Read Ыдыктыг Библия, 2011 Песня Песней 1 Bible Online

Песня Песней 1 - Ыдыктыг Библия, 2011 bible

Песня Песней 1

¹Өндүр бедик ыры. Соломоннуу. Эжимниң эриннери мени ошказын-на, ошказын! Ынакшылың арагадан тааланчыг-дыр.

²Айдызап кээр чаагай чыдың кайгамчык-тыр. Сээң адың — чаап куткан олива үзү-ле, сеңээ кыстар ынчангаштың ынак болгай.

³Мени чедип ал, кады маңнажыптаал! Хаан мени удуур өрээлинче киире берзин. «Ынакшылың арагадан арттыр мактап, сээң-биле кады хөглеп, өөрүүлү» — деп турар кыстарның сеңээ ынакшааны ылап чөп-түр!

⁴Иерусалим кыстары, кежим карара берзе-даа, ал-бодум аажок чараш! Кедар аймактың чадырлары, Соломоннуң майгынының шывыглары [1] ышкаш мен ийин.

⁵Хүн менден карак салбайн кайгаарга, хүрере бергеним дээш куду көрбейн көрүңерем. Акыларым меңээ ажынып-дарынгаш, виноград шөлдери кадартып каан, а бодумнуң шөлүм кадарбаан мен.

⁶Чүрээм-ынаам, чугаалап көр: сүрүүң каяа кадарар сен, кодан малың дүштедип аар чериң кайдал? Эштериңниң туруп алган черлеринге сени дилеп, улчуп чорбаайн.

⁷Херээженнерниң эң-не чаражы кыс, билбес болзуңза, хойлар изээн кокпа-биле базып үнгеш, анайларыңны кадарчылар чадырларының чанынга кадарып көр.

⁸Амыраам сени фараоннуң чуузаларының аразында чоруур бе-биле дөмейлээр мен.

⁹Чаагыңны — астынчак каасталга шимээн, мойнуңну — кедирген каасталга шимээн.

¹⁰Бис сеңээ мөңгүн-биле шокарлап каан алдын каасталгалар шуткуп бээр бис.

¹¹Хаан хөлестеп дойлап чыдырда, нард үзүнүң чаагай чыды менден тарап турган.

¹²Эргим эжим — чаагай чыттыг мирра сугар хапчыгаш дег, эмиглерим аразынга дүннеп алыр;

¹³Эргим эжим — Эн-Гедиде чимистиг шөлдерде хна үнүш салбаа ышкаш.

¹⁴Кайгамчык-ла чараш-тыр сен, амыраам, чараш-тыр сен, карактарың — көге-бугалар-ла!

¹⁵Кайгамчык-ла чараш-тыр сен, эргимим, тааланчыың кедергей-дир, орун-дөжээвис — хөлегелиг ногаан шыкта;

¹⁶Бажыңывыс серизи — шивилер, какпак дээвиири — пөштер.