Read Ыдыктыг Библия, 2011 Екклесиаст 8 Bible Online

Екклесиаст 8 - Ыдыктыг Библия, 2011 bible

Екклесиаст 8

¹Мерген угаанныг кижиге кым деңнежирил база чүвениң алыс утказын кым билир боор. Кижиниң мерген угааны ооң арнын чырыдып, кадыг шырайын чымчадып турар.

²Бурганга берген даңгырааңны бодааш, «Хаан чарлыын сагып чор» деп чугаалап тур мен.

³Хаандан ыраар деп далашпа база багай херектерге болушпа; чүге дээрге ол чүнү күзээр-дир, дөгерезин кылып шыдаар.

⁴Хаанның сөзү эрге-күштүг; база аңаа «Ол чүнү канчап турарың ол?» деп кым чугаалаар боор.

⁵Айтыышкынны сагып чоруур кижи кандыг-даа багай чүүлче чоокшулавас: мерген угаанныгның чүрээ шын үе-хуусааны-даа, шын арга-хорганы-даа билир.

⁶Чүге дээрге бүгү-ле чүүл үе-хуусаалыг база арга-хоргалыг, а кижиге ол улуг айыыл-дыр,

⁷ол оон чүү болурун билбес; база ону аңаа кым чугаалап бээрил?

⁸Кижиде хат-салгынны туткаш, салбайн баары дег, өлүр хүн-шагының бажын билир эрге-күш чок, демиселден ол хосталып-даа шыдавас, а бузуттуг кижини ооң бузуду камгалап-даа шыдавас.

⁹Кижи кижини чагырып, аңаа хора чедирип чоруур шагда, чырык черде дойлуп турар бүгү-ле херектерни чүрээм-биле сайгарып бодап чорааш, бо бүгүнү көрдүм.

¹⁰Улус бузуттугларны хөөржүдүп кааш, ыдыктыг черден ырай бергеш, демгилерниң бак үүлгедиглер кылып чорааны хоорайынга оларны мактап турарын [15] база көрдүм. Ол база-ла хоозун куруг чүүл-дүр.

¹¹Бак үүлгедиглерниң шииткели дүрген эвес күүсеттинип турарындан кижи чүрээ бачыт кылыр күзел-биле долуп чоруур.

¹²Бачыттыг кижи чүс-даа катап бачыт кылып чорааш, узун назы назылаарын-даа көрүп чордум. Ийе, билир мен: «Аас-кежик Бургандан коргар улуска кээр,

¹³а бузуттуг кижиге эки болбас, Бургандан кортпас кижиниң назыны хөлегеге дөмей, ол оозун узадып шыдавас».

¹⁴Ынчалза-даа чер кырында мындыг хоозун куруг чүүл база бар: чөптүг-шынныг улуска бузуттугларның үлүг-хуузу онаажып-даа, бузуттуг улустуң үлүг-хуузу чөптүг-шынныгларга онаажып-даа турар-дыр. Ол база-ла хоозун куруг чүүл-дүр деп билдим.

¹⁵Ынчангаш өөрүшкүлүг хөглээшкинни экизиндим; чүге дээрге кижи амытанга чырык черге аштанып-чемненип, хөглээринден дээре чүве чок-тур, ол бүгү кижини эдерип, Бурганның аңаа чырык черге чурттаар кылдыр берген назынында кылып чоруур ажыл-ижи-биле кады чоруур-дур.

¹⁶Кижиниң хүндүс-даа, дүне-даа уйгу-дыш көрбейн киржип чорууру ажыл-херектерни — чер кырында дойлуп турар бүгү-ле ажыл-херектерни — эргий көөр база мерген угаанны угаап билип аар дээш, чүрээмни угландырдым.

¹⁷Бурган бүгү-ле чүүлдү тургузарда, кижи чырык черде дойлуп турар чүүлдерни угаап билип ап шыдавас кылдыр кылган дээрзин ынчан көрдүм. Кижи ол бүгүнү шинчилээр дээш чеже-даа кызар болза, ол ону дөмей-ле билип ап шыдавас база кандыг-ла бир мерген угаанныг кижи «Билир мен» дээр-даа болза, ол ону угаап билип ап шыдавас.