Read Ыдыктыг Библия, 2011 Екклесиаст 12 Bible Online

Екклесиаст 12 - Ыдыктыг Библия, 2011 bible

Екклесиаст 12

¹Аныяк-чалыы назыныңда Чаяакчыңны утпайн чор. Ооң соонда аар-берге хүннер база «Олардан меңээ таалал чок-тур» дээриң чылдар чедип кээр;

²ынчан хүн болгаш чырык, ай болгаш сылдыстар өже бээр, база чаъс соонда чаа булуттар диргелип кээр.

³Ынчан бажыңның таңныылдары сириңейни бээр, күштүглер күдүгүр апаар, дээрбениң ажылчыннары эвээш артканындан дээрбелевейн баар, а соңгаже көргеннерге караңгы апаар [24].

⁴Дашкаар үнер ийи эжииң хагдына бээр база дээрбе даажы дыңналбайн баар; куштуң бир дугаар алгызындан-на оттуп кээр апаар сен, ырлаар кыстар шупту ыытташпайн баар.

⁵Бедик черлерден коргар апаар сен, а оруктарны айыыл долган ышкаш апаар, миндаль ыяжы чечектели бээр [25]; шерги шимченгир эвес апаар база каперс [26] дээштиг эвес апаар. Оон кижини ооң мөңге бажыңынче аппар чыдар, а ыглаан-сыктаан улус ону долганып, кудумчуда бар чыдар.

⁶Ынчан мөңгүн илчирбежигеш үстү бээр, база алдын аяк чарлы бээр, база суг бажының чанында доңга бусту бээр, кудуктуң кочал тыртып долгаар дугую үрели бээр;

⁷довурак-доозундан чаяаттынган кижи черже катап эглип, биеэги хевээр довурак апаар, а амыдыралдың тыныжы ону берген Бурганче катап эгли бээр.

⁸Хоозундан хоозун чүве-дир — деп, Суртаалчы чугаалап каан. — Бүгү чүве хей-бус ышкаш!

⁹Мерген угаанныг боорундан аңгыда, Суртаалчы чонну билигге өөредип чораан. Ол хөй-ле угаадыглыг чугааларны деңзигүүрлей хынап шинчилеп база чогаадып чораан.

¹⁰Суртаалчы чечен сөстерни дилеп тып чораан база шынның сөстерин чиге бижип каан.

¹¹Мерген угаанныгларның сөстери — мал сүрүкчүзүнүң шиш баштыг ыяжы дег база чыып каан угаадыглыг чугаалары — чаңгыс Кадарчыдан келген кадап каан өргеннер дег.

¹²А оон аңгыда моон оваарнып чор [27], оглум: хөй номнар бижиирге, төнчү турбас, база хөлүн эрттир номнар шинчилээрге, мага-ботка шыланчыг.

¹³Бүгү чугаа төнген, түңнели бо-дур: Бургандан коргуп, Ооң айтыышкыннарын сагып чор, чүге дээрге кижиге херек-ле чүве ол.

¹⁴Чүге дээрге бүгү-ле ажыл-херектер дээш, бүгү-ле чажыртынган чүүлдер дээш — ол бүгүнүң экизин, багайын тодарадып — Бурган кижилерден харыы негээр.