Read Ыдыктыг Библия, 2011 Исаия 41 Bible Online

Исаия 41 - Ыдыктыг Библия, 2011 bible

Исаия 41

¹«Ырак ортулуктарның чурттакчылары, Мээң мурнумга ыыт чок барыңар! Бүгү чоннар чаа күштен немеп алзын; олар чоокшулап келгеш, бодунуң сөзүн чугаалазын. Чаргы үзер дээш кады чыглыылыңар.

²Кым чөөн чүктен тиилекчини [41] үндүрүп эккелгеш, бодунга бараан боор кылдыр кыйгырып алганыл? Кым аңаа чоннарны хүлээдип берип, хааннарны чагыртканыл? Ол кижи бодунуң хылыжы-биле оларны доозун-довуракче хуулдуруп, бодунуң ча-согуну-биле, тараа саваңы дег, эстедир хадыдып турар.

³Ол кижи мурнунда кажан-даа чоруп көрбээни орук-биле айыыл чок чоруп, чоннарны истеп-сүрүп бар чыдар.

⁴Кым ол бүгүнү кылып, боттандырганыл? Эң эгезинден кижи төрелгетенниң бүгү салгалдарын башкарып турар Бурган! Мен, Дээрги-Чаяакчы — эгезинде турган мен, сөөлгү салгал-биле база Мен — ол-ла Бодум кады турар мен!

⁵Ырак ортулуктарның чурттакчылары ол кижини көрүп кааш, коргуушкунга алзыпкан, чер-делегейниң ужу-кыдыы сүрээдей берген. Олар чоокшулажып, чыылганнар.

⁶Бот-боттарынга дузалажып, бирээзи өскезинге: „О, эрес-дидим бол!“ — деп турганнар.

⁷Ус-шевер кижи эзилдирикчи шеверниң сеткилин сергедип турар, маска-биле хевилээр кижи дөжүде дарганнаан кижиниң сеткилин сергедип, тудуштур каңнап каан черин „Эки-дир, быжыг-дыр!“ деп, дүрзү-бурган божаңнавазын дээш, өрген-биле быжыглап турар.

⁸О, Мээң чалчам Израиль, Мээң шилип алганым Иаков, Мээң өңнүүм Авраамның салгалы!

⁹Мен сени чер-делегейниң ужу-кыдыындан эдерткеш, эң ырак черлерден үндүр кыйгырып алгаш: „Сен — Мээң чалчам сен“ — деп чугаалаан мен. Сени шилип алган мен, сенден ойталавас мен.

¹⁰Кортпа, чүге дээрге Мен — сээң Бурганың-дыр мен, сүрээдеве, чүге дээрге Мен сээң-биле кады мен. Сени быжыктырып, сеңээ дузалаар мен. Мээң тиилелгелиг холум сеңээ деткимче көргүзер.

¹¹Сеңээ килеңнээн бүгү улус бак атка кирип, бужартаар, сеңээ удурланган улус чүү-даа эвес апаар, өлүп чидер.

¹²Сээң-биле демисежип турган улусту дилээш, тыппас сен; сээң-биле дайылдажып турган улус чүү-даа эвес апаар, шуут чиде бээр.

¹³Мен — Дээрги-Чаяакчы, сээң Бурганың-дыр мен, холуңдан тудуп алгаш: „Кортпа, Мен сеңээ дузалаар мен“ — деп аазап тур мен.

¹⁴Кортпа, курт ышкаш чөгенчиг Иаков, эвээш чоннуг Израиль, Мен сеңээ дузалаар мен! — деп, Дээрги-Чаяакчы, сээң Камгалакчың, Израильдиң ыдыктыг Бурганы медеглээн. —

¹⁵Мен сени чаа, чидиг диштерлиг тараа бастырар херексел кылып каар мен, сен дагларны бастырып, чуура дүрбүүр сен, тейлерни тараа тогланчызы дег кылып каар сен.

¹⁶Сен оларны челбиириңге, хат хадып аппаар, шуурган тарадыр шаап кааптар. А сен бодуң Дээрги-Чаяакчы дээш өөрүүр сен, Израильдиң ыдыктыг Бурганы дээш мактаныр сен.

¹⁷Ядыы-түреңги улус суг дилээш, тыппайн турар, олар кагып-суксааш, аксы кургап калган. Мен, Дээрги-Чаяакчы, оларга харыы бээр мен; Мен, Израильдиң Бурганы, оларны кагбас мен!

¹⁸Тас тейлерден суглар агып бадар, оргу черлерге суг баштары аттыгып үнер. Ээн кургаг ховуну хөл кылып каар мен, кургап калган черни суг баштары шыва аптар.

¹⁹Мен ээн кургаг ховуга пөш, акация, мирт болгаш олива ыяштарын тарыыр мен; ыяш чок турган черге шиви, чойган болгаш хады кады өзүп үнер.

²⁰Улус ол бүгүнү көргеш, Дээрги-Чаяакчының холу ону кылган деп, Израильдиң ыдыктыг Бурганы ону чаяаган деп билип каар, ол бүгүнү эскергеш, угаап билип каар.

²¹Дүрзү-бурганнар, боттарыңарның херээңерни илередип чугаалаңар — деп, Дээрги-Чаяакчы чугаалап тур. — Боттарыңарның барымдааларыңарны көргүзүңер — деп, Израильдиң Хааны чугаалап тур. —

²²Барымдаа кылдыр ам болур ужурлуг чүвени чугаалаңар. Азы эрткен үеде чүү болуп турганын чугаалаңар, а бис угаап бодап көргеш, ол бүгүнүң канчаар төнгенин билип аар бис. Азы келир үе дугайында биске боттарыңар чугаалап бериңер.

²³Келир үеде чүү болурун чугаалаңар, ынчан силерни бурганнар деп билип аар бис. Бир-ле чүведен — буян-даа болза, айыыл-халап-даа болза — кылыңар, ону көргеш, бис шупту коргуушкунга бүргедип аар бис.

²⁴Че чүл? Силер чүү-даа эвес-тир силер, чүнү-даа кылыр харыыңар чок-тур. Силерни шилип алган кижи чүдек-бужар-дыр.

²⁵Мен демги тиилекчини соңгу чүктен кыйгырган мен, ол кел чыдар! Хүн үнер чүкке ол Мээң адымны адап, алдаржыдар. Ол чагырыкчыларны малгаш ышкаш базып кылаштаар — дой сава кылыкчызы дойну ынчаар таптай базар.

²⁶Бисти ол дугайында билип алзын дээш, кым баш бурунгаар чугаалааныл; бисти: „Ооңуу шын болду“ — деп чугаалаар кылдыр, кым баштай дамчытканыл? Араңардан кым-даа чугаалаваан, кым-даа медээлевээн. Чугаа-сөзүңерни дыңнаан кижи чок.

²⁷Мен ол дугайында Сионга эң баштай чугаалаан мен, Иерусалимче буянныг медээлиг медээчини чоруткан мен!

²⁸Мен көөрүмге, кым-даа чок болду — өске бурганнарның аразында сүмелекчи чок болду. Мен олардан чүве айтырар болзумза, харыылап шыдавастар.

²⁹Олар шупту — меге-дир, оларның ажыл-херээ — чүү-даа эвес-тир, оларны көргүскен дүрзүлер — хат дег хоозун чүүл-дүр».