Read Ыдыктыг Библия, 2011 Исаия 51 Bible Online

Исаия 51 - Ыдыктыг Библия, 2011 bible

Исаия 51

¹«Чөптүг-шынныы-биле чурттап, Дээрги-Чаяакчыже чүткүп турар улус, Мени дыңнаңар! Силерни чонуп кылган хаяже, силерни казып ужулган хөрзүнче көрүңер —

²силерниң адаңар Авраамче, силерниң иеңер Сарраже көрүңер. Кажан Авраамны кыйгырып алганымда, ол ажы-төл чок турган, а Мен аңаа ачы-буян хайырлап, хөй-ле үре-салгал берген мен.

³Дээрги-Чаяакчы Сионну ыяап-ла аргалаар, Ол ооң бүгү бузундуларын аргалаар, ээн кургаг ховуларын Эдем сесерлии ышкаш, ээн черлерин — Дээрги-Чаяакчының сесерлии ышкаш кылып каар; Сионну өөрүшкү биле хөглел долар, алгаг-мактал ырлары дыңналыр.

⁴Мээң чонум, Мени дыңна, Мээң аймаам, Менче кулааң ээктир! Мээң аксымдан хоойлу үнер, Мээң чөптүг шииткелим бүгү чоннарга чырыткы апаар.

⁵Мээң хайырлаан агартыышкыным кончуг дүрген чоокшулап кээр, Мээң камгалалым чедип кээр. Мээң холум чоннар аразынга чөптүг шииткелди боттандырар. Ырак ортулуктарның чурттакчылары Меңээ ынанып, Мээң күчү-күжүмге идегээр.

⁶Дээрже көрүжүңер көдүрүңер, ооң адаанда чаттылган черже көрүңер; дээрлер ыш дег эстип тарай бээр, а чер хеп дег элей бээр, ооң чурттакчылары хүлчүктер дег кырлып каар. А Мээң чоруткан камгалалым кезээ мөңгеде турар, Мээң хайырлаан агартыышкыным чиде бербес.

⁷Чөптүг-шынныг чорук деп чүл ол дээрзин билир улус, Мээң хоойлумну чүрээнде сиңирген чон, Мени дыңнаңар! Улус силерни чемелээрге, кортпаңар, бак сөглээрге, сүрээдевеңер.

⁸Ол улус үзүт-ховаганга чирткен хеп ышкаш апаар; курт чипкен дүк дег, олар чиде бээр. А Мээң хайырлаан агартыышкыным кезээ мөңгеде артар, Мээң чоруткан камгалалым салгалдан салгалче дамчыыр».

⁹Оттуп кел, Дээрги-Чаяакчының холу, күчү-күштүг апарып көр! Биеэги үеде дег, эрте-бурунгу салгалдар үезинде дег, оттуп кел. Рахавты [52] Сен одура шапкан эвес сен бе, далайның моозун Сен өттүр шашкан эвес сен бе?

¹⁰Өндүр улуг дүп чок далайны Сен кургаткан эвес сен бе, хостаткан улус эртсин дээш, далайның ханы дүвүнге Сен орук ажыткан эвес сен бе?

¹¹Дээрги-Чаяакчының камгалап каан улузу Сион дагже өөрүп-байырлаан алгы-кышкы-биле үнүп кээр, оларның баштарынга мөңге өөрүшкү дээрбектелдир ораажып, каастаар. Олар өөрүшкү биле хөглелди чедип алыр, а качыгдал биле хараадал ырап чидер.

¹²«Мен, чүгле Мен — сээң Аргалакчың мен. Өлүр тынныг кижиден, оът-сиген ышкаш хуу-салымныг кижи амытандан чүү дээш коргар сен?

¹³Бодуңнуң Чаяакчыңны — дээрни хере чаткан, черни үндезилээн Дээрги-Чаяакчыны уттупкаш, сени узуткаар деп турар кызагдакчының килеңинден үргүлчү коргуп чурттап чоруур-дур сен. А ол килеңнээн кызагдакчы кайыл?

¹⁴Дарлаткан кижи удавайн хостадыр, ол өлбес, чевег-хөөрже кирбес база аъш-чемниг болур.

¹⁵Мен — далайны хөлзедип, чалгыгларны шимээргедип турар, Аг-шериглиг Дээрги-Чаяакчы деп аттыг Бурган-дыр мен!

¹⁶Бодумнуң сөстеримни сээң аксы-дылың-биле чугаалап турар мен, Бодумнуң холумнуң хөлегезинге сени хоргададып алган мен; дээрни хере чадып, черни үндезилээн мен, Сионга: „Сен — Мээң чонум сен!“ — деп чугаалаан мен».

¹⁷Оттуп кел, о Иерусалим, оттуп кел, туруп кел! Дээрги-Чаяакчының килеңин куткан дашканы Ооң холундан хүлээп алгаш, ижипкен сен, арагалыг кундаганы доңгайтыр пактапкан сен.

¹⁸Сээң божаан бүгү оолдарыңдан сени үдеп чедирер кижи чок; сээң азыраан ажы-төлүңден сени холуңдан чедип аар кижи чок.

¹⁹Ийи дакпыр айыыл-халап сени тавараан-дыр — сени кым кээргээрил? Хоозурал болгаш өлүм, аш-чут болгаш дайын-чаа! Сени кым аргалаарыл?

²⁰Сээң ажы-төлүң харыксырап калгаш, дузакка туттунган чээреннер дег, бүгү кудумчулар белдирлеринде чыдарлар. Олар Дээрги-Чаяакчының килеңин бүрүнү-биле көрүп эрткен — сээң Бурганыңның чемелээшкини түрлүг!

²¹Дыңнап көр, арага ишпээн-даа болза, эзирик, хилинчек көрген хоорай!

²²Дээрги-Бурган-Чаяакчы Бодунуң чонунга болчуп турар. Дээргиң: «Мен сээң холуңдан эзиртир ишкениң бо дашканы, Мээң килеңимни куткан кундаганы, ап алдым, сен ам оон ыңай ишпес сен!

²³Сээң хилинчектекчилериң сеңээ: „Доңгайып чыдывыт — сени кырлап эрте берээли!“ — дээш, кудумчуга кылаштап турган дег, сээң ооргаңны, чер ышкаш, кырлап чоруп турду! Ам дашканы оларга хүлээдип бээр мен» — дээн.