Read Ыдыктыг Библия, 2011 Исаия 28 Bible Online

Исаия 28 - Ыдыктыг Библия, 2011 bible

Исаия 28

¹Израиль күрүне ат болур! Ооң каас-чаражы, эзирик израильчилерниң бажында чечектен өрээн дээрбек дег, оңуп каар! Олар, турамык, улуг-чаагай улус, арагага чыттыр шаптырыпкан чыдар.

²[2-3] А Дээрги быжыг, күчүлүг кижини оларга удур томуйлап каан. Ол долулуг чайык, өлүмнүг шуурган болгаш хайнып-мөөрээн үер суу дег. Эзирик израильчилерни ооң холу черже дүжүр октаптар,

⁴ооң буттары чечектен өрээн дээрбекти таптай базар. Турамык, улуг-чаагай улустуң бажында оңган чечек эрте бышкан чимис ышкаш болур — ону көрүп каан кижи дораан үзе тырткаш, ажырыптар.

⁵Ол хүн Аг-шериглиг Дээрги-Чаяакчы Бодунуң чонунуң артынчызынга каас-чараш өрээн дээрбек азы өндүр чараш оваадай дег болур.

⁶Дээрги-Чаяакчы шүүгү черинде олурар кижиге чөптүг шииткел үндүрерин сагыш алындырар; дайзынны хаалга чанында ойтур шаап турар улуска Ол эрес-дидим чорукту хайырлаар.

⁷Арага ижип алгаш, тендирип, эзиртир суксун ижип алгаш, элеңейнип турар улустуң аразында Бурганның бараалгакчызы, медээчизи безин бар-дыр! Олар эзирээш, ол-бо тендиңнеп тур, арага оларның угаанын ээдередипкен-дир! Эзиртир суксундан угааны албаарап, көстүүшкүннеринге соора билип, частырыглыг шиитпир үндүрүп тур.

⁸Бүгү столдарны ческинчиг куску шыпкан, арыг чер артпаан!

⁹Олар: «Исайя кымны угаан киирер деп турарыл? Кымга өөредиг тайылбырлап турарыл? Чоокта чаа-ла ээп турган, иезиниң эмиинден чаа адырган чаштарга бе?

¹⁰Ооң сөстери чүгле мындыг-дыр: айтыышкын-на, айтыышкын, дүрүм-не, дүрүм, ында бичии, мында бичии» — деп турар.

¹¹Ынчангаш Дээрги-Чаяакчы ам бо чон-биле чугаалажырда, билдинмес дыл, даштыкы улус чугаазы ажыглаар.

¹²Ол ооң мурнунда чонунга: «Бо черге амыр-дыш көөр силер, турупкан улус маңаа дыштанзын. Бо — оожургал чери-дир» — деп турган. А олар дыңнаар безин хөңнү чок болган.

¹³Ам оларга Дээрги-Чаяакчының сөзү мындыг: «Айтыышкын-на, айтыышкын, дүрүм-не, дүрүм, ында бичии, мында бичии». Ынчангаш олар чорупкаш, ойта кээп дүжүп, кемдедир ужуп аар база какпага кирип, туттуруп аар.

¹⁴Дээрги-Чаяакчының сөзүн тооп дыңнаңар, кочуургактар, бо чоннуң Иерусалимде саадаан чагырыкчылары!

¹⁵Силер: «Өлүм-биле керээ чарып алган бис, өлүглер ораны-биле дугуржулга кылып алган бис. Коргунчуг үер хөме келгеш, чанывыс-биле эрте бээр; меге бистиң хоргадалывыс апарган, авыяас чүүл — чаштынар черивис» — деп турар-дыр силер.

¹⁶Ынчангаш Дээрги-Бурган-Чаяакчы мынча дээн: «Көрүңер даан, Сионга дашты салып тур мен — шилиттинген, улуг үнелиг, быжыг, бажың таваанга эң чугула дашты салыр мен. Аңаа бүзүрээн кижи мөгүдевес [31].

¹⁷Мен шынныг шииткелди — хемчээр хендир кылып каар мен, чөптүг чорукту — хынаар херексел кылып каар мен. Долу дүшкеш, силерниң хоргадалыңар болур мегени үрегдээр, чаштына берген чериңерни суглар хөме алыр.

¹⁸Силерниң өлүм-биле чарган керээңерни күш чок болдурар, силерниң өлүглер ораны-биле дугуржулгаңар буурап дүжер. Коргунчуг үер хөме келгеш, оруун силерни таварты изеп эрте бээр.

¹⁹Ол үер келген санында-ла, эртенниң-не, дүне-даа, хүндүс-даа, силерни хөме таварып, алгаш баар». Бо медээни дыңнап кааш, коргуп сирилээр силер.

²⁰Чүге дээрге орун-дөжек хөлүн эрттир кыска болур — херлип чыттынмас, чоорган хөлүн эрттир чиңге болур — шуглаттынмас.

²¹Дээрги-Чаяакчы, Перацим дагга дег, көдүрлүр, Гаваон шынаазынга дег, килеңин көргүзер — Ол туруп көрбээн ажыл-херекти кылыр, көстүп көрбээн ажыл-чорудулганы боттандырар.

²²Ынчангаш бак чүве чугаалап, кочу-шоот кылырын соксадыңар, оон башка кинчи-бегиңер оон-даа быжыг апаар! Бүгү черге узуткаашкын болурун тодарадатканын Аг-шериглиг Дээрги-Бурган-Чаяакчыдан дыңнаан мен.

²³Кулааңар ээктирип, мени дыңнаңар, мээң чугаамны кичээнгейлиг дыңнаңар.

²⁴Тараачын кижи тарылга үези кээрге, чүгле черин чарып, илииртээри-биле кызыгаарланыр ийик бе?

²⁵Чок! Ол чер кырын дескилээш, ынаар койнут үрезинин чажып, тмин тарып каар. Ол одуруглар аайы-биле кызыл-тасты, чамдык черлерге — чиңге-тараа, арбайны, а шөл кыдыынга — өске-даа үнүштерни тарып каар.

²⁶Бурганы ону сургап, ындыг чурумга өөредип турар.

²⁷Койнутту — бастырар херексел-биле, чиңге-тарааны — бастырар дугуйлар-биле бастырбас; койнутту-даа, чиңге тарааны-даа мерге-биле бастыра кагар.

²⁸А тараа баштарын бастырып тура, чуура бастырбас, бастырар терге сөөрткен аъттарны үр сүрбес, оон башка тараа чуурлуп каар.

²⁹Ол бүгү Аг-шериглиг Дээрги-Чаяакчыдан кээр: Ооң угаан-сарыылы кайгамчыктыг, мерген угааны — өндүр улуг!