Read Ыдыктыг Библия, 2011 Екклесиаст 9 Bible Online

Екклесиаст 9 - Ыдыктыг Библия, 2011 bible

Екклесиаст 9

¹Ол бүгүже угаан-чүрээмни угландыргаш, келген түңнелим бо: чөптүг-шынныглар, мерген угаанныглар болгаш оларның ажыл-херектери, харын-даа ынакшыл азы көөр хөөн чок чорук безин Бурганның холунда-дыр. Бодун чүү манап турарын билир кижи чок.

²Бүгү-ле кижилерниң үүле-хуузу бир дөмей: чөптүг-шынныг кижиниң-даа, бузуттуг кижиниң-даа, буянныг кижиниң-даа; арыгланып чоруур кижиниң-даа, бужар кижиниң-даа; өргүл кылып чоруур кижиниң-даа, өргүл кылбайн чоруур кижиниң-даа; эки мөзүлүг кижиниң-даа, бачыттыг кижиниң-даа; даңгыраглап чоруур кижиниң-даа, даңгырак бээринден сестир кижиниң-даа үүле-хуузу бир дөмей.

³Чырык черде дойлуп турар бүгү чүүлдерниң багай талазы — шупту улустуң үүле-хуузу бир дөмей болганы-дыр! Ынчангаш дириг чорда, кижи амытанның чүрээн каржы сеткил болгаш мугулай чорук долуп чоруур-дур; а ооң соонда өлүглерже чоруй баар-дыр.

⁴Дириглер аразынга чоруур шаанда, кижиге идегел ам-даа бар, чүге дээрге дириг ыт өлүг арзылаңдан дээре!

⁵Дириглер өлү бээрин билир, а өлүглер чүнү-даа билбес. Оларга шаңнал турбас: олар уттундурган,

⁶оларның ынакшылы-даа, көөр хөөн чогу-даа, хүннээшкини-даа шагда-ла читкен, база чырык черде дойлуп турар бүгү ажыл-херектерге мөңге шагда киржилге чок апарганнар.

⁷Ынчангаш бодуңнуң аъш-чемиңни өөрүшкүлүг чип, арага-хымызыңны хөглүг ижип чор, чүге дээрге Бурган сээң ажыл-херектериңге таарзынып турар-дыр.

⁸Кандыг-даа үеде кеткен хевиң ак болзун, база бажыңда чагган олива үзү эвээжевейн чорзун [16].

⁹Бурганның чырык черге сеңээ бергени, хоозун куруг чүүл долган бүгү-ле назыныңда ынак кадайың-биле кады чуртталгага таалап чор, сээң чырык черде иженип чоруур ажыл-ижиңден болгаш чуртталгадан алыр үлүүң ол-дур.

¹⁰Холуң кылып шыдаар бүгү-ле ажылды бар шааң-биле кылып чор; чүге дээрге чеде бээриң өлүглер оранында ажыл-даа чок, бодал-даа чок, билиг-даа чок, мерген угаан-даа чок.

¹¹Эргий көргеш, чырык черде мындыг чүве көрдүм: чарышка чедиишкин аваангыр дүргеннерде эвес, дайынга тиилелге дидимнерде эвес, аъш-чем мерген угаанныгларда эвес, бай-байлак бодамчалыгларда эвес, ээ көрнүүшкүн билиглиглерде эвес-даа болгулаар-дыр, ол бүгү үе-хуусаа биле таварылгадан хамааржыр-дыр.

¹²Чүге дээрге кижи бодунуң үе-хуусаазын билбес-тир. Балыктарның айыылдыг четкиге туттуруп аары дег, куштарның дузакче кире бээри дег, кижи амытан база-ла ынчаар хенертен келген айыылдыг үе-шакка туттуруп чоруур-дур.

¹³Оон аңгыда чырык черде мындыг мерген угаанны көрдүм, база ону улуг деп санадым.

¹⁴Хөй эвес чурттакчылыг улуг эвес хоорай турган, аңаа удур бир улуг хаан келгеш, ону долгандыр улуг бүзээлелди тургускан.

¹⁵Ынчалза-даа ол хоорайда бир мерген угаанныг ядыы кижи илереп тыптып келген, мерген угааны-биле хоорайны камгалап каап болур турган кижи ол-дур [17]. Ынчалза-даа ол ядыы кижини кым-даа сагынмаан.

¹⁶Ынчангаш мен «Мерген угаан күштен дээре-дир» дидим, ынчалза-даа улус ядыы кижиниң мерген угаанын куду көөр-дүр база ооң сөстерин тооп дыңнавас-тыр.

¹⁷Мугулайларның аразынга чагырыкчының алгы-кышкызынга деңнээрге, мерген угаанныгларның оожум топтуг чугаазы дээре дыңналыр дээрзи шын.

¹⁸Мерген угаан дайын чепсээнден дээре дээрзи база шын; ынчалза-даа чаңгыс бачыттыг кижи [18] хөй-ле эки-чаагай чүүлдү чок кылыр-дыр.