Read Ыдыктыг Библия, 2011 Исаия 46 Bible Online

Исаия 46 - Ыдыктыг Библия, 2011 bible

Исаия 46

¹Вил бурган доңгая берген, Нево бурган ийлени берген; оларның дүрзүлерин чүък чүдүрер малдарда чүдүрүп каан. Силерниң мөгеер дээш дажыглап чораан чүвеңер ам турупкан малдың чүъгү апарган.

²Ол бурганнар шупту кады ийленип, доңгая берген, боттарының дүрзүлерин камгалап аар харык чок болгаш, боттары туттуруушкунче бар чыдар.

³«Мени дыңнаңар, Иаковтуң салгалы, израиль чоннуң бүгү артынчызы, тыптып келген үеңерден бээр чүктеп чорааным, төрүттүнүп келгениңерден бээр холумга көдүрүп чорааным чон!

⁴Кырый бергижеңерге чедир, Мен Ол-ла Бодум боор мен, буурул-даа апаарыңарга, Мен-не силерни көдүрүп чоруур мен. Силерни Мен чаяап каан мен — ынчангаш чүктеп чоруур мен, деткип, камгалаар мен.

⁵Силер Мени кым-биле деңнээр силер, кым Мээң-биле дең деп санаар силер? Дөмей чүүл тып ап, кым-биле дөмейлээр силер?

⁶Чамдык улус акша хавындан алдын тө чажып, деңзиге мөңгүн деңзилээш, ус-шевер кижи хөлезилеп аарга, ол кижи оларга бурган шуткуп бээр. Олар ол дүрзүге мөгеер, ооң мурнунга доңгая кээп дүжер,

⁷ону көдүргеш, эктинге салып алгаш чоруур, оон тургузуп каарга, демгизи турган черинге шимчеш дивейн турар. Ол дүрзүнү дыңзыдыр кыйгырар-даа болза, харыылавас, айыыл-халаптан ол камгалавас.

⁸Үймээнчилер, ол бүгүнү сактып келгеш, соксап калыңар, боданып көрүңер,

⁹шаандагы шагда болуп турган чүвени сактып келиңер: Мен — Бурган мен, өске кым-даа чок, Мен — Бурган мен, Меңээ дөмей кым-даа чок.

¹⁰Төнчүзүнде чүү боорун эгезинде-ле, ам-даа болбаан чүве дугайында баш бурунгаар медеглеп турар Бурган мен. Мээң бодалым боттаныр, күзээн бүгү чүвемни күүседир мен!

¹¹Чөөн чүктен араатан кушту — Мээң бодалымны күүседир кижини ырак чурттан кыйгырып алдым. Мен чугаалап каан мен — күүседир мен, бодап алган мен — кылыр мен!

¹²Чөрүү, актыг-шынныг чоруктан ырак улус, Мени дыңнаңар!

¹³Мен агартыышкыным чорудуп бердим, ол ырак эвесте, чоруткан камгалалым саадавас. Сионга камгалалды, Израильге — Бодумнуң чайынналчак чырыымны хайырлаар мен».