Read Ыдыктыг Библия, 2011 Исаия 32 Bible Online

Исаия 32 - Ыдыктыг Библия, 2011 bible

Исаия 32

¹Хаан шынныы-биле хааннай бээр, чагырыкчылар чөптүү-биле чагырар.

²Оларның кайызы-даа хаттан хоргадаар чер, шуургандан чаглак, суг чок черде аккан суг, кагып-суксаан черде улуг хая хөлегези дег болур.

³Карактыг улустуң карактары ам-на тода көре бээр, кулактыг улустуң кулактары ам-на дыңнап каар.

⁴Будулчак угаан орталаны бээр, келдир улус дүрген, тода чугаалап эгелээр.

⁵Ам мугулай кижини хүндүткелдиг кижи дивес, дүржок кижини ат-алдарлыг кижи дивес.

⁶Чүге дээрге мугулай кижи мелегей чүве чугаалаар, ооң угааны бузуттуг үүлгедиг бодаар; ооң ажыл-херээ чүдек-бужар болур, Дээрги-Чаяакчының дугайында ол шын эвес чүве чугаалаар. Аштаан кижиге ол аъш-чем бербес, суксаан кижиге суг ижиртпес.

⁷Дүржок кижи хоралыг үүлгедиглер кылыр, ооң бодалы кара сагыштыг — ядыы кижи шииткел черинге шынын чугаалап-даа турза, ону меге-биле чок кылып каар.

⁸А хүндүткелдиг кижиниң сагыжы ак, ол чаагай сеткилдиг херектер кылганда, туруштуг.

⁹Сагыш амыр херээженнер, ам мени дыңнаңар! Тоор чүвези чок кыстар, чугаа-сөзүмче кичээнгейден салыңар!

¹⁰Тоор чүвези чок херээженнер, бир чыл бичии ажарга, сириңейни бээр силер, чүге дээрге виноград чимизи чыыр үе эрте бээр, а ажаар дүжүт чок боор.

¹¹Сагыш амыр херээженнер, сүрээдеңер, тоор чүвези чок кыстар, сирилеңер! Хевиңер уштуп октапкаш, качыгдал хевин орааттынып алыңар.

¹²Хөрээңер шаштынып, үнүш үнүүчел шөлдер дээш база элбек чимистиг виноград сыптары дээш кажыыдаңар;

¹³мээң чонумнуң чери дээш кажыыдаңар, аңаа ам чүгле тенниг бок үнүш өзер. Хөглүг чораан бүгү бажыңнар дээш, өөрүп-байырлап турган хоорай дээш кажыыдаңар.

¹⁴Чүге дээрге орду кагдынар, шимээнниг хоорай ээнзирээр; дагда шивээ биле доскуул турар суурга кезээ шагда ээн чер апаар — аңаа черлик элчигеннер амыр-шөлээн турар, сүрүг мал ону одар-белчиир кылып аар.

¹⁵Оон Бурганның Сүлдези чонувусту өрүтен бүргээр, ээн кургаг хову сесерлик апаар, а сесерлик арга-эзим ышкаш көстүр.

¹⁶Ээн кургаг ховуга шынныг шииткел турумчуур, чимистиг сесерликке чөптүг чорук туруп аар.

¹⁷Чөптүг чоруктуң үре-түңнели амыр-тайбың болур, шынныг чорук оожургал биле айыыл чок чорукту кезээ мөңгеде доктаадыр.

¹⁸Мээң чонум тайбың суурларга, айыыл чок оран-саваларга, дүвүрээзин чок черлерге чурттаар.

¹⁹(Арга-эзимни долу чылча согар, а хоорайны ол таваанга чедир буза шаап каар!)

²⁰Амыр-чыргалдыг боор силер: бүгү суглуг черлерге үрезин чажар силер, бода малыңарны база элчигеннериңерни каяа-даа кадарып болур силер.