Read Ыдыктыг Библия, 2011 Исаия 58 Bible Online

Исаия 58 - Ыдыктыг Библия, 2011 bible

Исаия 58

¹«Үнүң шаа-биле кышкыр, алгы-кышкың тыртпа; труба эткен ышкаш дыңзыдыр алгыр. Мээң чонумнуң кем-буруузун, Иаковтуң үре-салгалының бачыдын сойгала!

²Олар Менче хүннүң-не чүткүп, Мээң оруктарымны билип алыксап тур — чөптүү-биле чурттап, бодунуң Бурганының дүрүм-хоойлузун кагбайн чоруур чон дег, олар Менден чөптүг шиитпирлер дилеп ап, Бурганче чоокшулаарын күзеп тур.

³„Чүге шээрлээшкинивисти көрбес сен? — деп, олар чугаалап тур. — Чүге боттарывысты шеглээшкин-биле томаартканывысты эскербес сен?!“ Силер шээрленир хүнүңерде-даа боттарыңарның күзел-сорууңарга башкартып, бүгү хөлечиктериңерни кызагдаар-дыр силер.

⁴Шээрленип турар үеңерде алгыш-кырыш, адааннажыышкын көвүдээр-дир, улусту чудурук-биле хайыра чок эттеп-согар-дыр силер. Ынчаар шээрленип туруңарда, силерниң чалынган үнүңерни бедиктерге дыңнавас-даа!

⁵Мээң күзеп турарым шээрлээшкин, кижиниң бодун томаартыр хүнү ындыг боор чүве бе? Силер хыыргыыш ышкаш, бажын доңгайтырын, хүл кырынга самдар хептиг чыдарын шээрлээшкин деп, Дээрги-Чаяакчының сеткилинге кирер хүн деп адаар силер бе?

⁶Мээң күзеп турарым шээрлээшкин мындыг: чөптүг эвес хоругдаттырган кижиден кинчини адырыңар, ооң мойнунда дөңгүнү уштуп кааптыңар! Дарлаткан улусту хостаңар, кандыг-даа дөңгүнү узуткаңар!

⁷Аштаан кижи-биле аъш-чемиң үлеш, улчуп чоруур ядамыктарны бажыңыңга тургузуп ал. Хеп чок кижи көрзүңзе, хепкерип каг, ха-дуңмаңдан хагдынма.

⁸Ынчаар кылыр болзуңза, сеңээ чырык, хаяа ышкаш, чырып кээр, сен дүрген экириир сен. Сээң чөптүг-шынныг чорууң сээң мурнуңга чоруур, а Дээрги-Чаяакчының өндүр чырыы сээң сооңдан үдеп, камгалаар.

⁹Ынчаар кылыр болзуңза, сен Дээрги-Чаяакчыны кыйгырарыңга, Ол харыылаар, дуза дилеп кыйгы салырыңга, „Мында мен!“ деп харыылаар. Бодуңда бар кандыг-даа дөңгүнү узуткап кааптар болзуңза, салааң-биле айтырын база нүгүлдээрин соксадыр болзуңза,

¹⁰аштаан кижиге аъш-чемиң хайырлаар болзуңза, хилинчектенген кижиниң хереглээн чүвезин хандырып бээр болзуңза, сеңээ караңгыда чырык чырып кээр, сээң дүмбейиң дал дүъш дег апаар.

¹¹Дээрги-Чаяакчы сени кезээде эдертип баштаар. Кургап калган черлерге безин хереглээн чүвең-биле Ол сени хандырар, мага-бодуңну быжыктырар. Сен суггарып каан сесерлик дег, суу төнмес суг бажы дег апаар сен.

¹²Эрте-бурунгу бузундулар орнунга хоорайларны катап тудар сен, эрткен үениң тудугларын катап тургузар сен. Сеңээ „Бузулган ханаларның катап тургузукчузу, улус чурттаар кудумчуларның катап тудукчузу“ деп аттарны тыпсыр.

¹³Бир эвес сен амыр-дыш хүнүн будуң-биле таптай баспас болзуңза, Мээң ыдыктыг хүнүмде сагыжыңга кирген-не чүве кылып турбас болзуңза, бир эвес амыр-дыш хүнүн тааланчыг деп санаар, Дээрги-Чаяакчының ол ыдыктыг хүнүн „Хүндүткелдиг хүн“ деп адаар болзуңза база бодуңнуң хүннүң-не кылыр ажыл-херээңден, сагыжыңга кирген-не чүведен, хоозун чугаадан ойталап, амыр-дыш хүнүн сагыыр болзуңза,

¹⁴Дээрги-Чаяакчы дээш өөрүп, таалаар сен! Мен сени черниң бедигээштеринче үндүрүп, Иаков өгбеңден салгап алган чериңге сени дойладыр мен». Дээрги-Чаяакчының аксындан үнген сөстер ол-дур.