Read Ыдыктыг Библия, 2011 Исаия 1 Bible Online

Исаия 1 - Ыдыктыг Библия, 2011 bible

Исаия 1

¹Иудеяның хааннары Озия, Иоафам, Ахаз болгаш Эзекия оларның чагырып турган чылдарында Амоцтуң оглу Исайяга Бурганның чорутканы, Иудея биле Иерусалим дугайында ажыдыышкын бо-дур.

²Дээр, дыңна! Чер, кичээнгейге ал! Дээрги-Чаяакчы чугаалап тур: «Мен оолдарымны кижизидип, өстүрүп кагдым, а олар Меңээ удур тура халышты.

³Шары — бодунуң ээзин, элчиген — турар черин билир, а Израиль Мени билбес-тир, Мээң чонум чүнү-даа угаап билип шыдавас-тыр!

⁴О, бачыттыг аймак, кем-буруузу аартаан чон, о, бузуттуг үре-салгал, будулган оолдар! Олар Дээрги-Чаяакчыдан ойталаан, Израильдиң ыдыктыг Бурганын тооваан — Оон хая көрнү берген.

⁵Үргүлчү үймээн үндүрер улус, чүге силер ам база катап эттедип-соктурарын күзеп тур силер? Бажыңарда балыгланмаан чер чок, чүрээңер шуут харыксырап калган-дыр.

⁶Таваңгайыңардан тейиңерге чедир кадык чер артпаан: кайнаар-даа көөрге, балыг-бышкын черлер, экирбээн оюлганнар — аштап-чугбаан, шарываан, эм үс чаап, чымчатпаан балыглар.

⁷Чуртуңар хоозураан, хоорайларыңар хуюкталдыр өрттенип калган, хары улус, силер көрүп туруңарда-ла, чериңерни үптеп-чип турар; хары улус эжелеп алган соонда дег, хамык чүве ээнзирээн!

⁸Сион-кыс, виноград шөлүнде майгын ышкаш, огородта чадыржыгаш ышкаш, бүзээлелде хоорай ышкаш, чааскаан арткан».

⁹Аг-шериглиг Дээрги-Чаяакчы бистиң улуг эвес артынчывысты кадагалаваан болза, Содомга дөмейлежип, Гоморра ышкаш апаар турган бис.

¹⁰Дээрги-Чаяакчының сөзүн дыңнаңар, Содомнуң чагырыкчылары! Бурганывыстың хоойлузун кичээнгейге ал, Гоморраның чону!

¹¹«Эңдерик өргүлдериңерниң Меңээ херээ чүл? — деп, Дээрги-Чаяакчы чугаалап тур. — Бүрүн өрттеткен кошкарлар өргүлдеринге, семис мал чаанга пөге бердим; бугажыктар, хураганнар, хуналар ханы күзевейн тур мен.

¹²Мээң мурнумга мөгейип кээп, Мээң өргээм иштин таптай базарын силерден кым негеп турар чүвел?

¹³Моон соңгаар хоозун өргүл белектери эккелбеңер. Айдызаар чүүлдериңер меңээ бужар-багай-дыр. Ай чаазының байырлалдары, амыр-дыш хүннери болгаш байырлыг чыыштарыңар... Ол бүгү байырлалдарны кылбышаан, бузут үүлгедип турарыңар-биле эптежир аргам чогул.

¹⁴Ай чаазында чыыштарыңарны, байырлалдарыңарны көөр хөңнүм чок. Олар Меңээ үүрге-чүък апарган, ону чеже көдүрер мен — шаам төне берди.

¹⁵Холуңарны мөргүл кылып өрү сунарыңарга, Мен силерже көрүнмес мен. Чеже-даа хөй катап мөргүүрүңерге, Мен силерни дыңнавас мен. Холуңар ханда кончуу сүргей борашкан-дыр!

¹⁶Чунуп, арыгланып алыңар. Бузуттуг ажыл-херээңерни Мээң көрүжүмден чайладыңар! Бузут үүлгедирин соксадып,

¹⁷буян кылып өөренип алыңар. Чөптүг-шынныг чорукче чүткүп, дарлакчыларны сойгалап, өскүстерни камгалап, дулгуяк херээженнерге болчуңар.

¹⁸Чедип келиңер, бо бүгүнү кады үзе шиитпирлеп көрээли — деп, Дээрги-Чаяакчы чугаалап тур. — Силерниң бачыттарыңар кып-кызыл өңнүг-даа болза, хар ышкаш ак апаар; бачыттарыңар хүрең-кызыл будук дег-даа болза, ак хой дүгү дег апаар!

¹⁹Бир эвес эки тураңар-биле Мени тооп дыңнаар болзуңарза, черниң кежиктерин четтирер силер,

²⁰а бир эвес Менден ойталап, чөрүүленир болзуңарза, хылыш чемижи боор силер». Дээрги-Чаяакчының аксындан үнген сөстер ол-дур.

²¹Бурганга шынчы турган найысылал, сен канчап самыын-садар херээжен дег апардың?! Сен шын шииткелге бүргеттирген турдуң, чөптүг-шынныг чорук сеңээ чурттап турду, а ам сенде өлүрүкчүлер чурттап турар-дыр.

²²Сээң мөңгүнүң багай холуксаалыг апарган, сээң арагаңда суг холуп каан.

²³Сээң нояннарың Менден ойталаан-дыр база оорлар-биле бир баг болган-дыр; олар шупту хээли чииринге ынак, белектер негеп ап турар, чаргы-чаалы үезинде өскүстерни камгалавас, дулгуяк херээженниң херээн сайгарып көрбес улус-тур.

²⁴Ынчангаш Дээрги, Аг-шериглиг Дээрги-Чаяакчы, Израильдиң күштүг Бурганы: «Өжээтеннеримни канчаар кезедир эвес мен! Дайзыннарымдан өжээним негеп аар мен!

²⁵Холумну сенче көдүрер мен; саваң-биле дег, холуксааңны арыглаар мен, сенден бүгү холуксааларны аңгылаар мен!

²⁶Биеэги үеде дег, сеңээ баштыңнарны, эгезинде турганы дег, сеңээ чөвүлекчилерни эгидер мен. Ынчан сени „Чөптүг-шынныг хоорай, шынчы найысылал“ деп адап каар» — деп медеглээн.

²⁷Сион чөптүг шииткел-биле, ооң Бурганче ээлген ажы-төлү — чөптүг чоруу-биле камгалал алыр.

²⁸А Бурганга удур тура халаан улус бачыттыглар-биле кады узуткаттырар. Дээрги-Чаяакчыдан ойталаан улус өлүп каар.

²⁹Таалал алыр ыдыктыг ыяштарыңар дээш бак атка кирер силер, боттарыңарга шилип алган ыдыктыг дээн сесерликтериңер дээш адыңар баксыраар.

³⁰Бүрүзү оңган ыяш дег, суггат чок сесерлик дег апаар силер.

³¹Күштүглер — хендир дырандызы дег, а оларның үүлгедиглери — от чаштанчызы дег апаар: олар кады кыва бээрге, ол отту кым-даа өжүрүп шыдавас.