Read Ыдыктыг Библия, 2011 Исаия 26 Bible Online

Исаия 26 - Ыдыктыг Библия, 2011 bible

Исаия 26

¹Ол хүн иудей черге мындыг ыр ырлажыр: Бистиң хоорайывыс быжыглалдыг! Бурган биске камгалалды — ханалар биле камгаланыр чалды тургузуп турар.

²Эжик-хаалганы ажыдыңар, Бурганга шынчы, чөптүг-шынныг чон кирип келзин.

³Чайгылыш чок туруштуг кижиге чаагай чорукту чорудуп бээр сен, ол кижи Сеңээ идегеп турган болгай.

⁴Дээрги-Чаяакчыга кезээ мөңгеде идегеңер, чүге дээрге Дээрги-Бурган-Чаяакчы — мөңге Хая-дыр!

⁵Ол бедик черге чурттап турган улусту дүжүр октаан, оларның бедикте турар хоорайын үреп бускан — черже, довуракче дүжүр октаан.

⁶Ам ол хоорайны таптай базып турар — ядыыларның буттары, түреңгилерниң таваңгайлары ону кырлап эртип турар.

⁷Чөптүг-шынныг кижиниң оруу дорт — Сен аңаа оргу-дески орукту ажыдып бээр сен.

⁸Бис Сээң айтыышкыннарың оруу-биле чоруп ор бис, о, Дээрги-Чаяакчы, Сеңээ идегээр бис! Сээң адыңче, Сээң алдарыңче сеткил-сагыжывыс чүткүп турар.

⁹Дүне када мээң сеткил-сагыжым Сенче чүткүп турар, эртен мээң ишти-хөңнүм Сен дээш сагышсырап турар. Чер кырынга Сээң шынныг шииткелдериң илереп турда, чер-делегейниң чурттакчылары чөптүг-шынныг чорук деп чүл ол дээрзин билип аар.

¹⁰Бир эвес бузуттуг кижини өршээр болза, бодун шынныы-биле алдынмайн баар — чөптүг улустуң чуртунга ол биеэги хевээр бузут үүлгедир, а Дээрги-Чаяакчының өндүр бедиинче көрүнмес-даа.

¹¹О, Дээрги-Чаяакчы! Сээң холуң өндүр бедик-тир, а бузуттуглар ону көрбейн тур. Сээң чонуңну көөр хөңнү чок улус ону көрүп кааш, ыядып човай бээр. Сээң дайзыннарыңга доктаадып кааның от оларны чиптер.

¹²О, Дээрги-Чаяакчы! Сен биске амыр-тайбыңны хайырлап тур сен! Чедип алган бүгү чүвевисти биске Сен кылып берген сен.

¹³О, Дээрги-Чаяакчы Бурганывыс! Сенден аңгы, өске дээргилер бисти башкарып турду, ынчалза-даа бис чүгле Сээң адыңны сактып, алгап-мактап турдувус.

¹⁴Ол дээргилер өлүп калган, ам дирилбес, өлүглер оранындан туруп келбес. Сен оларны кезедип, узуткап каан сен, олар дугайында сактыышкын-даа турбас кылып каан сен.

¹⁵А чонувусту өстүрүп-көвүдеткен сен, о, Дээрги-Чаяакчы! Сен чонну көвүдеткен сен, Бодуңну алдаржыдып, чурттуң кызыгаарын делгемчиткен сен.

¹⁶О, Дээрги-Чаяакчы! Чонувус кызагдаткаш, холун Сенче сунуп турду. Сен ону кезедип туруңда, арай деп-ле сымыранып мөргүп турду.

¹⁷Иштиг херээженниң божуур бетинде хилинчектенип, алгырып чыдары дег, бис база Сээң мурнуңга ындыг-дыр бис, Дээрги-Чаяакчы.

¹⁸Бис иштиг турган бис, хилинчектенип турган бис, ынчалза-даа чүгле хат божаан бис. Чер-делегей кырынга тиилелге чедип албаан бис, ооң чурттакчылары бистиң мурнувуска кээп дүшпээн.

¹⁹Сээң өлүг улузуң дирлип кээр, өлүглерниң мөчү-сөөгү амыдыралче эглип кээр! Довуракка хөмдүрген улус, оттуп келиңер, өөрүшкүлүг ырлажыңар! Сен оларны, эртенги шалың ышкаш, сериидедир сен. Өлүглер ораны бодунуң улузун үндүрүп салыр.

²⁰Мээң чонум, бар че, бажыңыңче кирип, эжииң хаап ал! Бурганның килеңи чавырылгыжеге чедир, түр када чаштына бер.

²¹Чүге дээрге Дээрги-Чаяакчы черниң чурттакчыларын кем-буруузу дээш кезедири-биле Бодунуң турар черинден үнүп кел чыдыр. Чер ооң кырынга төпкен бүгү ханны көргүзүптер, өлүрткен улусту оон ыңай чажырбайн баар.