Read Ыдыктыг Библия, 2011 Исаия 14 Bible Online

Исаия 14 - Ыдыктыг Библия, 2011 bible

Исаия 14

¹Вавилоннуң кеземче көөр үези чоокшулаан, ооң өлүр хүнү кээр четкен. А Иаковту Дээрги-Чаяакчы өршээр, Израильди база катап шилип аар — израильчилерни боттарының черинге чурттадып каар — даштыкы улус олар-биле каттыжып, Иаковтуң салгалы-биле тудуш апаар.

²Өске чоннар израиль чонну эдертип алгаш, ооң төрээн черинче дедир эккээр. Израиль чон Дээрги-Чаяакчының черинге ол чоннарны бодунуң эр, кыс кулдары кылып аар база ону тудуп аппарган улусту тудуп аар, ону кызып-кыйып турган улусту чагырар.

³Ол хүн, кажан Дээрги-Чаяакчы сени качыгдал, хөлзээзин болгаш каржы-дошкун кулданыгдан адырып каарга,

⁴Вавилоннуң хаанын кочулаан бо ырны ырлаар сен: «Хилинчектекчи чок апарды, ооң кызагдалы төндү!

⁵Дээрги-Чаяакчы бузуттугларның мергезин, чагырыкчыларның кымчызын сыйып кагды.

⁶Хаан килеңней бергеш, чоннарны соксаал чок эттеп-соп, хорадай бергеш, кээргел чок кызагдал-биле истеп-сүрүп турду.

⁷Бүгү чер-делегей ам дыштанып, амыр-чыргал көрүп чыдыр, хөглүг ырлар дыңналып тур!

⁸Хадылар, Ливанның пөштери безин сээң бастырганың дээш байырлап: „Сен мөңге уйгуң удуй бээриңге, бисти кым-даа кезедип келбестеди“ — дижип тур.

⁹Өлүглер оранынче кирип туруңда, сени уткуп аар дээш, ол оран хөлзеп эгелээн; сени уткузун дээш, ол оран өлүг улустуң сүнезиннерин — чер кырынга баштыңчылар бооп чораан бүгү улусту оттуруп, өске чоннарның өлген хааннарын дүжүлгелерден сеңээ алдар кылдыр тургузуп турар.

¹⁰Олар шупту сеңээ: „Сен база, бис ышкаш, кошкак апарып, биске дөмейлежи берген-дир сен“ — дээр.

¹¹Сээң өндүр-чаагайың, чадаганнарың үнү — ол бүгү өлүглер оранынче дүже берген. Сеңээ сээктер дөжек болур, курттар — шуглак болур.

¹²Шолбан сылдыс, даң хаяазының төлү, канчап дээрден кээп дүштүң?! Чоннарның дарлакчызы, сени черже дүжүр октапкан-дыр!

¹³А сен бодуңнуң сеткил-чүрээңде: „Дээрже көдүрлү берейн, дүжүлгемни Бурганның сылдыстарындан өрү көдүрүп, бурганнарның чөвүлежип чыглыр чери — Цафон дагның ийлеринге саадаайн [17].

¹⁴Үстүкү булуттардан өрү көдүрлүп, Дээди Өрүкү Бурганга дөмейлежийн“ — деп бодадың.

¹⁵Ынчалза-даа тамыже, өлүглер оранының дүвүнче дүжүр октаткан сен!

¹⁶Сени эскерип каан улус топтап көрүп, салым-чолуңну кайгап-харап турар: „Черни шимчедир чайгап, күрүнелерни сириледип турган кижи бо бе?

¹⁷Делегейни ээнзиреткен, бүгү хоорайларны үреп бускан, тудуп аппарган улузун бажыңынче чандырбайн турган кижи бо бе?“

¹⁸Чоннарның хааннары шупту хүндүлүү-биле мөңге уйгузун удуп, кижи бүрүзү бодунуң чевег-куюнда чыдар.

¹⁹Чүгле сени, чүдек-бужар сек дег [18], чевег-куйга ажаавайн, үндүр октапкан; хылышка шаштырткан, тамының даштарынче октаттырган өлүглер сени шып алган. Улус буду таптай баскан мөчү-сөөк дег,

²⁰сен ол хааннар-биле дөмей кылдыр хөөржүттүрбес сен, чүге дээрге чуртуңну хоозурадып, чонуңну узуткап алган-дыр сен. Бузуттугларның үре-салгалын улус мөңге шагда адап сагынмас.

²¹Адазының кем-буруузу дээш, ооң оолдарын чок кылыры-биле белеткеңер. Олар чер-делегейни эжелеп аар дээш көдүрүлбезин база бүгү делегейни боттарының хоорайлары-биле дуглай тутпазын».

²²«Оларга удур көдүрлүр мен — деп, Аг-шериглиг Дээрги-Чаяакчы медеглээн. — Вавилоннуң адын, дириг арткан чонун, келир салгалын узуткап каар мен — деп, Дээрги-Чаяакчы медеглээн. —

²³Мен ону чараа-чеченнер девискээри, тулааланчак хөөлбектер кылып каар мен; узуткаашкын ширбиижи-биле ону үндүр ширбиир мен». Аг-шериглиг Дээрги-Чаяакчының медеглээн чүвези ол-дур.

²⁴Аг-шериглиг Дээрги-Чаяакчы: «Мен канчаар бодап алган мен, ынчаар болур, Мен канчаар баш бурунгаар тодараткан мен, ынчаар боттаныр;

²⁵Бодумнуң черимге ассирий аг-шеригни чылча шавар мен, Бодумнуң дагларымга оларны таптай базар мен. Оларның дөңгүзү Мээң чонумдан уштунуп кээп дүжер, оларның дарлалы ооң оорга-мойнундан адырлы бээр.

²⁶Бүгү чер-делегейге хамаарыштыр бодалым бо-дур, бүгү чоннарны кезедир дээш көдүрүлген холум бо-дур.

²⁷Аг-шериглиг Дээрги-Чаяакчы бодал бодап аарга, кым ону күш чок болдуруп шыдаарыл? Ооң холу көдүрлүрге, кым ону чайладып шыдаарыл?» — деп даңгыраглап чугаалаан.

²⁸Ахаз хаанның өлген чылында мындыг өттүр билген медеглел болган:

²⁹«Филистимнер оларны чылча шаап турган шыкпыыштың сыйылганы дээш өөрүвезин; чылан үре-салгалындан шагар чылан үнүп кээр, ооң үре-төлү ок-чылан апаар.

³⁰Ынчан эң ядыы улус тодар, түреңги улус айыыл чок черге дыштаныр. Филистим чоннуң дазылын аш-биле узуткаар мен, артып калган улузу өлүртүп каар.

³¹Ыглаңар, хаалгалар! Алгырып ыгла, хоорай! Филистимнер, кортканыңардан дөгере көжүй бериңер! Чүге дээрге соңгу чүктен ыш диргелип кел чыдыр, ол аг-шеригде чыскаалдан чыдып калган кижи чок-тур.

³²Ол чоннуң элчиннеринге чүү деп харыылаарыл? „Дээрги-Чаяакчы Сионну доктааткан, Ооң чонунуң түреңги улузу аңаа хоргадал тып аар“ деп харыылаар ужурлуг».