Read Ыдыктыг Библия, 2011 Исаия 55 Bible Online

Исаия 55 - Ыдыктыг Библия, 2011 bible

Исаия 55

¹«Кагып-суксаан бүгү улус, сугга чедип келиңер! Акша-мөңгүнүңер чок-даа болза, чедип келгеш, тараадан ап алыңар, чиңер! Келгеш, арага биле сүттен ап алыңар — акша-мөңгүн төлевейн, халаска алыңар!

²Аъш-чем боор харык чок чүве дээш чүге акша-мөңгүн төлеп турар силер? Кижи тоттурбас чүве дээш чүге күш-ажылыңар төлевирин берип турар силер? Мени топтап дыңнаңар, ынчан эки аъш-чем чиир силер, чаагай чемге сеткилиңер ханар.

³Кулааңар ээктирип, Меңээ чедип келиңер, амы-тынныг артар дээш дыңнаңар. Мен силер-биле мөңге чагыг-керээ чарар мен, Давид хаанга аазаан Мээң ынаныштыг энерелимни силерге хайырлаар мен.

⁴Давидти чоннарга херечи база чоннарның баштыңы болгаш чагырыкчызы кылып кагдым.

⁵Билбезиң чоннарны сен бодуңга кыйгырып аар сен, сени билбес турган чоннар сенче далаш-биле чедип кээр. Олар Дээрги-Чаяакчы Бурганың дээш, Израильдиң ыдыктыг Бурганы дээш чедип кээр, чүге дээрге Ол сени алдаржыдар».

⁶Дээрги-Чаяакчыны амдыызында дилеп тып ап болур турда, Олче чүткүңер! Ол амдыызында чоок турда, Ону кыйгырып алыңар!

⁷Бузуттуг кижи бодунуң оруундан, бачыттыг кижи — бодунуң кара сагыжындан ойталазын; олар Дээрги-Чаяакчыже ээлзиннер — Ол оларны кээргээр, Бурганывысче ээлзиннер — Ооң өршээли элбек болгай.

⁸«Мээң бодалдарым — силерниң бодалдарыңар эвес, силерниң оруктарыңар — Мээң оруктарым эвес — деп, Дээрги-Чаяакчы медеглээн. —

⁹Дээрниң черден кайы хире бедии дег, Мээң оруктарым биле бодалдарым силерниң оруктарыңар биле бодалдарыңардан ол хире бедик.

¹⁰Дээрден баткан чаъс биле хар дедир ээлбейн, чажар үрезин, чиир далган-тараа берзин дээш, черни суггарып, ол чер үнүштү төрүп база өстүрүп шыдаар кылып каары дег,

¹¹Мээң аксымдан үнген сөс база күүсеттинмээн шаанда, Менче дедир ээлбес. Ол сөс Мээң күзел-соруумну күүседир, Мээң кылзын дээш айбылап чорудупканым бүгү чүүлдү боттандырар.

¹²Мээң чонум, өөрүшкүлүг үнүп чоруптар силер, амыр-тайбың-биле силерни салып чорудуптар. Даглар, тейлер силерниң мурнуңарга ырлап хөглээр, хову-шөлде бүгү ыяштар силерге адыш часкаар.

¹³Тенниг чадаң үнүш орнунга чойганнар өзүп үнер, шагар-оът орнунга — шивилер өзүп үнер. Ол бүгү Дээрги-Чаяакчыны алдаржыдары-биле болур, мөңге, чиде бербес бадыткал демдээ апаар».