Read Ыдыктыг Библия, 2011 Исаия 23 Bible Online

Исаия 23 - Ыдыктыг Библия, 2011 bible

Исаия 23

¹Тир хоорай дугайында өттүр билген медеглел бо-дур. Ыглап-сыктаңар, Фарсистен ээп келген корабльдар! Тир хоорай үрелип бузулган-дыр, бүдүн бажың артпаан-дыр. Ол медээ оларга китт черден чеде берген [27].

²Ыыт чок барыңар, далай эрииниң чурттакчылары, Сидон хоорайның садыгжылары! Далайга эжиндирип, байып турган силер;

³Египеттен тарааны, Шихор болгаш Нилдиң эриктеринден дүжүттү улуг делгем суглар кыры-биле сөөртүп турган силер. Хоорайыңар хөй чоннарның садыг кылыр чери турган.

⁴Сидон, далай эриинде шивээ, ам бак атка кирген-дир сен! Далай: «Эъдим аарып, божуп көрбедим. Оолдар өстүрүп, кыстар кижизитпедим!» — деп турар.

⁵Кажан Тир дугайында бо медээ Египетке чеде бээрге, египетчилер сириңейни бээр.

⁶Далай эрииниң чурттакчылары, Фарсисче көже бериңер, ыглап-сыктаңар!

⁷Тир хоорайның чурттакчыларының буттары оларны ырак черлерге турумчуп чурттаар кылдыр алгаш барып турган болгай. Шаандакы үеде үндезилеттинген, өөрүп-хөглээн хоорайыңар ам канчап барганы ол?

⁸Тирге — хааннарны дүжүлгеге олуртуп турган, садыгжылары чагырыкчылар бооп келген, садыг кылыр улузу чер-делегейде алдаржаан хоорайга — ындыг хуу-салымны кым онааганыл?

⁹Ону Аг-шериглиг Дээрги-Чаяакчы онааган: турамык, хүндүткелге ынак бүгү улустуң адын баксырадыр дээш база чер кырында бүгү алдар-аттыг улусту куду көөр дээш Ол ынчанган.

¹⁰Фарсистиң чурттакчылары, чуртуңарже эжиндирип чоруй барыңар, силерге мында өртээл чок-тур!

¹¹Дээрги-Чаяакчы Бодунуң холун далай кырынче сунарга, күрүнелер сириңейни берген. Ол Ханаанның шивээлерин бузар деп дужаал үндүрген.

¹²Дээрги-Чаяакчы: «Чазарлаттырган уруг, күжүр Сидон-кыс, моон соңгаар өөрүшкү көрбес сен! Доп-дораан китт черже [28] чоруй баар-даа болзуңза, аңаа безин амыр-дыш көрбес сен» — дээн.

¹³Халдейлер чуртунче көрүңер, ол чон ам чок-тур! Ассирия ооң черин черлик аң-меңге берипкен. Ассирийлер бүзээлел суургалары тудуп алгаш, халдейлерниң бүгү шивээлерин үрегдеп бузуп, бүгү чүвени бузундулар кылып каапкан.

¹⁴Ыглап-сыктаңар, Фарсистен ээп келген корабльдар! Силерниң шивээңер үрелип бузулган-дыр.

¹⁵Хүнү кээрге, Тир хоорай бир хаанның назыны хире хуусаада — чеден чыл дургузунда уттундура бээр. Ынчалза-даа ол чеден чыл эрте бээрге, бир ырда кирген самыын-садар херээжен-биле болган чүве Тир-биле болур:

¹⁶«Чадаганың туткаш, хоорайны эргий кези, хамык улуска кагдырган самыын-садар кыс! Кызып-кызып аянныг кылдыр ойна, хөй ырдан улай-улай ырла — улус сени сактып кээр чадавас».

¹⁷Чеден чыл эрте бээрге, Дээрги-Чаяакчы Тирже сагыш салыр. Тир база катап бодунуң садыг ажылын кылып, чер кырында бар бүгү күрүнелер-биле будалып эгелээр.

¹⁸Ындыг-даа болза, ооң орулгазы, ажык-кончаазын Дээрги-Чаяакчыга аңгылап каан болур — ону чыып, шыгжавас — ол орулганы Дээрги-Чаяакчының күзээн аайы-биле чурттап турар улусту тоттур чемгереринге база шынарлыг хепкереринге ажыглаар.