Read Ыдыктыг Библия, 2011 Екклесиаст 7 Bible Online

Екклесиаст 7 - Ыдыктыг Библия, 2011 bible

Екклесиаст 7

¹Чаагай ат-алдар чаагай чыттыг үстен дээре база өлүм хүнү төрүттүнген хүнден дээре.

²Найыр-дой болуп турар черже баарының орнунга, качыгдалдың ыы-сыызы дыңналып турар черже барганы дээре, чүге дээрге кижи бүрүзүнүң төнчүзү ындыг, дириг кижи ону чүрээнге шыгжап алзын.

³Каткыдан муңгарал дээре, чүге дээрге муңгаргай арындан угаан-чүрек экижиир.

⁴Мерген угаанныгларның чүрээ — качыгдалдың бажыңында, а мугулайларның чүрээ — хөглээшкин бажыңында.

⁵Мугулайларның ырын дыңнаарындан мерген угаанныгның чемезин дыңнааны дээре.

⁶Чүге дээрге мугулайларның каткызы — паш адаанда отта хараган будуктарының дызыраажы-дыр. Ол база-ла хоозун куруг чүүл-дүр!

⁷Базымча мерген угаанныг кижини мугулай кылып каар база хээли сеткил-чүректи сандарадып үрээр.

⁸Ажыл-херектиң төнчүзү ооң эгезинден дээре; шыдамыккай сеткил улуургак сеткилден дээре.

⁹Сеткил-хөңнүң-биле кылыктанырынче далаш болба; чүге дээрге кылык мугулайларның хөрек-чүрээнде турумчуп чоруур.

¹⁰«Чүге эрткен үе амгы үеден дээре чүвел?» диве; сен улуг угаанныг болзуңза, ындыг айтырыг салбас сен.

¹¹Чырык хүннү көрүп чоруурларга мерген угаан биле өнчү-хөреңги кады бар болза, эки; кайызы-даа ажык-дүжүктүг.

¹²Чүге дээрге мерген угаанның чаглааның адаанга турары акша-мөңгүннүң чаглааның адаанга турары-биле дөмей; ынчалза-даа угаан-билигниң дээрези — ооң эдилекчизиниң амы-тынын камгалаарында.

¹³Бурганның кылып турар ажыл-херээнче көрүп көр: Ооң ыргайтып каан чүүлүн кым дортайтып шыдаарыл?

¹⁴Менди-чаагай хүннерде аас-кежиктиг бол, а берге хүннерде мону бодан: кижи амытан бодунуң соонда чүү болурун билбес болзун дээш [13], Бурган оларның кайызын-даа тургузуп каан.

¹⁵Хоозун куруг чүүл долган назынымда чүнү-даа көрүп келдим: чамдык улус чөптүг-шынныг-даа болза, өлүп каар-дыр, чамдык улус бузуттуг-даа болза, үр чурттап чоруур-дур.

¹⁶Бодуңну хөлүн эрттир чөптүг-шынныг кылдыр-даа, хөлүн эрттир мерген угаанныг кылдыр-даа алдынма; бодуңну чок кылдырган херээң чүл?

¹⁷Хөлүн эрттир бузуттуг болба база мугулай болба: эрте дээре өлген херээң чүл?

¹⁸Бир эвес бирээзинден туттунгаш, өскезинден база холуң ыратпас болзуңза, ол эки; Бургандан коргар кижи оларның кайызынче-даа чайлы бербес.

¹⁹Угаанныг кижини мерген угааны хоорайның он чагырыкчызындан-даа күштүг кылыптар.

²⁰Бачыт кылбайн, чүгле буян кылып чоруур чөптүг-шынныг кижи чер кырында чок.

²¹Улустуң чугаалап турары сөс бүрүзүн-не сүрүп коптарба, оон башка бодуңнуң чалчаң сени бактап турарын дыңнай бээр сен.

²²Чүге дээрге сен бодуң улусту бактап турганың хөй таварылгаларны сээң чүрээң билир болгай.

²³Ол-ла бүгүнү мерген угааным-биле шылгап хынаан мен, бодумга «Мерген угаанныг болуйн» дээн мен, ынчалза-даа мерген угаан менден ырак-тыр.

²⁴Болуп турар бүгү чүвениң утказы ырак-ла-дыр база ханы-ла-дыр: кым ону тып, угаап билип шыдаарыл?

²⁵Мерген угаанны илередип тып, бодамчалыг чорукту шинчилеп билип аарынче, угаан-билиг чок мугулай болгаш бузуттуг чорукту угаап билип аарынче чүрээмни угландырдым.

²⁶Түңнелинде илередип тыпканым бо-дур: херээжен кижи өлүмден дора айыыл-дыр, чүге дээрге ол — четки-дир, ооң чүрээ — дузак-тыр, холдары — кинчилер-дир; Бурганга таарымчалыг кижи оон ойлай бээр, а бачыттыг — аңаа туттурар.

²⁷[27-28] Мээң илереткен чүүлүм бо-дур, көрүңер: бодамчалыг чорукту улаштыр дилевишаан, бүгү чүвени [14] дес-дараалай шенеп шинчилээш, ону тыппадым — деп, Суртаалчы чугаалаан. — Муң кижиниң аразындан бодамчалыг чаңгыс эр кижини тыптым, а ындыг херээжен кижини улус аразындан шуут тыппадым.

²⁹Бурган кижилерни чөптүг-шынныг кылдыр чаяап каан-дыр, а олар хөйнү күзеп, дилеп эгелээн-дир — шак-ла мону илередип тып, угаап билдим.