Read Ыдыктыг Библия, 2011 Исаия 45 Bible Online

Исаия 45 - Ыдыктыг Библия, 2011 bible

Исаия 45

¹Дээрги-Чаяакчы Бодунуң шилип алганы Кирге мынча дээн: «Мен сени холуңдан чедип алгаш, чоннарны сеңээ чагыртып, хааннарның ок-чепсээн хунаап ап, сээң мурнуңга эжиктерни ажыдып чоруур мен — хаалгалар сени доктаадып шыдавас.

²Мен Бодум сээң орууң баштап, дагларны дескилээр мен; хүлер хаалгаларны буза шаап, демир дээктерни үрээр мен.

³Мен сеңээ дүмбей караңгыда шыгжаттынган, чажырып каан бай-байлакты бээр мен. Ынчан Мен — Дээрги-Чаяакчы, Израильдиң Бурганы — сээң адың адап, сени кыйгырып турарымны билип аар сен.

⁴Мээң чалчам Иаков дээш, Мээң шилип алганым Израиль дээш, Мен сени, Мени билбес-даа болзуңза, адың адап кыйгырып, хүндүлелди сеңээ көргүзүп турар мен.

⁵Мен — Дээрги-Чаяакчы мен, өске кым-даа чок, Менден өске Бурган чок! Сен Мени билбес-даа болзуңза, сени күш киирер мен —

⁶ынчан хүн үнер чүкте-даа, хүн ажар чүкте-даа улус Менден өске кым-даа чогун билип аар. Мен — Дээрги-Чаяакчы мен, өске кым-даа чок!

⁷Мен чырыкты бар болдуруп, дүмбей караңгыны чаяап турар мен, чаагай чорукту хайырлап, айыыл-халапты боттандырып турар мен. Ол бүгүнү Мен, Дээрги-Чаяакчы, кылып турар мен!

⁸Дээрлер, өрүтен чөптүг чорук төгүңер, ол шынныг чорук булуттардан төгүлзүн; чер кырынга камгалал үнүп келзин, чөптүг-шынныг чорук ооң-биле кады чечектелзин. Мен, Дээрги-Чаяакчы, ол бүгүнү бар кылдыр кылып турар мен.

⁹[9-10] Дой сава ону кылып турар усчу кижиге: „Чүнү кылып тур сен?“ — дээр бе? Азы бүдүрүп каан чүүлүң сээң дугайында: „Бо кижиниң холу чок!“ — дээр бе? Ачазынга: „Мени чүге ындыг кижи кылдыр төрүдүп каан сен?“ — дээр азы авазынга: „Мени чүге ындыг кижи кылдыр божуп каан сен?“ — дээр кижи ат болур. Бузундунуң бузундузу боор, дойдан бүткен боду-ла, бодунуң Чаяакчызы-биле сөс каржып турар кижи ат болур!»

¹¹Дээрги-Чаяакчы, Израильдиң ыдыктыг Боттандырыкчызы мынча дээн: «Таанда-ла силер Менден келир үе дугайында айтырар силер бе? Мээң ажы-төлүмге азы Мээң холум-биле кылган чүвемге хамаарыштыр Меңээ айтыышкын бээр силер бе?

¹²Мен черни бар болдуруп, ооң кырынга кижи төрелгетенни чаяап каан мен! Мен Бодумнуң холум-биле дээрни хере чаткаш, ооң бүгү аг-шериинге тыптып кээрин дужааган мен.

¹³Мен чөптүг-шынныг чорук боттандырар дээш Кир хаанны тургузуп каан мен, ооң бүгү оруктарын ажык кылып бээр мен. Ол Мээң хоорайымны катап тудар, туттуруушкунче аппарган Мээң чонумну кандыг-даа төлевир азы белек албайн хостаар». Аг-шериглиг Дээрги-Чаяакчының чугаалаан чүвези ол-дур.

¹⁴Дээрги-Чаяакчы: «Египеттиң олча-ажыы, Эфиопияның орулгазы болгаш узун, сөөккүр сева чон сенче шилчип, сээңии апаар, Израиль. Олар сени эдерер, кинчи-бектиг чедип кээр, сеңээ сөгүрүп: „Бурган чүгле сээң-биле кады-дыр, өске кым-даа чок-тур, оон өске Бурган чок-тур!“ — деп ээрежип чанныр» — дээн.

¹⁵Сен, шынап-ла, ажыт-чажыт Бурган-дыр сен, Израильдиң Бурганы, Камгалакчызы-дыр сен.

¹⁶Дүрзүлер кылып турар бүгү улус кады бак атка кирип, бужартаар — олар шупту алдар-адын баксырадып алган чоруур.

¹⁷А Израильди Дээрги-Чаяакчы камгалаар, аңаа кезээ мөңгеде камгалалды хайырлаар! Силер моон соңгаар кезээ шагда бак атка кирбестеп, бужартавас силер.

¹⁸Дээрни чаяап каан Дээрги-Чаяакчы (Ол — черни овур-хевирлиг кылып, быжыктырып тургускан Бурган-дыр; чер ээн турбазын, аңаа кижилер чурттазын дээш, Ол ону чаяап каан) мынча дээн: «Мен — Дээрги-Чаяакчы мен, өске кым-даа чок!

¹⁹Мен чажыды-биле, дүмбей караңгы черге тургаш, чугаалаваан мен, Израильдиң үре-салгалынга: „Мени ээн черлерден дилеңер!“ — дивээн мен. Мен, Дээрги-Чаяакчы, шынныг сөс чугаалап, алыс шынны медеглеп турар мен.

²⁰Силер, чоннарның артынчылары, чыглып алгаш, чедип келиңер, бөлдүнчүп алгаш, чоокшулап келиңер. Ыяш дүрзүлер эдилеп, камгалал бербес бурганнарга мөргүп турар улустуң билир чүвези чок-тур.

²¹Боттарыңарның херээңерни чугаалап, шынзыдыңар (боттарыңар араңарда сүмележип алыңар). Болган чүүл дугайында силерге кым баш бурунгаар чугаалааныл, кым эрте шагда-ла медеглээнил? Мен — Дээрги-Чаяакчы! Менден өске Бурган чок, Мен — чөптүг Бурган, Камгалакчы мен, Менден өске кым-даа чок.

²²Чер-делегейниң бүгү ужу-кыдыглары, Менче эглип келиңер, ынчан камгалалды алыр силер, чүге дээрге Мен — Бурган-дыр мен, өске кым-даа чок.

²³Мен Бодумнуң адым-биле даңгыраглаан мен, Мээң аксымдан чөптүг-шынныг, өскертип болбас сөс үнген: Мээң мурнумга дискек бүрүзү сөгүрүп олурар, Мээң адым-биле дыл бүрүзү даңгыраглаар.

²⁴Мээң дугайымда: „Чүгле Дээрги-Чаяакчыда чөптүг-шынныг чорук биле күчү-күш бар“ — деп, улус-чоннар чугаалаар». Аңаа хорадап турган бүгү улус Олче чедип кээп, ыядып човаар.

²⁵А Израильдиң бүгү үре-салгалы Дээрги-Чаяакчының ачызында агартынып үнер база алдаржыыр.