Read Ыдыктыг Библия, 2011 Екклесиаст 2 Bible Online

Екклесиаст 2 - Ыдыктыг Библия, 2011 bible

Екклесиаст 2

¹Оон бодум сагыш-чүрээмге: «Каям, бодумну хөглээшкин-биле шенеп көрейн, чыргалды мага-хандыр чооглаайн» — дидим, а ол база хоозун куруг чүве болду.

²Каткы дугайында «Ол — тенек угаан-дыр», а хөглээшкин дугайында «Ол чүнү чедип ап турарыл?» дидим.

³Мага-бодумну арага-биле тааладып шенээр деп бодап алдым. Кижи амытан бо өртемчейде өйлүг назынында чүнү кылза дээре дээрзин билип албаан шаамда, чүрээмни мерген угаанга башкартпышаан, мугулай кижи ышкаш чурттап көөр деп шиитпирледим.

⁴Улуг ажыл-херектерни бүдүрдүм: бодумга бажыңнарны тудуп, виноград шөлдерин тарыдым-даа;

⁵садтарны болгаш сесерликтерни бодумга өстүрдүм, аңаа кандыг-даа кат-чимистиг ыяштарны тарыдым-даа;

⁶алаактарда ыяштарны суггарар дээш, хөлчүктерни кылдым-даа.

⁷Эр, херээжен кулдарны садып алдым-даа, мээң бажыңымга төрүттүнген чалчаларым база турган, а бода болгаш шээр малым саны Иерусалимге мээң мурнумда чурттап чораан улустуң кайызыныындан-даа хөй турган.

⁸Хааннардан болгаш күрүнелерден алдын-мөңгүннү-даа, эртинелерни-даа чыып алдым; эр, херээжен ыраажыларлыг-даа, эр улустуң таалалы — хөй-ле херээженнерлиг-даа [3] апардым.

⁹Ынчангаш Иерусалимге мээң мурнумда чурттап чораан улустуң аразындан тергиидеп, дөгерезин аштым, а мерген угааным мээң-биле кады хевээр арткан.

¹⁰Карактарым чүнү-даа күзээрге, ойталавайн чордум; чүрээмге кандыг-даа хөглээшкинни хорувайн чордум; мээң чүрээм бүгү-ле ажыл-ижимден өөрүп турган, ол өөрүшкү дээрге мээң бүгү-ле ажыл-ижим дээш алыр үлүүм болган.

¹¹Оон холдарымның кылып кааны бүгү-ле ажыл-херектерни болгаш иженип чорааным бүгү-ле ажыл-ижимни катап эргий көрдүм: ол бүгү хоозун куруг чүүл болгаш түңнел чок күжениишкин-дир, чырык черге ол бүгүден кандыг-даа ажык-дүжүк чок-тур.

¹²Мерген угаанны болгаш мугулай угаанны база эргий көрдүм. (Хаанның соонда келген кижи аңаа немей чүнү кылып шыдаарыл? Хаанның кылып каан чүүлдерин чүгле катаптап турар эвес бе?)

¹³Чырыктың дүмбейден дээрези дег, мерген угаанның ажык-дүжүү мугулай угаанның ажык-дүжүүнден улуг деп көрүп кагдым.

¹⁴Мерген угаанныг кижиниң карактары — ажык, а мугулай кижи дүмбейде улчуп чоруур-дур, ынчалза-даа оларның кайызының-даа хуу-салымы бир дөмей дээрзин билдим.

¹⁵Ынчан мен бодум сагыш-чүрээмде: «Мени база-ла мугулайныы ышкаш, шак-ла ындыг хуу-салым манап турар ышкажыл: ынчаарга мээң кедергей улуг угаанныг апарганымның херээ чүл?» дидим. «Ол база-ла хоозун куруг чүве-дир» деп, бодум сеткил-чүрээмде чугааландым.

¹⁶Чүге дээрге мерген угаанныгны кым-даа мөңге шагда сактып чорбас, мугулайдан ооң ылгалы-даа чок; келир үеде бүгү улус уттундуруп каар. Мерген угаанныг кижи мугулайдан ылгал чок өлүп каар-дыр!

¹⁷Ынчан чуртталганы көөр хөңнүм чок апарган, чырык черде дойлуп турар бүгү-ле ажыл-херектен хөңнүм калган, чүге дээрге бүгү чүве хоозун куруг чүүл болгаш түңнел чок күжениишкин-дир.

¹⁸Чырык черге иженип чорааным бүгү-ле ажыл-ижимни көөр хөңнүм чок апарган, чүге дээрге ооң дүжүдүн мээң соомда келген кижиге арттырып каар ужурлуг-дур мен.

¹⁹А ол кижи угаанныг болур бе азы мугулай болур бе? — ону кым билир боор. Мээң чырык черге иженип чорааш, бодумнуң мерген угаанга башкарткаш, кылган ажыл-ижимниң дүжүдүнүң ээзи ол кижи апаар-дыр. Ол база хоозун куруг чүүл-дүр.

²⁰Ынчангаш чүрээмден муңгагдап кээп, чырык черге иженип чорааным бүгү-ле ажыл-ижимниң түңнел чогундан баш муңгаш апардым.

²¹Бир кижи мерген угаанныг, билиг-мергежилдиг болгаш чедиишкинниг иженип чоруур-дур, а бүгү-ле чүүлүн ол бүгү дээш ажылдап чорбаан кижиге бериптер ужурлуг боор-дур. Ол база-ла хоозун куруг чүүл болгаш улуг човулаң-дыр!

²²Чырык черге иженип чоруур бүгү-ле ажыл-ижинден болгаш сагыш-чүрээниң човаашкынындан [4] кижи бодунга чүнү арттырып алырыл?

²³Ооң бүгү-ле хүннери — муңгагдал-дыр, ооң ажыл-ижи — човулаң-дыр; дүне безин ооң чүрээ амыр-дыш көрбес-тир. Ол база-ла хоозун куруг чүве-дир!

²⁴Кижиге аштанып-чемнениринден болгаш бодунуң ажыл-ижинге сагыш ханып, сеткилин өөртүрүнден дээре чүве чок-тур. Ол бүгү база-ла Бурганның холундан кээр-дир дээрзин көрдүм.

²⁵Чүге дээрге Ол чокка кым аштанып-чемненип, кым сагыш ханып шыдаарыл? [5]

²⁶Бурган Бодунга таарымчалыг кижиге мерген угаанны, билиглерни болгаш өөрүшкүнү берип турар-дыр, а бачыттыг кижиге берге үүлени онаап турар-дыр: ол кижи бодунуң чыып үүжелээн чүүлүн Бурганга таарымчалыг кижиге бээр ужурлуг. Ол база-ла хоозун куруг чүүл-дүр, түңнел чок күжениишкин-дир!