Read Ыдыктыг Библия, 2011 Исаия 31 Bible Online

Исаия 31 - Ыдыктыг Библия, 2011 bible

Исаия 31

¹Дуза дилеп, Египетче барып турар улус ат болур! Олар аъттарга ынанып, дайынчы тергелерниң хөйүнге, аъттыг шеригниң улуг күжүнге идегеп турар-дыр, а Израильдиң ыдыктыг Бурганынче көрүнмес-тир, Дээрги-Чаяакчыдан сүме айтырбас-тыр.

²А Ол мерген угаанныг — айыыл-халапты Ол ыдыпкан, Бодунуң аазаашкынын күш чок болдурбаан. Ол бузуттуг төрел бөлүкке удур, кем-буруулуг улустуң дузалакчыларынга удур көдүрлүр.

³Египетчилер дээрге Бурган эвес, кижилер-дир, оларның аъттары — мөңге сүлде эвес, өлүр тынныг амытаннар-дыр. Дээрги-Чаяакчы кезедир дээш холун сунарга, Израильге дуза көргүзүп келген египетчилер тептиге бээр, олардан дуза ап турганнар база кээп дүжер — олар шупту кады узуткаттырар.

⁴Дээрги-Чаяакчы меңээ мынча дээн: «Арзылаң дег, кажан ол бодунуң олча-тывыжының кырынга ырланып турда, аңаа удур чеже-даа хөй кадарчы чыглып кээрге, оларның алгы-кышкызы, шимээн-даажындан кортпазы дег, Аг-шериглиг Дээрги-Чаяакчы база бедик Сион даг дээш тулчуру-биле дүжүп кээр.

⁵Аг-шериглиг Дээрги-Чаяакчы, уязының кырында ушкан куш дег, Иерусалимге болчуп, ону карактаар — Ол ону кадагалап, адырып хостаар, ээ-хайыра көргүзүп, камгалаар.

⁶Израильчилер, кедергей кызып ойталааныңар Бурганче эглип келиңер!

⁷Ол хүн силер шупту кем-буруулуг холуңар-биле кылып алган алдын, мөңгүн дүрзү-бурганнарыңарны көөр хөңнүңер чок апаар силер.

⁸Ассирийлер хылыштан кырлып каар, ынчалза-даа кижиниң хылыжындан эвес! Оларны селеме өлүр шанчар, ынчалза-даа кижи амытанның селемези эвес. Олар дайын-чаадан дезип маңнажыр, оларның хып дээн чалыы оолдарын кул кылдыр тудуп алгаш баар.

⁹Коргуушкунга алыскаш, оларның чөленгиижи чиде бээр; оларның шериг баштыңнары боттарының тугун каапкаш, коргуп-сүртеп дезе бээр» — деп, Дээрги-Чаяакчы медеглээн. Ооң оду Сионда хып турар, Ооң одаа — Иерусалимде.