрткү амытан база бар:

³⁰аң-меңниң эң күчүлүү арзылаң — кымга-даа орук чайлавас;

³¹коданының баштыңнары болур аскыр-дагаа биле аргар-кошкар болгаш албаты чонун баштаан хаан кижи.

³²Мелегейиң-биле бодуңну өрү көрген база бак чүве бодап алган болзуңза, аксыңны адыжың-биле дуй тудуп ал.

³³Чүге дээрге сүттү хайындырарга — өреме үнер; думчукче шанчарга — хан төктүр, а килең хайнырга — адааннажыышкын үнер.