Read Ыдыктыг Библия, 2011 Исаия 19 Bible Online

Исаия 19 - Ыдыктыг Библия, 2011 bible

Исаия 19

¹Египет дугайында өттүр билген медеглел бо-дур. Дыңнаңар, Дээрги-Чаяакчы чоруккур булутта саадапкан, Египетче кел чыдыр. Египеттиң дүрзү-бурганнары Ону көргеш, сириңейнип тур, египетчилерниң чүректери кортканындан шапкыланып тур.

²«Мен египетчилерни египетчилерге удур дайылдаштырар мен — ха-дуңмалышкы улус, эжишкилер, бир хоорай биле өске хоорай, бир девискээр биле өске девискээр бот-боттарынга удур чаалажыр.

³Египетчилерниң сузу бастынар, Мен оларның бодап алган чүүлдерин чүү-даа эвес кылып каар мен; олар дүрзү-бурганнардан, өлүг улус сүнезиннеринден, караң көрнүрлерден арга-сүме айтырар.

⁴Мен Египетти каржы-дошкун чагырыкчының холунга хүлээдип бээр мен, кээргел чок хаан оларны чагырар» — деп, Аг-шериглиг Дээрги-Бурган-Чаяакчы медеглээн.

⁵Далайның суу тырттына бээр, хем соглуп, кургап каар.

⁶Адырлар, бугалар чыдып эгелээр, Египеттиң хем-суглары сыыгап, соглуп каар. Кулузун, хыыргыыш оңа бээр.

⁷Хем эриинде шырыштар, Нилдиң чанында тараан бүгү тараа кургап, тарадыр хадыткаш, чиде бээр.

⁸Балыкчылар муңгараар, Нил хемче сыырткыыжын октап турар бүгү улус ыглажыр, сугже четки октап турар улус ундараар.

⁹Лён дырап турар улус идегелин шуут ышкынар, пөс аргыкчыларының арны агара бээр.

¹⁰Хеп аргыкчылары муңгагдаар, хөлезилеттинген ажылчыннарның сагыш-сеткили качыгдалга алзыр.

¹¹Цоан хоорайның нояннары шуут угаан чок-тур! Фараоннуң мерген угаанныг чөвүлекчилери мелегей сүме кадып тур. Канчап силер фараонга: «Мерген угаанныгларның үре-салгалы бис, эрте-бурунгу хааннардан укталган бис!» — дээр силер?

¹²Египет, сээң мерген угаанныгларың ам кайыл? Аг-шериглиг Дээрги-Чаяакчының Египетке удур бодалын олар ам сеңээ чугаалап, тайылбырлап берзин.

¹³Цоанның нояннарының угааны четпес-тир, Мемфис хоорайның нояннары дуурайлаттырган-дыр; Египетти ооң аймактарының баштыңнары оруундан астыктырган-дыр.

¹⁴Дээрги-Чаяакчы оларның угаан-сарыылын ээдереткен-дир, ынчангаш олар Египеттиң бүгү ажыл-херектерин будап каапкан-дыр: Египет ам, эзирик кижи дег, бодунуң кускузун сүзүп, улчуп чоруп турар.

¹⁵Египетке ам кым-даа: ооң бажы-даа, кудуруу-даа, бедик-чаагай будуктары-даа, хыыргыыжы-даа дузалап шыдавас.

¹⁶Ол хүн кээрге, египетчилер херээженнер дег апарып, Аг-шериглиг Дээрги-Чаяакчының оларга удур көдүрер холундан корткаш, сирилей бээр.

¹⁷Иудеяның чери дээш Египет коргуушкунга алзыптар. Иудеяның адын адаарга, дыңнаан кижи бүрүзү Аг-шериглиг Дээрги-Чаяакчының Египет дугайында бодалы дээш коргуп-сүртээр.

¹⁸Ол хүн беш египет хоорай Ханаанның дылы-биле чугаалап, Аг-шериглиг Дээрги-Чаяакчының ады-биле даңгыраглап эгелээр. Ол хоорайларның бирээзи Үрегдээшкин хоорайы [19] деп адаттырар.

¹⁹Ол хүн Дээрги-Чаяакчыга өргүл салыр бедик чер Египеттиң ортузунга турар, а Дээрги-Чаяакчыга тураскаал ооң кызыгаарынга турар.

²⁰Ол дээрге египет черге Аг-шериглиг Дээрги-Чаяакчы дугайында сагындырыг, херечилел болур. Кажан египетчилер боттарының кызагдакчыларындан адырлыр дээш Дээрги-Чаяакчыдан дуза дилеп кыйгырарга, Ол камгалакчы биле баштыңны оларга чорудуп берип, камгалаар.

²¹Дээрги-Чаяакчы Египетке ынчалдыр ажыттынар; ол хүн египетчилер Дээрги-Чаяакчыны билип алгаш, Аңаа мөгейип, өргүл малдары биле далган-тараа өргүлдери эккеп салыр база Дээрги-Чаяакчыга даңгырактар бергеш, күүседир.

²²Дээрги-Чаяакчы Египетти кезедир; кезеткеш, оон экиртип каар. Олар Дээрги-Чаяакчыже эглип, мөргүүрге, Ол оларның дилээнге харыылап, экиртип каар.

²³Ол хүн Египеттен Ассирияже улуг делгем орук шөйлүр. Ассирийлер Египетче, а египетчилер — Ассирияже аргыжып чоруур, египетчилер ассирийлер-биле кады Дээрги-Чаяакчыга бараан болур [20].

²⁴Ол хүн Израиль үш улуг күрүнениң бирээзи болуп, Египет болгаш Ассирия-биле деңнежи бээр; ол чер-делегейге ачы-буянны хайырлаар.

²⁵Аг-шериглиг Дээрги-Чаяакчы оларны алгап-йөрээп: «Мээң египет чонум, Мээң холумнуң бүдүргени Ассирия, Мээң өнчүм Израиль — олар шупту Мээң ачы-буянымны алыр» — дээр.