Read Ыдыктыг Библия, 2011 Исаия 65 Bible Online

Исаия 65 - Ыдыктыг Библия, 2011 bible

Исаия 65

¹«Мени айтырбаан улуска ажыттынган мен; Менче чүткүвээн улус Мени тып алган. Мээң адым адап, кыйгырбаан чонга: „Мында мен, мында!“ — деп чугааладым.

²Мен хүннү бадыр чагырга билбес чонче, боттарының бодал-сагыжын эдерип, бак оруктар-биле чоруп турар улусче холум сунуп турдум.

³Олар Мени үргүлчү арнымга-ла дорамчылап турар, дүрзү-бурганнарга ыдыктыг дээн сесерликтерингеөргүл салып, оларга тууйбудан кылган бедигээштерге артыш кыпсып турар,

⁴дүне чевег-куйларда, чажыт черлерде караң көрнүп турар, хаван эъди чиир, савазынга арыг эвес быдаа хайындырып, кудуп ижер,

⁵өске улуска: „Менден ырадыр тур, оон башка мээң ыдыктыым сенче шилчий бээр“ — дээр улус-тур. Олар, ыжы карак өер өшпестээн от дег, Мени хорададып турар.

⁶[6-7] Оларның шииткелин Мээң мурнумда бижип каан. Ыыттавайн барбас мен, оларның боттарының бачыттары дээш база ада-өгбезиниң бачыттары дээш, оларга кеземче онаар мен — деп, Дээрги-Чаяакчы чугаалаан. — Олар дагларга айдызаар өргүл кылып, тейлерге Мени бужар байдалга таварыштырып турган болгай! Биеэги үүлгедиглери дээш, Мен оларга бүрүнү-биле кеземче хемчээп бээр мен!»

⁸Дээрги-Чаяакчы мынча дээн: «Виноград салбаанда чулук артып калган болза, улус: „Аңаа хора чедирбе, ол ам-даа ачы-дузалыг-дыр“ — дээр. Мен база ынчаар кылыр мен: Бодумнуң чалчаларымны бодааш, чонумну бүрүнү-биле узуткавас мен.

⁹Мен Израильден үре-салгалды өстүрер мен, Иудеяны — Мээң даглыг чуртумну ээлээр салгакчылар артып каар; ону Мээң шилип алган улузум салгап алыр, аңаа Мээң чалчаларым чурттаар.

¹⁰Менче чүткүп турар чонумга Шарон оргулаажы — хойлар оъттаар одар-белчиир, Ахор шынаа — бода мал дыштанып чыдар чер болур.

¹¹А силерниң — Дээрги-Чаяакчыдан ойталаан, Мээң ыдыктыг даамны уттупкан, салым-чол бурганынга аъш-чем белеткеп салып, арагалыг дашка сунуп турар улустуң —

¹²салым-чолуңарны Мен тодарадып каан мен: хылыш силерни өлүрүп каар, силер шупту дискек кырынга олура, кыра шаштырып аар силер! Чүге дээрге Мен кыйгырып турдум, а силер харыылавадыңар, Мен чугаалап турдум, а силер дыңнавадыңар. Мээң бузуттуг деп санаарым чүве үүлгедип, Мээң сеткилимге кирбес чүве шилип алдыңар».

¹³Ынчангаш Дээрги-Бурган-Чаяакчы мынча дээн: «Мээң чалчаларым чемненир, а силер аштаар силер; Мээң чалчаларым ижер, а силер кагып-суксаар силер;

¹⁴Мээң чалчаларым өөрүүр, а силер бак атка кирер силер! Мээң чалчаларым өөрүп-байырлаар, оларның чүректерин хөглээшкин бүргээр, а силер чүрээңерде качыгдалга алзып, човууртаар силер, аажок муңгарааш, ыглап-сыктаар силер.

¹⁵Силерниң аттарыңар Мээң шилип алган улузумга каргыш бооп артар. Дээрги-Бурган-Чаяакчы силерни өлүмге хүлээдир, а Бодунуң чалчаларынга өске ат тыпсыр.

¹⁶Ынчан чер кырында алгаг-йөрээшкин кылып турар кижи бүрүзү сөзүнге шынчы Бурганның адын ажыглаар; чер кырында даңгырак берген кижи бүрүзү сөзүнге шынчы Бурганның ады-биле даңгыраглаар. Чүге дээрге биеэги качыгдалдар уттундурган, олар ам Мээң көрүжүм мурнунда артпаан-дыр.

¹⁷Көрүңер, Мен чаа дээр биле чаа черни чаяар деп тур мен, биеэде турган чүве моон соңгаар сагышка артпас, угаанга кирбес.

¹⁸Мээң чаяар чүүлдерим дээш өөрүп-байырлаңар, кезээ мөңгеде хөглеңер! Мээң чаяарым Иерусалимни байырлал долар, ооң чонун — өөрүшкү бүргээр.

¹⁹Мен Иерусалим дээш өөрүп-хөглээр мен, чонум дээш өөрүп-байырлаар мен; аңаа ам кажан-даа ыы-сыы, уё-човуур дыңналбас.

²⁰Аңаа моон соңгаар чаш ажы-төл өлүп кырылбас, бодунуң назынын бүрүнү-биле чурттаваан шаанда, чаңгыс-даа кырган кижи өлбес. Кайы-бир кижи чүс харлыында өлүп калган болза, аныяанда калган деп санаттырар, а чүс хар чедир чурттаваан кижини каргаттырган деп санаар [60].

²¹Улус-чон бажыңнар тудуп алгаш, аңаа боттары чурттаар. Олар тарып алган чимизин боттары чиир.

²²Оларның тудуп каан бажыңнарынга хары улус чурттаар деп чүве моон соңгаар турбас. Оларның тарып каан ыяштарының чимизин хары улус чиир деп чүве турбас. Мээң чонум ыяштар дег үр чурттаар. Мээң шилип алган улузум холу-биле кылган бүгү чүвезин боттары үр үеде ажыглаар.

²³Олар үре-түңнел чок ажылдавас, оларның ажы-төлү төрүттүнгеш, айыыл-халапка алыспас. Олар Дээрги-Чаяакчының ачы-буянын алган чон болур — олар боттары, оларның үре-салгалы-даа!

²⁴Олар Мени кыйгырар мурнунда-ла, Мен харыылаар мен; олар чугаазын төндүрбээнде-ле, Мен дыңнап кааптар мен.

²⁵Бөрү биле хураган кады оъттаар, арзылаң шары ышкаш сиген чиир, а чыланның чеми довурак-доозун бооп артар. Мээң бүгү ыдыктыг даамга кым-даа узуткаашкын кылбас, хора чедирбес апаар». Дээрги-Чаяакчының чугаалаан чүвези ол-дур.