Read Ыдыктыг Библия, 2011 Исаия 21 Bible Online

Исаия 21 - Ыдыктыг Библия, 2011 bible

Исаия 21

¹Далай чанында ээн кургаг хову дугайында өттүр билген медеглел бо-дур. Негевтиң кырында хадаан шуурганнар дег, дайзын ээн кургаг ховудан, коргунчуг черден кел чыдар.

²Түрлүг көстүүшкүннү Дээрги-Чаяакчы менче чоруткан чүве: «Өскерликчи өскерлип турар, хоозурадыкчы үптеп-хоозурадып турар. Элам, хоорайже халда! Мидия, хоорайны бүзээле! Мен ам бүгү уё-човуурну төндүрейн!»

³Ол дээш мээң мага-бодум аарышкыдан сыртылаан, божуп чыдар херээжен дег, хилинчекке алыскан мен. Дыңнаан чүвем дээш качыгдап тур мен, көрген чүвем дээш дүвүреп тур мен.

⁴Чүрээм согуу тиккиңейнип, кортканымдан сирилеп тур мен. Дыка күзенчиг турган келир үе меңээ коргуушкун бооп хуула берди.

⁵Шериг баштыңнары ширтектер чадып, стол-ширээге аъш-чем салып, ижип-чиген соонда, тура халчып келген, дозуг-камгалалдарын белеткеп алган!

⁶Дээрги меңээ: «Барып, доскуулчудан тургузуп каг. Ол көрүп турар чүвезин чугаалазын.

⁷Доскуулчу ийи аът коштаан дайынчы тергени база элчиген, теве мунган улусту көрүп каар. Ол кичээнгейлиг дыңнаалап турзун» — дээн.

⁸Доскуулчу [21]: «Дээргим! Хүннүң-не мында доскуулдап тур мен, дүнениң-не база бо черде тур мен.

⁹Көөрүмге, ийи аът коштаан дайынчы терге кел чыдыр!» — деп дыңзыдыр чугаалаан. «Ооң: „Вавилон шуут буурады! Ооң бүгү дүрзү-бурганнары черде чуура шаптырып алган чыдыр!“ — деп кыйгырганын дыңнаан мен».

¹⁰О, тараа дег бастырткан мээң чонум, сеңээ ам Аг-шериглиг Дээрги-Чаяакчы, Израильдиң Бурганындан дыңнаан чүвемни чугаалап тур мен.

¹¹Эдом [22] дугайында өттүр билген медеглел бо-дур. Улус мени Сеирден [23]: «Доскуулчу, дүн кажан төнерил? Доскуулчу, дүн кажан төнерил?» — деп айтырган.

¹²Доскуулчу: «Даң адып ор, ынчалза-даа дүн үргүлчүлевишаан-дыр. Билип алыксаар болзуңарза, катап база чедип кээп, айтырыңар» — деп харыылаан.

¹³Аравия дугайында өттүр билген медеглел бо-дур. Деданнарның [24] чиң сөөрткен тевелери, Аравияның шырыштарында хонуп ап тур силер.

¹⁴Теманың чурттакчылары, кагып-суксаан улуска сугдан бериңер; ойлап-дескен улуска аъш-чемден эккелиңер.

¹⁵Олар дээрге хынындан ужулган хылыштан, хере тырткан чадан, кадыг-дошкун дайын-чаадан дескен улус-тур.

¹⁶Дээрги меңээ: «Хөлечик кижиниң ажыл кылып эрттирер хуусаазы дег, дараазында чыл эрте бээрге, Кедарның [25] бүгү алдар-ады чиде бээр.

¹⁷Кедарның ча адар дайынчыларындан чүгле каш кижи дириг артар» — дээн. Израильдиң Бурганы Дээрги-Чаяакчының чугаалаан чүвези ол-дур.