Read Ыдыктыг Библия, 2011 Исаия 30 Bible Online

Исаия 30 - Ыдыктыг Библия, 2011 bible

Исаия 30

¹«Чөрүү ажы-төлүм ат болур! — деп, Дээрги-Чаяакчы медеглээн. — Олар Менден келбээн бодалдар күүседип, Мээң оларның сагыжынга киирбээним керээлер чарып, бачытка бачыт немеп турар-дыр.

²Олар Менден сүме айтырбайн, Египеттен барып дуза дилээр-дир; фараоннуң камгалалының адаанга чаштынарын, Египеттиң хөлегезинге чаглактанырын күзеп турар-дыр.

³Ынчалза-даа фараоннуң камгалалы оларның адын бакка сугар, Египеттиң хөлегези оларның ат-алдарын баксырадыр.

⁴Оларның нояннары Цоанда турумчуп алган, элчиннери Ханесте чедип келген.

⁵Дөмей-ле олар бак атка кирер, чүге дээрге египет чон оларга ажык-дуза чок бооп, дузалап-даа, деткип-даа шыдавас, олар чүгле адын баксырадып, эпчок байдалга таваржыр.

⁶Ээн кургаг Негев ховузунда малдар чүък сөөртүп чоруур. Араатан аңнар, арзылаңнар, шагар чыланнар, ок-чыланнарлыг, кижиге чурттаары аар-берге черде элчиннер бай-байлаан элчигеннерде, эртине-байлаан — тевелер мөгеннеринде артып алган, бир-ле чонга белек кылдыр сөөртүп аппар чыдар, ынчалза-даа ол чон оларга ажык-дуза катпас.

⁷Египеттиң дузазы чөгенчиг, аргажок болур. Ынчангаш Мен ону „Чаажыккан Рахав“ [33] деп адап каан мен.

⁸Барып, чонга бо сөстерни самбыражыгашка шыйып бер, дүрүг-номга бижип бер — олар келир үеде херечилел кылдыр кезээ мөңгеде кадагалаттынып артсын.

⁹Бо дээрге чагырга билбес чон-дур, мегечи ажы-төл-дүр. Дээрги-Чаяакчының хоойлузун дыңнаар хөңнү чок ажы-төл-дүр.

¹⁰Олар Бурганның медээчилеринге: „Өттүр көөрүн соксадыңар!“ — деп, өттүр көөр улуска: „Биске шынныг өттүр билген медеглелдер херек чок! Биске чүгле мактал чугаалап, меге көстүүшкүннер медеглеңер.

¹¹Оруктан чайлай бериңер, бо орук-чолдан өскээр ээптиңер, Израильдиң ыдыктыг Бурганының дугайында биске моон соңгаар сагындырбаңар!“ — деп турар».

¹²Ынчангаш Израильдиң ыдыктыг Бурганы: «Бир-тээ бо сөзүмнү хүлээвээн, күчүлел биле мегеге идегээн болганыңарда,

¹³бо бачыт силерге хенертен, карак чивеш дээр аразында буступ кээп дүжер бедик ханада тиг дег боор.

¹⁴Силер дой сава ышкаш буступ каар силер. Силерни кам-хайыра чогу-биле буза шаапкан болгаш, бузундулар аразында одагдан көс уштуп аар азы хөөлбектен суг узуп аар хире безин бузунду тывылбас» — деп чугаалаан.

¹⁵Дээрги-Чаяакчы, Израильдиң ыдыктыг Дээргизи: «Силерниң камгалалыңар — Менче эглип келгеш, дүвүрел чок боорунда; силерниң күжүңер — сагыш амыр боорунда, Меңээ идегээринде» — дээн. Ынчалза-даа силер ындыг боорун күзевейн бардыңар.

¹⁶Силер: «Чок, аът мунуп алгаш, дезе бээр бис!» — дээн силер. Ам канчаар, дезер болган-дыр силер. «Дүвү-далаш ыңай боор бис!» — дээн силер. Ам канчаар, дайзын силерни дыка дүрген сүрүп чедер болган-дыр!

¹⁷Силерге чаңгыс кижи кыжанырга, муңуңар дезип ыңай боор, беш кижи кыжанырга, шупту дезе бээр силер, дириг арткан улузуңар даг кырында адагаш дег, тей кырында тук дег чааскаанзыргай болур.

¹⁸А Дээрги-Чаяакчы элээн манааш, силерге өршээл көргүзер, Ол туруп келгеш, силерже ээ көрнүр. Чүге дээрге Дээрги-Чаяакчы — чөптүг Бурган-дыр. Аңаа идегээр бүгү улус амыр-чыргалдыг!

¹⁹О, Сионда, Иерусалимде чурттаан чон! Карааңар чажы акпастай бээр. Дээрги-Чаяакчыдан камгалал дилеп кыйгырарыңарга, Ол силерже ээ көрнүр. Силерни дыңнап кааш-ла, Ол харыылаар.

²⁰Дээрги силерни кызагдалдың хлеви-биле чемгерер, силерге айыыл-халаптың суун ижиртир, ындыг-даа болза, силерниң Башкыңар оон ыңай чаштынмас; силер Башкыңарны карааңар-биле көрүп каар силер.

²¹Дорт оруктан кайнаар-даа өскээр ээпкеш, артыңарда: «Орук бо-дур — ону истеп чоруңар!» — дээн үннү дыңнап каар силер.

²²Ынчан силер мөңгүн-биле шап каан дүрзү-бурганнарыңарны, алдын-биле шап каан кылымал дүрзүлериңерни бужар чүвелер деп санаар силер; оларны арыг эвес чүүлдер дег үндүр октапкаш, «Ыңай чоруңар!» дээр силер.

²³Силерниң черже чашкан үрезиниңерже Бурган чаъс чагдырар. Черниң беримче-дүжүдү элбек, чаагай болур. Ол хүн силерниң мал-маганыңар делгем одар-белчиирге оъттаар.

²⁴Чер чарып турар буга, элчигеннерни хүүрек болгаш айыыр-биле аңдара каап, челбээн дустуг силос-биле чемгерер.

²⁵Бедик даг бүрүзүнден, бүгү бедик тейлерден дамырактар, суглар агып бадар. (Ол хүн коргунчуг кыргып-хыдыышкын база болур, суургалар буступ кээп дүжер.)

²⁶Айның чырыы хүннүү дег апаар, а хүн чеди катап чырык кылдыр, чеди хүннүң чырыы-биле чырыда бээр. Дээрги-Чаяакчы Бодунуң чонунуң балыын шарып бээр, ооң кемдээшкиннерин экиртир хүнде ындыг болур.

²⁷Дыңнаңар, Дээрги-Чаяакчының өндүр чырыы ырактан чоокшулап кел чыдыр! Ооң килеңи кыптыгарга, чалбыыжы кижи шыдажыр аргажок-тур! Ооң аксын килең долган, Ооң дылы — хөме алыр от-ла!

²⁸Ооң тыныжы — моюнга чедир көдүрлүп кээр үер суу дег. Ол чоннарны өлүмнүң шишкиижинге шишкиир — аймактарның аксынга оларны оруундан өскээр аппаар чүген суп каан боор.

²⁹Бурганның чону, силер ыдыктыг байырлал демдеглээн дүне дег, ырлажыр силер. Дээрги-Чаяакчының даанче, Израильдиң Хаязынче лимби-биле ойнап бар чыдар улустуң чүрээ дег, силерниң чүрээңер өөрүп-байырлаар.

³⁰Дээрги-Чаяакчының түрлүг үнү дыңналыр, Ооң холу көстүп келгеш, согуушкун кылыр. Ооң килеңи кедергей болур — чалбыыш өрү окталып, от хөме алыр, чайык куттулуп, шуурганнаар, долу дүжер.

³¹Дээрги-Чаяакчының үнү Ассирияны сүртедир; Ол ону Бодунуң мергези-биле согар.

³²Дээрги-Чаяакчы дамбыралар болгаш чадаганнар-биле үдедип, ону катап-катап кеземчениң мергези-биле согар. Ол ооң-биле дайылдажып, ону кезедип, холун көдүрер.

³³Мөчү-сөөктер өрттедир оңгар шагда-ла манай берген, Ассирияның хаанын хүлээп аарынга белен. Ханы болгаш калбак оңгарда улуг одагны салып каан, ында от өөскээн, хөй ыяш чыгдынган. Дээрги-Чаяакчының тыныжы ыяшты, чалбыышталган күгүр дег, кыпсыптар.