Read Ыдыктыг Библия, 2011 Исаия 5 Bible Online

Исаия 5 - Ыдыктыг Библия, 2011 bible

Исаия 5

¹Мен ынак Эжимге Ооң виноград шөлүнүң дугайында ырдан ырлап берейн. Мээң Эжим дүжүткүр тейге виноград тарыыр шөлдүг турган.

²Ол Бодунуң шөлүн коптарып каскаш, дажын аштааш, виноград сыптары олуртуп каан. Ол аңаа таңныылдар суургазы туткаш, чимистен чулук сыскырар оңгар кылып каан. Ол чаагай чимис манап турда, винограды багай чимис берген.

³Эжим мынча дээн: «Иерусалимниң чурттакчылары, Иудеяның чону, силер ам виноградым шөлү-биле Мээң чаргымны чарып көрүңер.

⁴Виноград шөлүнге ам-даа чүнү кылып берип болур турган мен, чүнү чедир кылбаан мен? Чаагай чимис манап турумда, чүге ол багай чимис бергенил?

⁵Виноградым шөлүн канчаарымны силерге чугаалап берейн: ооң херимин бузуп кааптарымга, ол хоозурап каар, ооң ханазын үреп кааптарымга, ол таптай бастырар.

⁶Мен ону ээн чер кылып каар мен, артык адырларын кеспес мен, хөрзүнүн коптарбас мен, ону тенниг бок үнүш дуй үнер. Ынаар чаъс чагдырбас кылдыр булуттарга дужаар мен».

⁷Аг-шериглиг Дээрги-Чаяакчының виноград шөлү — израиль чон-дур, Иудеяның чону — Ооң ынак сесерлии-дир. Ол аңаа шынныг шииткел көрүксеп тургаш, хан төгүүшкүнү көрүп каан, чөптүг чорук көөрүнге идегеп тургаш, күчүлелдиң алгы-кышкызын дыңнап каан.

⁸Чер кырында чааскаан чурттап турар чүве дег, өске улуска хостуг чер арттырбайн, бажыңга немей бажың, шөлге немей шөл ээлеп ап турар улус, ат болур силер!

⁹[9-10] Аг-шериглиг Дээрги-Чаяакчының: «Хөй санныг бажыңнар ээнзирээр, улуг каас-чараш бажыңнар чурттакчы чок артар. Виноград шөлүнде он гектар чер чүгле чаңгыс көгээржик ишти арага бээр, чашкан он шоодай ишти үрезин чаңгыс борбак хапчыгаш ишти дүжүт бээр» — деп даңгыраглаанын дыңнадым.

¹¹Эртен эрте туруп келгеш, эзиртир суксун дилээр, орай кежээ дүшкүже, арага куттунар улус ат болур!

¹²Олар дээрге чадаган, чанзы, дамбыра болгаш лимби үнү дыңнап, арага ижип, дойлаар, а Дээрги-Чаяакчының ажыл-херээн эскербес, Ооң холу-биле кылган херектерин кичээнгейге албас улус-тур.

¹³Ынчангаш мээң чонум билииниң четпезинден дайзынга туттуруп алгаш, хары черже чоруй баар, ооң алдар-аттыг улузу аштап өлүр, бай улузу [3] кагып-суксаар.

¹⁴Өлүглер ораны алгып, аксын улгаттыр аазадыпкан: алдар-аттыг, бай улус{*}, хөглээн шуугакчылар ынаар кире бээр.

¹⁵Кижи амытан куду көрдүртүр, кижилер томаарыыр, турамык улус бажын халайтыр.

¹⁶А Аг-шериглиг Дээрги-Чаяакчы Бодунуң шынныг шииткели-биле өндүр бедиин көргүзер, ыдыктыг Бурган Бодунуң чөптүг чоруун дамчыштыр Бодунуң ыдыктыын илередир.

¹⁷Хойлар бо хоорайга одарга-даа дег оъттаар, хураганнар бо хоорайның бузундуларының аразындан чем дилээр.

¹⁸Мегениң хендирлери-биле бузут-бакты сөөртүп чоруур, тергеге суктунуп алган дег, бачыт сөөртүр улус ат болур!

¹⁹«Бурган далажып, Бодунуң ажыл-херээн дүргедетсин — бис ону көрүксеп тур бис; Израильдиң ыдыктыг Бурганының бодалы бисче чоокшулап, чогуп бүтсүн — бис ону билип алыксап тур бис» — деп кыжырып чугаалаар улус ат болур!

²⁰Бузутту буян деп, буянны бузут деп адаар, дүмбейни чырык деп, чырыкты дүмбей деп санаар, ажыг чүүлдү амданныг деп, амданныг чүүлдү ажыг деп санаар улус ат болур!

²¹Боттарының караанга мерген угаанныг бооп, боттарының мурнунга угаан-сарыылдыг бооп көстүр улус ат болур!

²²Эрес-маадырлыы чүгле эңдере арага ижери-биле илерээр, күш-шыдалы чүгле эзиртир суксун белеткээри-биле илерээр улус ат болур;

²³хээли алгаш, буруулуг кижини агартыр, а буруу чок кижиге шынныг шииткел үндүрбес кижи ат болур!

²⁴Ол бүгү дээш, ол улус от чиген тараа саваңы дег, чалбыыштың хүл кылып кааны сиген дег болур, оларның дазылы ирип каар, чечээ довурак ышкаш эстеп тарай бээр. Чүге дээрге олар Аг-шериглиг Дээрги-Чаяакчының хоойлузундан ойталап, Израильдиң ыдыктыг Бурганының чугаазын тооваан-дыр.

²⁵Ол дээш, Дээрги-Чаяакчының килеңи Ооң чонунче кыптыгар; Ол Бодунуң холун оларже көдүрүп, эттеп-согар. Даглар сирилей бээр, улустуң мөчү-сөөктери кудумчуларда өдек-бок дег чыдып бээр. Ынчан безин Ооң килеңи чайлаттынмас, Ооң холу ам-даа улусту кезедип, көдүрлүр!

²⁶Дээрги-Чаяакчы ыракта чоннарны кыйгырып, тук көдүрер, чер-делегейниң кыдыында чурттап турар улуска демдек берип, сыгырар. Көрүңер, дайзын дүрген, божуу-шалып кел чыдыр!

²⁷Дайзыннарның кайызы-даа могаг билбес, бергедевес, кайызы-даа удумзурап, удуп калбас; оларның белинде куру чештинмес, идииниң шидии үзүлбес!

²⁸Оларның согуннары чидиг, чаларын хере тыртып каан; оларның дайынчы тергелериниң дугуйлары казыргы дег!

²⁹Оларның алгы-кышкызы арзылаң алгызы-ла, олар араатан аң дег ырланыр; олчазын сегирип алгаш, ырланып-ырланып, тудуп аппаар — кым-даа камгалап шыдавас!

³⁰Ол хүн кээрге, дайзыннар олчазын тудуп алгаш, олче далай чалгыы мөөрээн дег алгыржыр. Кандыг-бир кижи черже көргеш, дүмбей караңгы биле качыгдал көөр; булуттар дуглаптарга, чырык безин бүлүртүң апаар.