Read Ыдыктыг Библия, 2011 Исаия 3 Bible Online

Исаия 3 - Ыдыктыг Библия, 2011 bible

Исаия 3

¹Аг-шериглиг Дээрги-Бурган-Чаяакчы Иерусалим биле Иудеядан аъш-чем биле ижер сугнуң бүгү курлавырын хунаап аппаар;

²дидим маадырлар база дайынчылар, шииткекчилер база Бурганның медээчилери, бүдүү билирлер база чагырыкчылар бо черге артпас;

³шериг баштыңнары база ызыгууртаннар; чөвүлекчилер, шевер усчулар болгаш билди-билиглиг илбичилер бо черге артпас.

⁴«Мен аныяк оолдарны оларга баштыңчылар кылып каар мен, чаш төлдер оларны чагырар!»

⁵Улус бот-боттарын — кижи бүрүзү өске кижини дарлаар. Аныяктар — кырганнарга, карачалдар — ызыгууртаннарга турамык чаңын көргүзер.

⁶Кым-бир кижи ачазының аалынга бодунуң төрелинден салдынмайн: «Сен тоннуг-дур сен, ынчангаш биске баштыңчы бооп көр, бо бузундуларны ээлеп чагырып көр!» — дээр.

⁷А демгизи: «Силерни экиртип шыдавас мен. Аалымда аъш-чем-даа, хеп-даа чок, мени чоннуң баштыңы кылбаңар» — деп харыылаар.

⁸Иерусалим буураар, Иудея кээп дүжер, чүге дээрге оларның сөстери биле ажыл-херектери Дээрги-Чаяакчыга удурланышкак, өндүр бедик Ону дорамчылап турар болган.

⁹Оларның арыннарының аян-шинчизи боттарынга удур херечилеп турар; олар боттарының бачыдын Содомнуң чурттакчылары ышкаш чарлаттынып, чажырбайн турар. Олар ат болур — боттарын бакка суп алган улус-тур!

¹⁰Чөптүг-шынныг улуска: «Ачы-буян алыр силер» — деп чугаалаңар, чүге дээрге олар боттарының ажыл-херээниң үре-түңнелин четтирер.

¹¹Кем-буруулуг улус ат болур! Олар холу-биле кылган ажыл-херээ дээш кеземче көөр.

¹²Мээң чонумну бичии уруглар безин кызып-кыйып турар, херээженнер чагырып турар. Мээң чонум! Сени башкарыкчыларың өскээр эдертип, алыс шын оруктан астыктырып тур.

¹³Дээрги-Чаяакчы шииткел үндүреринге белен, бүгү чоннарны [1] шиидер дээш туруп келген.

¹⁴Дээрги-Чаяакчы Бодунуң чонунуң баштыңнары болгаш нояннары-биле чаргызын чарып эгелээн: «Силер Мээң виноградым шөлүн хоозураткан силер, ядыы улустан үптеп алган эт-хөреңгиңер — бажыңнарыңарда.

¹⁵Чүү дээш Мээң чонумну кызып-кыйып, ядыы улусту дарлап турар силер?» Аг-шериглиг Дээрги-Бурган-Чаяакчының медеглээн чүвези ол-дур.

¹⁶Дээрги-Чаяакчы: «Сионнуң херээженнери турамык, мойну чооннаан, көрүжү-биле эрлер дуурайлаар, чаяңнадыр кылаштаар, кажыктарында каасталгалары дагжаар улус-тур» — дээн.

¹⁷Ынчангаш Дээрги Сионнуң херээженнериниң баштарын тазартып каар, Ол оларның тейин дөңгүрертир чүлүп каар!

¹⁸Ол хүн Дээрги оларның каасталгаларын хунаап аар: буттуң кажыктарынга кедер чараш илчирбежигештерин, хүн база чартык ай хевирлиг каасталгаларын,

¹⁹сыргаларын, билектээштерин, баш шывыгларын болгаш шарыгларын, илчирбежигештерин, курларын, чаагай чыттыг чүүлдерлиг саважыгаштарын, чавагаларын,

²⁰билзектерин, думчукка азар дээрбектерин,

²¹аянныг хевин, каъттангыларын, тоннарын, акша хаптарын,

²²көрүнчүктерин, каас-коя иштики хептерин, бөрттерин болгаш баш аржыылдарын хунаап аар.

²³Оларга чаагай чыттыг чүүл орнунга бак чыт турар, кур орнунга — хендир, каас-коя хеп орнунга — качыгдалдың самдар хеви, чараш арын-шырай орнунга — дорамчылал демдээ турар [2].

²⁴Иерусалим, сээң эр улузуң хылышка шаштырып аар, эрес-маадыр улузуң дайын-чаага кырлып каар.

²⁵Хоорайның хаалгалары ыглап-сыктап, хомудаар, Иерусалим-кыс хоозурап, черге олуруп аар.