Read Ыдыктыг Библия, 2011 Исаия 39 Bible Online

Исаия 39 - Ыдыктыг Библия, 2011 bible

Исаия 39

¹Ол үеде Валаданның оглу, Вавилоннуң хааны Меродах-Валадан Эзекияның аарааш, экирий бергенин дыңнап кааш, олче чагаа база белектер чорудупкан.

²Эзекия элчиннерни өөрүшкүлүг хүлээп алгаш, оларга эртине-байлак шыгжаар черин көргүскен: алдын-мөңгүннү, чаагай чыттыг чүүлдер биле улуг үнелиг үстерни, ок-чепсек шыгжаар бүгү черни — бодунуң шыгжамырларында бар-ла бүгү чүвени көргүскен. Эзекияның ордузунда-даа, бүгү күрүнезинде-даа ооң оларга көргүспээн чүвези артпаан.

³Исайя медээчи Эзекия хаанга чедип келгеш: «Ол улус сеңээ чүнү чугаалады, олар кайыын келген-дир?» — деп айтырган. «Ырак чурттан — деп, Эзекия харыылаан. — Олар меңээ Вавилондан кээп чорду».

⁴Медээчи: «Олар сээң ордуңда чүнү көрдү?» — деп айтырган. «Олар мээң ордумда бүгү чүвени көрдү! — деп, Эзекия харыылаан. — Мээң эртине-байлак шыгжаар черлеримде оларга көргүспээн чүвем артпады».

⁵Ынчан Исайя Эзекияга: «Аг-шериглиг Дээрги-Чаяакчының сөзүн дыңна:

⁶„Сээң ордуңда бар бүгү чүвени, сээң ада-өгбеңниң бөгүнге чедир чыып алган бүгү чүвезин Вавилонче алгаш баар хүннер кээр, маңаа чүү-даа артпас — деп, Дээрги-Чаяакчы чугаалаан. —

⁷Сээң төрүткен, сээң ботталдырган үре-салгалыңның чамдыызын тудуп алгаш баар, олар Вавилоннуң хаанының ордузунга акталаткан чалчалар апаар“» — дээн.

⁸А Эзекия Исайяга: «Сээң меңээ дамчытканың Дээрги-Чаяакчының сөзү эки-дир» — дээн. Чүге дээрге хаан «Мээң бодумнуң назынымда амыр-тайбың, айыыл чок чорук үргүлчүлээр-дир» деп бодапкан чүве-дир.