Read Ыдыктыг Библия, 2011 Притчи 31 Bible Online

Притчи 31 - Ыдыктыг Библия, 2011 bible

Притчи 31

¹Масса чурттуг Лемуил хаанның сөстери [42]. Бо сөстер-биле Лемуилдиң авазы оглунга өөредиг берип турган:

²Оглум, мен чүү дээйн? Мээң божуп-төрээн оглум, канчаайн? Аксы-даңгыраам бээримге, төрүттүнген оглум [43], чүнү чагыыйн?

³Бодуңнуң күжүңнү херээженнерже чарывайн көр, хааннарны буурадыр херээженнер сээң оруктарыңны боттарынче ээй тыртпазыннар.

⁴Лемуил, арага ижери хааннарга шуут-ла таарышпас, чагырыкчылар-даа эзиртир суксун дилевезин.

⁵А оон башка эзиртир ижип алгаш, хоойлу-дүрүмнерни-даа уттуп аарлар, дарладып базындырган улуска-даа чөптүг шиитпир үндүрбестер.

⁶Эзиртир суксунну — өлүр четкен кижиге; араганы — сеткил-хөңнү ажып-саргаан кижиге кудуп бериңер:

⁷ол күжүр ижипкеш, бодунуң ядыы-түреңгизин база хилинчектиг үүлезин уттупсун.

⁸А сен бодун камгалап шыдавас кижини, шыдал чок бүгү улусту камгалап чугаала.

⁹Чөптүг шииткел үндүрүп, ядыы болгаш түреп баксыраан улусту камгалап чугаала.

¹⁰[44]Бүдүштүг херээженни кым тып шыдаарыл? Ооң үнези эртине даштардан бедик болгай,

¹¹ашааның чүрээ аңаа бүзүрелдиг, ол кадайының ачызында ажык-орулга чок артпас.

¹²Кадайы аңаа бүгү назынында бузутту эвес, буянны шаңнап кээр.

¹³Дүк азы лён пөс-даа белеткей берген дижик — кандыг-даа ажылды күзелдии-биле кылыр.

¹⁴Ол, садыглаар корабль дег, аъш-чемни ырак черден тып эккээр.

¹⁵Ол даң атпаанда-ла тура халыыр, оон өг-бүлезин ашкарып-чемгергеш, чалча кыстарга кылыр ажылды хуваап бээр.

¹⁶Бир шөлдү шинчип көргеш, садып алыр; ишчи холдары-биле акша-хөреңги ажылдап алгаш, виноград олуртуп алыр.

¹⁷Ол ажылдап тура, могап-шылаарын билбес, ооң холдары ажылындан салдынмас.

¹⁸Садыг-саарылгазы эки чоруп турарын билип кагза, орай дүне-даа чырыткызын өжүрбес;

¹⁹ооң холдары даараныр херекселинче дап бээр, а салаалары ээргиижин салбас.

²⁰Ол адыжын ядыы кижиге чада салып бээр, а холун түреп баксыраан кижиже сунар.

²¹Ооң өг-бүлезинге улуг хар-даа коргунчуг эвес, өг-бүлезиниң бүгү улузу каас-коя хептиг.

²²Ол бодунга база хевис шывыглар даарап аар, янзы-бүрү каас-коя хептер кедер.

²³Ооң ашааның ады хоорайның улус чыглыр черинде билдингир, ашаа чуртунуң баштыңнарының аразында орар.

²⁴Бүдүштүг херээжен хептер даарап садар база садыгжыларга курлар аппарып садар.

²⁵Күш-шыдал биле ат-алдар — ооң кеткен хеви дег; ол келир үени өөрүшкүлүг уткуур.

²⁶Ооң аксындан — мерген угаанныг сөстер, а дылындан — энерелдиг өөредиг үнер.

²⁷Ол бажыңында ажыл-агыйының чоруп турарын хайгаараар база аъш-чемин халаска чивес.

²⁸Ажы-төлү туруп келгеш, ону алгап-мактаар, ашаа база мактап ханмас:

²⁹«Бүдүштүүн көргүскен херээженнер-ле хөй, а сен оларның шуптузун ажып кааптың!»

³⁰Кыс кижиниң аянныы — меге дуурай, чараш-каазы — оңуп каар, а Дээрги-Чаяакчыдан коргар херээжен макталга төлептиг.

³¹Ону кылган ажыл-үүлези дээш шаңнаңар, ол херээжен хоорайның улус чыглыр черинге ажыл-херектери-биле алдаржызын!