Read Ыдыктыг Библия, 2011 Притчи 4 Bible Online

Притчи 4 - Ыдыктыг Библия, 2011 bible

Притчи 4

¹Ажы-төлүм, ачаңарның сургаалын дыңнаңар, угаан кирер дээш, кичээнгейлиг дыңнаңар.

²Буян сиңген өөредигни силерге берип турар болгай мен, ол өөредиимни уттуп, кагбаңар.

³Мен база адалыг чораан мен, авамның эрге-чассыг оглу турган мен.

⁴Ачам мени мынча деп өөредип чораан: «Мээң сөстеримни чүрээңге кадагалап ал, чагыг-сүмемни сагып чор, ынчан амы-тынныг артар сен.

⁵Мерген угаан биле билип алыышкынны чедип ал, сеңээ чугаалаан сөстеримни утпа, олардан соора барба.

⁶Мерген угаанны кагба, ол ынчан сени камгалаар, аңаа ынак апар — ол сени кадагалаар.

⁷Мерген угаан эң чугула болур. Мерген угаанны чедип ал. Кандыг-даа эт-хөреңги чыып чорзуңза, угаанны база чыып ал.

⁸Мерген угаанны бедии-биле үнеле, ол сени өрү көдүрер, бир эвес оон салдынмайн баар болзуңза — сени алдаржыдар.

⁹Ол сээң бажыңга одагалыг бөрттү кедирер, онза чараш оваадайны сеңээ эккеп бээр».

¹⁰Мени дыңна, оглум, сөстеримни хүлээп ал, ынчан сээң чурттаар чылдарың немежир.

¹¹Мерген угаанның оруун сеңээ айтып берип тур мен, дорт орук-биле сени эдертип бар чыдыр мен.

¹²Бар чыдар болзуңза, кылажың кызагдавас, маңнаар болзуңза, илдикпес сен.

¹³Сургаалымның аайындан эртпе, оон ойталавайн, кадагала, чүге дээрге амыдыралың ында болгай.

¹⁴Бузуттуг улустуң оруун эдербе, бак улустуң изин истеве:

¹⁵оларның оруундан өскээр ээп чоруй баргаш, олап кылаштава, оон чайлай бергеш, чаны-биле эрте бер.

¹⁶Бузут үүлгетпээн болза, олар удуп шыдавас; бир-ле кижини буураашкынга чедирбээн болза, оларның уйгузу келбес.

¹⁷Олар кемниг херээниң хлевин чип, күчүлелдиң арагазын ижип турар болгай.

¹⁸Чөптүг-шынныг улустуң оруу — даңның чырык хаяазы дег, хүн эң-не бедиинге четкиже, улам-на чырып, херелденир.

¹⁹А бузуттуг улустуң оруу — дүмбей караңгы дег, олар каяа тептиге бээрин билбес.

²⁰Оглум, мээң сөстеримни кичээнгейлиг дыңна, чугаамче кулааңны ээктир.

²¹Сөстерим сеткилиңден арлып чиде бербезин, оларны чүрээңниң ханызынга кадагалап ал.

²²Чүге дээрге мээң сөстерим оларны тып алган кижиге — амы-тынны, а ооң бүгү мага-бодунга — кадыкшылды берип турар.

²³Чүрээңни чүден артык камнап-кадагала, чүге дээрге ол — амыдыралдың үнер дөзү-дүр.

²⁴Меге сөстерни бодуңдан чайлат, аас-сөзүңнүң авыяазын бодуңдан ырат.

²⁵Сээң карактарың бурунгаар чиге көрзүн, көрүжүң чүгле мурнуңче шиглезин.

²⁶Сээң буттарың дорт оруктап чорзун, ынчан оруктарың шуптузу айыыл чок болур.

²⁷Оң-даа, солагай-даа талаже эгбе, будуңну бузуттан чайлат.