Read Ыдыктыг Библия, 2011 Исаия 63 Bible Online

Исаия 63 - Ыдыктыг Библия, 2011 bible

Исаия 63

¹Эдом черден кел чыдар, Восора хоорайдан кел чыдар кызыл хептиг кымыл ол? Каас-коя хеп кеткен, Бодунуң өндүр улуг күчү-күжү-биле кылаштап олурар кымыл ол? «Ол — Мен-дир мен — чөптүг-шынныг сөстер медеглеп турар, камгалап шыдаар күчү-күштүг Мен-дир мен».

²Чүге Сээң кеткен хевиң, оңгарда виноград сы баскан кижинии дег, кызыл өңнүгүл?

³«Мен оңгарга чааскаан чимис сы базып турдум, бүгү чоннардан кым-даа Меңээ дузалап, кады турбады. Мен оларны килеңнээш, сы базып, хорадааш, таптап турдум; оларның ханы Мээң хевимче чаштап турду, Бодумнуң кеткен хевимни ханга борап алдым.

⁴Дайзындан өжээн негээр хүнүм Мээң чүрээмде доктааттынган, чонумну хостаар үе келген.

⁵Мен көөрүмге, дузалакчы чок болду! Кайгап калдым — Меңээ дөмек болур кижи чок болду! Ынчангаш Мээң Бодумнуң күчү-күжүм тиилелгени шаңнады, Мээң хорадаан сагыжым Мени деткиди!

⁶Килеңнээш, Мен чоннарны таптай базып турдум, хорадааш, оларны эзиртир ижиртип [59], ханын черже төп турдум».

⁷Дээрги-Чаяакчының энерелдиин, Ооң макталга төлептиин сактып кээр мен. Дээрги-Чаяакчы бис дээш өндүр улуг ачы-буян кылган, израиль чонувуска Бодунуң ээ-хайыразын, аажок улуг энерелин көргүскен.

⁸Ол: «Бо — Мээң чонум-дур, Мени мегелевес ажы-төлүм-дүр!» — дээн. Ол оларның Камгалакчызы апарган,

⁹оларның бүгү качыгдалын үлежип келген, Ооң төлээзи оларны камгалап турган. Бодунуң ынакшылы болгаш ээ-хайыразы-биле Ол оларны хостааш, бүгү эрте-бурунгу үеде холунга көдүрүп чораан.

¹⁰Ынчалза-даа олар тура халааш, Ооң ыдыктыг Сүлдезин хомудадыптарга, Ол оларның дайзыны апаргаш, олар-биле дайылдажып турган.

¹¹Ынчан Ооң чону эрте-бурунгу үени, Моисейниң үезин сактып келген — Бодунуң сүрүүн кадарчылары-биле кады далайдан үндүре берген Бурган кайыл, чонунга Бодунуң ыдыктыг Сүлдезин хайырлаан Бурган кайыл,

¹²Бодунуң күчү-күштүг холу-биле Моисейни чедип алгаш чораан, Бодун кезээ мөңгеде алдаржыдып, чонунуң мурнунда сугну ийи чара аңгылапкан,

¹³ону далайның дүвү-биле кежире берген Бурган кайыл? Чон, ховуда аът ышкаш, тептикпейн барган,

¹⁴Дээрги-Чаяакчының Сүлдези чонну, шынааже бадып бар чыткан сүрүг малды дег, амыр-дыш черинге эккелген. Бодуңнуң адыңны алдаржыдар дээш, чонуңну ынчаар эдертип бар чыткан сен.

¹⁵Дээрден куду алзы көрем, Бодуңнуң ыдыктыг болгаш алдарлыг чурттаар чериңден көрүп көрем! Сээң хүннээчел сагыжың болгаш күчү-күжүң кайыл? Бодуңнуң улуг ээ-хайыраң биле кээргелиңни биске көргүспес апардың.

¹⁶Сен — бистиң Адавыс сен! Авраам бисти билир хөңнү чок-даа болгай-ла, Иаков бисти хүлээп көрүксевейн-даа баргай-ла, ынчалза-даа Сен, Дээрги-Чаяакчы — бистиң Адавыс сен; эрте шагдан бээр Сээң адың — «Камгалакчывыс» болгай.

¹⁷Чүге, о Дээрги-Чаяакчы, Бодуңнуң оруктарыңдан бисти астыктырып, Сенден кортпас кылдыр чүректеривисти чөрүүледип тур сен? Сээң чалчаларың дээш, Сээң үлүүң болур бо аймактар дээш, эглип кээп көрем!

¹⁸Сээң ыдыктыг чонуң бодунуң черин үр ээлеведи — ам ыдыктыг өргээңни дайзыннарывыс таптай базып тур.

¹⁹Бис ам Сээң кажан-даа чагырбайн чорааның чоннар дег, Сеңээ хамаарышпас улус дег апардывыс.