Read Ыдыктыг Библия, 2011 Исаия 33 Bible Online

Исаия 33 - Ыдыктыг Библия, 2011 bible

Исаия 33

¹Узуткаашкынга таварышпаан узуткакчы, ат болур сен! Өскерлиишкинге таварышпаан өскерликчи, ат болур сен! Узуткаашкын кылганың соонда, сени база узуткап каар; өскерлиишкин кылганың соонда, улус сеңээ база өскерлир.

²О, Дээрги-Чаяакчы, бисче ээ көрнүп көрем, Сеңээ идегээр болгай бис! Эртенниң-не бисти деткип көрем, аар-берге үеде камгалап көрем.

³Сээң түрлүг шимээниң дыңнааш, чоннар дезип тур; Сен көдүрлүп кээриңге, аймактар тарай маңнажып тур.

⁴Чоннар, дайзын силерниң араңарга олча-тывышты шартылаа ышкаш чыыр, шерги ышкаш, олче хөме шурай бээр!

⁵Дээрги-Чаяакчы өрү көдүрткен, Ол дээрлерниң эң бедиинде чурттап турар. Ол шынныг шииткел биле чөптүг чорукту Сионга доктаадыр.

⁶Чонунуң назынының дургузунда Ол аңаа быжыг үндезин болур. Мерген угаан, билиг болгаш камгалалды Ол элбээ-биле хайырлап турар! Дээрги-Чаяакчыдан коргуушкун — чоннуң эртине-байлаа-дыр.

⁷Көр даан, эрес-маадыр улус кудумчуларда качыгдалдан алгыржып тур, тайбың дилеп чоруткан элчиннер ыглап-сыктап тур.

⁸Оруктар ээнзирээн, чорук кылган улус көзүлбестээн. Дугуржулгалар үреттинген, даңгырактар [34] уттундурган, кижилер чүү-даа эвес апарган.

⁹Чер качыгдап, харыксырап чыдар, Ливан дагларының ады баксырап, кадып калган. Шарон оргулаажы ээн кургаг ховуга дөмейлежип, Васан биле Кармил девискээрлери сириңейнип турар.

¹⁰«Мен ам туруп кээр мен — деп, Дээрги-Чаяакчы чугаалап тур, — ам көдүрлүр мен, өрү бедиир мен!

¹¹Чоннар, силер кургаг сиген-биле саатталгаш, тараа саваңы божуп тур силер. Боттарыңарның-на тыныжыңар боттарыңарны от дег чиптер!

¹²Чоннар хүлдендир өрттенип каар, одура кескеш, отта өрттеткен тенниг чадаң үнүш дег апаар.

¹³Ыракта улус, Мээң чүнү кылыр деп турарымны дыңнаңар, чоокта улус, силер база Мээң күчү-күжүмнү билип алыңар!»

¹⁴Сионда турар бачыттыглар корга берген, бужар-бак улус сүрээделге алзыпкан: «Хөме ап турар от чанынга бистиң кайывыс чурттап шыдаарыл? Өшпейн хып турар өрт чанынга бистиң кайывыс чурттап шыдаарыл?»

¹⁵Чүгле мындыг кижи: ажыл-херээнге чөптүг-шынныг база шынын чугаалаар; кызагдал-биле чедип алган ажык-кончаа алырындан ойталаар; хээли алыр дээш, холун сунмас; өлүрүүшкүнге киржилге дугайында чугаалар дыңнавас дээш, кулаан бөөшкүннеп аар; бузут үүлгедиишкини көрбес дээш, караан шийип аар кижи ынчап шыдаар.

¹⁶Ындыг кижи бедиктерге чурттаар: ооң хоргадалы — чагдаар аргажок хаялар; ол аъш-чемниг боор, ооң суу база төнмес.

¹⁷Сээң карактарың бодуңнуң хааныңны чайынналчак кылдыр көрүп каар, ыракта чаттылган черни база көрүп каар.

¹⁸Биеэги коргуушкунуңну сактып келгеш, кайгап-хараар сен: «Үндүрүг санап база деңзилеп турган дүжүметтер кайыл? Суургалар хынап көрүп турган шериглер кайыл?»

¹⁹Ол турамык, тода чугаалай албас, элдептиг база билдинмес дылдыг чонну оон ыңай көрбес сен.

²⁰Бистиң байырлалдарывыс болуп турар Сион хоорайже көрүп көр, карактарыңны Иерусалимче шиглей көр! Оожум оран-сава, туружундан шимчевес майгын бо-дур; ооң өргеннери ушта тырттынмас быжыг, хендирлериниң чаңгызы-даа үстүр ужур чок.

²¹Аңаа өндүр улуг Дээрги-Чаяакчы бис-биле кады болур — ол чер болза аккан суглар, калбак хемнерниң чурту болур, аңаа эшкииштиг чаңгыс-даа улуг хеме көзүлбес, чаңгыс-даа улуг-чаагай корабль олап эжиндирип эртпес.

²²Дээрги-Чаяакчы — бистиң Баштыңчывыс, Дээрги-Чаяакчы — бистиң Чагырыкчывыс, Дээрги-Чаяакчы — бистиң Хаанывыс, Ол бисти камгалаар.

²³Корабльдарның хендирлери кошкай берген, мачтаны тудуп, парусту хере тыртып шыдавас апарган. Ынчан арбын олча-тывыш үлешке кирер, аскак кижилер безин үп сүрүп чоруптар.

²⁴Черивистиң чурттакчыларындан кым-даа: «Мен аарып тур мен» — дивес; ында чурттап турар чоннуң бачыттары өршээттинер.