Read Ыдыктыг Библия, 2011 Исаия 49 Bible Online

Исаия 49 - Ыдыктыг Библия, 2011 bible

Исаия 49

¹Ортулуктарның чурттакчылары, мени дыңнаңар, ыракта чоннар, кичээнгейден салыңар! Дээрги-Чаяакчы мени төрүттүнүп кээрим мурнунда-ла кыйгырып алган. Ол мээң адымны иемниң иштинге турумда-ла, адап берген.

²Ол мээң аксы-дылымны чидиг хылыш ышкаш кылып каан, мени Бодунуң холу-биле чаглактап алган. Мени бажын чидидип каан согун кылдыр хуулдургаш, Бодунуң саадаанче чажырып алган.

³Ол меңээ: «Сен — Мээң чалчам Израиль сен, сени дамчыштыр алдаржыыр мен» — дээн.

⁴А мен «Хей-ле чилчиим үзүлдүр ажылдаан-дыр мен, күжүмнү хей черге, ажык чок чарыгдап каапкан-дыр мен» деп бодаан болгай мен. Шынап-ла, мээң чаргымны Дээрги-Чаяакчы шиитпирлээр, мээң шаңналым — Бурганымдан кээр!

⁵Дээрги-Чаяакчы мени иемниң иштинге — Бодунуң чалчазы болзун дээш, Иаковту Олче эгитсин дээш база Израиль Ооң чоогунга чыглып келзин дээш — чаяап каан. Мен Дээрги-Чаяакчының мурнунга алдар-аттыг мен, Бурганым меңээ күчү-күштү хайырлаан.

⁶Ам Дээрги-Чаяакчы: «Иаковтуң аймактарын катап тургузар болгаш Израильдиң артынчызын дедир эгидер чалчам бооруң эвээш-тир. Ооң кырынга, Мээң хайырлаан камгалалым чер-делегейниң ужу-кыдыынга четсин дээш, Мен сени бүгү чоннарга чырык кылып каар мен» — деп чугаалаан.

⁷Бүгү чоннарга бак көрдүрген, дорамчылаткан кижиге, чагырыкчыларының кулунга Дээрги-Чаяакчы, Израильдиң ыдыктыг Камгалакчызы: «Хааннар сени көргеш, туруп кээр, нояннар сени көргеш, сөгүрүүр, чүге дээрге сөзүнге шынчы Дээрги-Чаяакчы, Израильдиң ыдыктыг Бурганы сени шилип алган-дыр» — дээн.

⁸Дээрги-Чаяакчы мынча дээн: «Таарымчалыг үеде сеңээ харыылаар мен, камгалал хүнүнде дузалаар мен. Сени камгалап-карактап турар мен, сени дамчыштыр улус-чон-биле керээ чарар мен: чуртту катап тургузар сен,

⁹туттурган улуска: „Үнүңер!“ — дээр сен, дүмбей караңгыда олурар улуска: „Хостуг силер!“ — дээр сен. Чонум оруктар кыйыынга оъттаар чер тып аар, бүгү тас тейлер безин оларга одар-белчиир апаар.

¹⁰Олар аштавас-даа, суксавас-даа, дендии изиг хүнден-даа качыгдавас. Кээргей көрген Бурган оларны эдертип аппаргаш, суг баштарынга чедире бээр.

¹¹Мээң бүгү дагларымны орук кылып каар мен, Мээң оруктарым бедиктерге шөйлүр».

¹²Көрүңер, ырактан улус кел чыдыр — бир чамдыызы соңгу чүктен, өскелери — барыын чүктен, база чамдыызы — Синим деп черден [49].

¹³Дээрлер, өөрүп-байырлаңар, чер-делегей, өөрүп-хөгле! Даглар хөглүү-биле кыйгы салзын! Дээрги-Чаяакчы Бодунуң чонун аргалап каан-дыр, Бодунуң хилинчек көрген улузунче кээргел-биле көрген-дир.

¹⁴А Сион: «Дээрги-Чаяакчы мени каапкан-дыр. Дээрги мени уттупкан-дыр» — деп бодап турган.

¹⁵«Ие кижи бодунуң чаш төлүн уттур бе, божуп алган төлүн кээргей бербес бе? Херээжен кижи уттуптар болза безин, Мен сени утпас мен!

¹⁶Мен сени Бодумнуң адыштарымда шыйып, демдеглеп алдым, сээң ханаларың кезээде Мээң сагыжымда.

¹⁷Сээң ажы-төлүң бээр далаш-биле кел чыдар, а сени үреп бузуп, хоозураткан улус моон чоруп тур.

¹⁸Долгандыр топтап көрүп көр: сээң хамык чурттакчыларың чыылгаш, сенче чедип кел чыдар-дыр. Дириг Бодумнуң адым-биле даңгыраглап тур мен: сен оларның шуптузун, каасталга-шимелде дег, аяннанып кедип аар сен, олар-биле, келин кыс дег, шиметтинип аар сен.

¹⁹Сээң чериң ээнзиреп, кижи чок арткан, сээң чуртуң хоозурап калган турган, ынчалза-даа ам ол чер-чурт бодунуң чурттакчыларынга дакпыш апаар, а сени сыырып турганнар чоруй баар.

²⁰Биеэги ажы-төлүңнү чидирген сен, ындыг-даа болза, ам-даа ажы-төлдүг болур сен. Ол ажы-төлүң сеңээ: „Бо чер биске дыка дакпыш-тыр. Чурттап болгу дег черден биске берип көр“ — дээр.

²¹Сен ынчан „Оларны меңээ кым божуп берген чүвел? Мен ажы-төлүмнү чидирдим, төл төрүвес апардым, туттуруушкунга чурттап, аал-чурттан ыракка турдум. Оларны кым өстүрүп кааныл? Мен көңгүс чааскаан арткан болгай мен, а олар кайыын келгенил?“ деп боданыр сен».

²²Дээрги-Бурган-Чаяакчы: «Көр даан, Мен чоннарга холум-биле демдек көргүзейн, Бодумнуң тугумну аймактарга көдүрейн — олар сээң оолдарыңны кужактап алгаш, эккээр, сээң кыстарыңны эктинге чүктеп эккээр.

²³Хааннар сээң азыраан адаларың, оларның кадыннары — азырадыкчыларың болур. Олар сээң мурнуңга черге чедир доңгайып, сөгүрүүр база сээң буттарың баарында довуракты пактаар! Сен ынчан Мени Дээрги-Чаяакчы деп база Меңээ идегээр улустуң ады баксыравас деп билип каар сен» — дээн.

²⁴Күштүг дайынчының олча-тывыжын хунаап ап болур бе, түрлүг [50] кижиниң тудуп алган улузун хостап ап болур бе?

²⁵Дээрги-Чаяакчы мынча дээн: «Ийе, күштүг дайынчының тудуп алган улузун адырып болур, түрлүг кижиниң олча-тывыжы хосталыр. Сээң удурланыкчыларыңга Мен удурланыр мен, сээң ажы-төлүңнү Мен камгалаар мен!

²⁶Сени кызагдап турар улуска боттарының эът-бодун чиртир мен, олар боттарының ханын ишкеш, арагадан дег, эзирип каар. Бүгү улус Мени Дээрги-Чаяакчы деп, сээң Камгалакчың, Хостакчың болгаш Иаковтуң күштүг Бурганы деп билип аар».