Read Ыдыктыг Библия, 2011 Исаия 8 Bible Online

Исаия 8 - Ыдыктыг Библия, 2011 bible

Исаия 8

¹Дээрги-Чаяакчы меңээ: «Улуг самбырадан ап алгаш, улуска билдингир кылдыр аңаа: „Магер-шелал-хаш-баз“ [9] — деп бижип каг.

²А Мен Бодумга Бурганның бараалгакчызы Урия биле Иеверехияның оглу Захарияны бүзүрелдиг херечилер кылдыр кыйгырып аар мен» — дээн.

³Мен ынчан өттүр билир кадайым-биле чоокшулажырымга, ол иштели бергеш, оол уруг божуп берген. Дээрги-Чаяакчы меңээ: «Оглуңну Магер-шелал-хаш-баз{*} деп адап ал.

⁴Чүге дээрге бо чаш төлдүң „ачай“ база „авай“ деп чугааланырының мурнунда-ла, Дамаскының эртине-байлаан болгаш Самариядан үптеп алган чүвезинАссирияның хааны олчалап алгаш баар» — дээн.

⁵Дээрги-Чаяакчы меңээ катап база чугаалаан:

⁶«Бо чон оожум аккан Силоам суун [10] херекке албайн, Рецин болгаш Факей-биле эвилелдежиринге идегеп, өөрүп турар-дыр.

⁷Ол дээш, Дээрги олче улуг, шапкын Евфрат хемниң суун — Ассирияның ат-алдарлыг хаанын ыдыптар. Ол хем бодунуң бүгү адырларындан көдүрүлгеш, эриин ажыр агып,

⁸Иудеяже үерлеп киргеш, ону хөме ап, моюнга чедир көдүрлү бээр; ооң хөме аккан чалгыглары сээң чериңни бүрүнү-биле шыва аптар, о Эммануил! [11]»

⁹Бүгү чоннар, шимээргеп хөлзеңер, ынчалза-даа чылча шаптырар силер! Бүгү ырак чурттар, тооп дыңнаңар! Тулчуушкунга белеткенип-даа алзыңарза, чылча шаптырар силер; тулчуушкунга белеткениңер, ынчалза-даа чылча шаптырар силер!

¹⁰Бодалдарыңар бодап алыңар, ынчалза-даа олар болдунмайн баар; сөзүңер чугаалаңар, ынчалза-даа ол бүтпес, чүге дээрге Бурган бистиң-биле!

¹¹Дээрги-Чаяакчы күштүг холун менче салгаш, мээң-биле чугаалажып, бо чоннуң оруун эдербезин сагындырып турду. Ол мынча дээн:

¹²«Бо чоннуң сүлчээ деп адаар бүгү чүвезин ынча деп санаваңар; ооң коргар чүвезинден коргуп-сүртевеңер.

¹³Аг-шериглиг Дээрги-Чаяакчының ыдыктыын хүндүлеңер, Оон коргуңар, Оон сүрээдеңер!

¹⁴Дээрги-Чаяакчы Израиль биле Иудея ийиге чок-ла болза ыдыктыг чер болур, чок-ла болза моондак даш, тептигер хая болур. Ол Иерусалимниң чурттакчыларынга какпа-дузак болур.

¹⁵Олардан хөй улус тептиккеш, чылча кээп дүжер, дузакка киргеш, туттуруп аар».

¹⁶Мен херечилелимни шыгжап каайн, Бурганның ажыдыышкынын өөреникчилерим көрүп турда, таңмалап каайн.

¹⁷Дээрги-Чаяакчы израиль чондан хая көрүнген-даа болза, Ону манаар мен, Аңаа идегээр мен.

¹⁸Мен база Дээрги-Чаяакчының меңээ бергени ажы-төл — бо-дур бис. Мээң ажы-төлүм — Сион дагда чурттап турар Аг-шериглиг Дээрги-Чаяакчының Израильге берген, баш бурунгаар айыткан демдектери ол-дур.

¹⁹Бир эвес силерге: «Өлгеннерниң сүнезиннерин кыйгырып, сымыранып турар караң көрнүр улустан чүве айтырыңар» — дээр болза, «Чон бодунуң Бурганындан айтырар ужурлуг эвес чүве бе? Дириглер дугайында өлүглерден канчап айтырар чүвел?» — деп харыылаңар.

²⁰Бурганның хоойлузу база ажыдыышкыны чүү деп турарын көрүңер! Бир эвес улус бо сөс ёзугаар чугаалавас болза, оларда хаяа чырыы чок-тур.

²¹Ындыг улус чер кырынга муңгарап-деңгереп, аштап-суксай берген улчуп чоруп каар; аштаан үезинде хорадап, боттарының хаанын база Бурганын каргаар.

²²Олар өрү-даа көөрге, черже-даа көөрге, чүгле качыгдал, коргунчуг дүмбей караңгы көстүр, олар дүмбей караңгыже октаттырар. Ындыг-даа болза, караңгы биле баш муңгаш байдал кезээ мөңгеде турбас.