Read Ыдыктыг Библия, 2011 Песня Песней 5 Bible Online

Песня Песней 5 - Ыдыктыг Библия, 2011 bible

Песня Песней 5

¹ Эр Сесерлиимче кирип келдим, душтуум дуңмай, мирра биле чаагай чыттыг үнүштерим чыып алдым. Ары өөнде ары чигирин чип алдым, сүт биле араганы ижип алдым. Эш-өөр, дойлаңар-ла, ынакшылды эзиртир ижиңер-ле!

²Удуй бердим, а чүрээм одуг... Эргимимниң үнү-дүр! Эжиимни ол соктап тур: «Амыраам дуңмай, көге-бугам, тергиин дээн чарашпайым, ажыдып көр! Бажымда шалың дүшпээн кургаг чер чок, бажым дүгүн дүнеки туман өттүрүп каан».

³Хевим уштуп алдым, ону катап кедер мен бе? Буттарымны чуп алдым, катап хирлендирер мен бе?

⁴Эргим эжим эжик үдүнче холун супту, олче уткуй ишти-хөңнүм кыймыш кынды.

⁵Эргимимге эжиим ажып туруп келдим, холумдан мирра үзү дамдылады, салааларымдан дээк тудазынче мирра агып турду.

⁶Эргимимге эжиим ажыдып бердим, а эжим хая көрнүп, чоруй барган, чогул! Сеткил-сагыжым ону күзээш, сарыннаан [7]. Дилеп-ле турдум — тыппайн бардым, кый дээримге, ол меңээ харыы бербээн!

⁷Хоорай эргип чоруп турар таңныылдарга таварыштым — олар мени балыгландыр эттеп кагды; хоорайның ханаларын таңныылдааннар эштип чораан шывыым ушта тыртып алды.

⁸Иерусалим кыстары, эргимимге ужурашкаш, чүү дээр силер? «Ынакшылдан хинчектенип-ле тур» дээрин даңгыраглап көрүңерем!

⁹Херээженнерниң эң-не чаражы кыс, өскелерге деңней көрзе, эргим эжиң кандыг кижил? Бистен ындыг даңгыракты алыр хире, өскелерге деңней көрзе, эргим эжиң кандыг кижил?

¹⁰Эргим эжим чырык шырайлыг, долбан чаактыг, түмен кижи аразында онзагай эр!

¹¹Ооң арны — арыг алдын, бажының дүгү дыдыраш боорда, каарган ышкаш кап-ла кара.

¹²Карактары — аккан сугда көге-бугалар дег, сүтте эштип, долу суглуг хөөлбек кыдыында олурар.

¹³Чаактары — чаагай чыдын айдызаан үнүштер тараан чалдар-ла. Эриннери — мирра үзү дамдылай аккан кызыл лилиялар.

¹⁴Холдары — эртине даштар дизе кадаан алдын будуктар, ишти — сапфир-биле хоолап каастаан чаан сөөгүнден кылган тураскаал-ла;

¹⁵Буттары — алдын дөжектерде тургускан маны даш чагылар-ла, хевир-шырайы — Ливан даг дег, пөштер ышкаш кайгамчыктыг.

¹⁶Ооң аксы — тааланчыг, бүгү боду — сеткил хандырар! Иерусалим кыстары, эргимим эр ындыг кижи, мээң эжим ындыг кижи!