Read Ыдыктыг Библия, 2011 Екклесиаст 11 Bible Online

Екклесиаст 11 - Ыдыктыг Библия, 2011 bible

Екклесиаст 11

¹Бодуңнуң хлеб-тарааңны суг аайы-биле бадырып чорудуп тур, хөй хүннер эрткенде, ооңну катап тып аар сен [22].

²Өнчү-хөреңгиңниң кезиин чеди азы сес кижиге үлеп берип чор, чүге дээрге чер кырынга кандыг бергелер болу бээрин билир эвес сен.

³Булуттар долуп кээр болза, чаъсты черже төп бадырар дээни ол база ыяш мурнуу азы соңгу чүкче барып дүжер болза, барып дүшкен черинге-ле чыдары ол.

⁴Хатты хайгаарап чоруур кижи үрезинин чажып тарывас база булуттарже көрүп чоруур кижи дүжүт ажаавас.

⁵Хаттың оруктарын-даа, сааттыг кижиниң иштинде мага-боттуң канчаар тыптып турарын-даа билбезиң дег [23], бүгү-ле чүвени боттандырып турар Бурганның ажыл-херектерин билип шыдаар эвес сен.

⁶Эртен үрезиниңни тарып чор, кежээ база холдарыңга амыр-дыш бербе, чүге дээрге оозу азы моозу чедимчелиг болур бе азы кайызы-даа деңге эки болур бе дээрзин билир эвес сен.

⁷Чырык чаагай-ла база хүннү көөрү каракка тааланчыг.

⁸Бир эвес кижи хөй-даа чыл чурттаар болза, хүн бүрүзүнге өөрүп чорзун, ынчалза-даа караңгы хүннер хөй болурун база утпайн чорзун: бүгү-ле болуп турар чүүлдер хоозун куруг-дур.

⁹Аныяк оол, аныяк шааңда хөглеп чор, база чүрээң чалыы назыныңда өөрүшкүнү чооглап чорзун, база чүрээңниң кыйгырган оруктарынче карактарың кайнаар көөр-дүр, ынаар углап чор, чүгле мону бил: ол бүгү дээш Бурган сенден харыы негээр.

¹⁰Муңгаралды чүрээңден ойладып, мага-бодуңдан хилинчекти ырадып чор. Чаш назын болгаш чалыы үе — хей-бус-ла.