Read Ыдыктыг Библия, 2011 Исаия 13 Bible Online

Исаия 13 - Ыдыктыг Библия, 2011 bible

Исаия 13

¹Амоцтуң оглу Исайяның дамчытканы Вавилон дугайында өттүр билген медеглел бо-дур.

²«Тас тей бажынга туктан көдүргеш, дайынчыларны кыйгырып, оларже хол чайыңар; олар ызыгууртаннар хаалгазынче кире берзин.

³Мен Бодумга бараалгатканым шериглерге дужаал берген мен; Мээң өндүр улуум дээш өөрүп-байырлап турар дайынчыларымны кыйгырып алдым — Мээң килеңим ёзугаар хөделзиннер.

⁴Мөөң чон чыылганда дег, дагларда дааш-диңмит үнүп тур. Эвилелдежип чыылган күрүнелер, чоннарның дааш-шимээни ол-дур! Аг-шериглиг Дээрги-Чаяакчы аг-шеригни тулчуушкунга белеткээн-дир.

⁵Ол аг-шериг ырак чурттан, чер-делегейниң ужу-кыдыындан кел чыдар: Дээрги-Чаяакчы болгаш Ооң килеңиниң чепсээ бүгү чер-делегейни хоозурадыр!

⁶Ыглап-сыктаңар, чүге дээрге Дээрги-Чаяакчының шииткелиниң хүнү чоокшулаан-дыр — Күчүлүг Бурган бүрүн буураашкын чоруткан-дыр.

⁷Ынчангаш бүгү улустуң холдары салдына бээр, кижи бүрүзүнүң чүрээ серт кынныр.

⁸Улус аажок коргар, олар аарышкыга алзып, курлу бээр, божуп чыдар херээжен дег, хилинчек көөр, бот-боттарынче кайгап-харап көржүр, арыннары агарып, девидей бээр.

⁹Көрүңер, Дээрги-Чаяакчының шииткелиниң хүнү кел чыдыр — Ооң аажок хорадап, килеңнээни, хайыра чок ол хүнде чер кыры ээнзиреп, ында чурттаан бачыттыг улус узуткаттырар.

¹⁰Дээрниң сылдыстары биле чырымалдары боттарының чырыын чашпас; үнүп орар хүн өжүп каар, ай чайынналдыр чырывас.

¹¹Мен бо делегейни бузуду дээш кезедир мен, бузуттугларны кем-буруузу дээш кезедир мен. Турамык улустуң улуургаан соксадыр мен, түрлүг улустуң туразының улуун таптай базар мен.

¹²Кижилер эвээжээш, арыг алдындан-даа, Офирден эккелген алдындан-даа ховар апаар кылып каар мен.

¹³Ынчаар дээш, Мен дээрни силгиир мен! Аг-шериглиг Дээрги-Чаяакчы хорадаарга, Ооң килеңи кыптыккан хүнде чер-делегей бодунуң туружундан шимчей бээр.

¹⁴Ынчан кижи бүрүзү, сүрүүшкүнден дескен чээрен дег, кадарчы чок хойлар дег, бодунуң чонунче дедир чанар, бодунуң черинче дезип маңнаар.

¹⁵Туттурган-на кижи өттүр шаштырып аар, таварышкан-на кижи хылыштан өлүп калыр.

¹⁶Оларның чаш төлдерин, боттары көрүп турда, черже чылча октап каар; оларның бажыңнарын үптеп-тонаар, кадайларын чазарлаар.

¹⁷Көрүңер, Мен Вавилонга удур мөңгүннү үнелевес, алдынны тоомчага албас мидий чонну көдүрер мен.

¹⁸Мидийлерниң чалары аныяк оолдарны адып каар, олар чаш төлдерге хайыра көргүспес, бичии уругларже кээргел-биле көрүнмес.

¹⁹Вавилон — күрүнелерниң эң каазы, халдей чоннуң алдары база чоргааралы, Содом биле Гоморра ышкаш, Бурганга узуткаттырар.

²⁰Вавилонну улус кажан-даа ээлевес, салгалдан салгал дамчып чурттакчы чок болур. Араб кижи аңаа чадырын тикпес, кадарчы кижи сүрүг малы-биле дыштанмас.

²¹Аңаа чүгле черлик аң-мең турар, шөө-бөрүлер ооң бажыңнарын долар; аңаа страус куштар чурттаар база те-чуңма шурап маңнажыр.

²²Бөрүлер ооң шивээлеринге [16], дилгилер — каас-коя ордуларынга улужар».